ອົງການຮ່ວມມືດ້ານວິທະຍາສາດເຕັກນິກທີ່ມີເນື້ອໃນແທ້ຈິງແຫ່ງທຳອິດຂອງກອງປະຊຸມອາຊີເອີຣົບສ້າງຕັ້ງຂຶ້ນຢູ່ຈີນ
(GMT+08:00) 2011-08-23 16:28:08 cri
ວັນທີ22ສິງຫານີ້,"ສູນຄົ້ນຄວ້າແລະນຳໃຊ້ຊັບພະຍາກອນນ້ຳອາຊີເອີຣົບ"ທີ່ເປັນອົງການຮ່ວມມືດ້ານວິທະຍາສາດເຕັກນິກພາຍໃນກົນໄກກອງປະຊຸມອາຊີເອີຣົບນັ້ນໄດ້ສ້າງຕັ້ງຂຶ້ນຢູ່ແຂວງຫູນານຂອງຈີນ.ນີ້ແມ່ນອົງການຮ່ວມມືດ້ານວິທະຍາສາດເຕັກນິກແຫ່ງທຳອິດທີ່ຕັ້ງສຳນັກງານຢູ່ຈີນເມື່ອກົນໄກແຫ່ງການສ້າງຕັ້ງກອງປະຊຸມອາຊີເອີຣົບມາໄດ້16ປີແລ້ວ.
ວັນທີ22ສິງຫານີ້,ຜູ່ຕາງໜ້າເຈົ້າໜ້າທີ່ລັດຖະບານຂອງ18ປະເທດພາຄີກອງປະຊຸມ ອາຊີເອີຣົບ,ເຊັ່ນ:ລາວແລະເຢຍລະມັນ,ເຈົ້າໜ້າທີ່ຂັ້ນສູງຂອງກອງປະຊຸມອາຊີເອີຣົບພ້ອມດ້ວຍຜູ່ແທນຈາກຈີນໄດ້ເຂົ້າຮ່ວມພິທີການສ້າງຕັ້ງ.
ທ່ານບຸນເກີດ ສັງສົມສັກ,ລັດຖະມົນຕີຊ່ວຍວ່າການກະຊວງການຕ່າງປະເທດສປປລາວເຫັນວ່າ,ການສ້າງຕັ້ງສູນແຫ່ງນີ້ຈະເສີມຂະຫຍາຍບົດບາດນຳພາທີ່ດີຕໍ່ບັນດາປະເທດພາຄີທີ່ນຳໃຊ້ຊັບພະຍາກອນດ້ວຍການປະສານສົມທົບກັນຢ່າງຕໍ່ເນື່ອງ,ຮັບປະກັນຜົນປະໂຫຍດດ້ານຊັບພະຍາກອນນ້ຳລະຫວ່າງບັນດາປະເທດພາຄີ,ຊ່ວຍການພັດທະນາເສດຖະກິດສັງຄົມຢ່າງຕໍ່ເນື່ອງຂອງບັນດາປະເທດພາຄີ,ແລະເພີ່ມທະວີການແລກປ່ຽນແລະຮ່ວມມືກັນດ້ານວິທະຍາສາດເຕັກນິກແລະນະໂຍບາຍລະຫວ່າງບັນດາປະເທດພາຄີ.
ກອງປະຊຸມອາຊີເອີຣົບລວມມີ48ປະເທດພາຄີ,ຈັດກອງປະຊຸມ2ປີໃດເທື່ອໜຶ່ງ,ແມ່ນກົນໄກສົນທະນາປະຈຳທີ່ມີລະດັບສູງສຸດລະຫວ່າງປະເທດອາຊີເອີຣົບ.
