ຕອນຮຸ່ງເຊົ້າວັນທີ 22 ສິງຫານີ້,ເຈົ້າໜ້າທີ່ຂອງຝ່າຍຕໍ່ຕ້ານລັດຖະບານລີບີປະກາດວ່າ,ກຳລັງປະກອບອາວຸດຂອງຝ່າຍຕໍ່ຕ້ານລັດຖະບານໄດ້ຄວບຄຸມສະຖານະການຂອງນະຄອນຫຼວງຕຼີໂປລີ,ປະຈຸບັນນີ້.ກຳລັງຊອກຈັບທ່ານກັດດາຟີ,ພ້ອມທັງກຳຈັດການເຄື່ອນໄຫວຂອງກອງທະຫານລັດຖະບານກັດດາຟີທີ່ເຫຼືອຢູ່.
ຕາມທ່ານອັບເດຣ ຈາລີຣ,ປະທານຄະນະກຳມະການຊົ່ວຄາວແຫ່ງຊາດລີບີເປີດເຜີຍວ່າ,ປະຈຸບັນນີ້,ທ່ານມູຮາມັດ ກັດດາຟີ,ລູກຊາຍກົກຂອງທ່ານກັດດາຟີຖືກປິດລ້ອມຢູ່ບ່ອນປະຈຳການ,ແຕ່ປະຕິເສດວ່າຈະຍອມຈຳນົນ,ທ່ານເຊອິຟ ອານ ອິສລາມ ກັດດາຟີ,ລູກຊາຍຜູ່ທີສອງໄດ້ຖືກຈັບຕົວ,ແລະຖືກຈຳຄຸກຢູ່ບ່ອນປອດໄພ.ທ່ານຈາລີຣກ່າວເນັ້ນວ່າ, ຄະນະກຳມະການຊົ່ວຄາວແຫ່ງຊາດບໍ່ຢາກໃຫ້ເກີດເຫດການນອງເລືອດອີກ,ແລະຫວັງວ່າແຕ່ນີ້ເປັນຕົ້ນໄປຈະສາມາດປົກຄອງປະເທດຕາມກົດໝາຍ.
ນັບແຕ່ຕອນຄ່ຳວັນທີ21ສິງຫານີ້, ຝ່າຍຕໍ່ຕ້ານລັດຖະບານລີບີໄດ້ເພີມທະວີການໂຈມຕີທາງການທະຫານຕໍ່ນະຄອນຫຼວງຕີຼໂປລີ.ຕໍ່ເລື່ອງນີ້,ທ່ານບາຣັກ ໂອບາມາ ປະທານາທິບໍດີອາເມລິກາອອກຖະແຫຼງການວ່າ,ການຂຶ້ນຄອງອຳນາດຕໍ່ລີບີຂອງລັດຖະບານກັດດາຟີໄດ້ສິ້ນສຸດລົງແລ້ວ,ແລະຮຽກຮ້ອງໃຫ້ກັດດາຟີມອບສິດ ອຳນາດຄືນໃຫ້ປະເທດຊາດແລະປະຊາຊົນລີບີໂດຍທັນທີ.ທ່ານລັສມູເຊັນ,ເລຂາທິການໃຫຍ່ນາໂຕອອກຖະແຫຼງການວ່າ,ນາໂຕຈະຮ່ວມມືກັບຝ່າຍຕໍ່ຕ້ານລັດຖະ ບານລີບີເພື່ອຮັບປະກັນຄວາມສາມາດໃນການມອບຮັບສິດອຳນາດການປົກຄອງ ໂດຍສັນຕິ,ຈະສືບຕໍ່ປະຕິບັດຕາມມະຕິຂອງສະພາຄວາມໝັ້ນຄົງສະຫະປະຊາຊາດ,ຕິດຕາມກວດກາກອງທະຫານຮາບແລະສິ່ງປະກອບທີ່ສຳຄັນທາງທະຫານຂອງລີບີຕື່ມອີກ.ນອກນີ້,ລັດຖະບານອັງກິດແລະທຳນຽບປະທານາທິບໍດີຝຣັ່ງ ກໍ່ໄດ້ສະແດງທ່າທີ,ຮຽກຮ້ອງໃຫ້ລັດຖະບານກັດດາຟີມອບອຳນາດໂດຍທັນທີ.
