ຝ່າຍຕໍ່ຕ້ານລັດຖະບານລີບີບຸກເຂົ້າຄ້າຍທະຫານອາຊີຊີຢາ ທ່ານກັດດາຟີກ່າວວ່າຕົນເອງຍັງຢູ່ນະຄອນຫຼວງຕຼີໂປລີ
(GMT+08:00) 2011-08-24 11:20:29 cri
ພາຍຫຼັງໄດ້ຍິງປະທະກັນຢ່າງຮຸນແຮງເປັນເວລາ1ວັນແລ້ວ,ກຸ່ມປະກອບອາວຸດຝ່າຍຕໍ່ຕ້ານລັດຖະບານລີບີໄດ້ບຸກເຂົ້າຄ້າຍທະຫານອາຊີຊີຢາຊຶ່ງເປັນສັນຍະລັກຂອງອຳນາດກັດດາຟີ ຜູ່ນຳລີບີ ໃນຕອນແລງວັນທີ23ສິງຫານີ້,ແລະໄດ້ຍຶດຄອງບ່ອນຢູ່ຂອງທ່ານກັດດາຟີໃນຄ້າຍທະຫານແຫ່ງນີ້,ແຕ່ບໍ່ໄດ້ພົບເຫັນຮ່ອງຮອຍຂອງທ່ານກັດດາຟີແລະລູກຊາຍຂອງທ່ານ.
ມື້ດຽວກັນ,ທ່ານລຽມຊີນົຟ ປະທານສະຫະພັນໝາກເສິກສາກົນກ່າວວ່າ, ທ່ານກັດດາຟີ ຜູ່ນຳລີບີໄດ້ໂທລະສັບລົມກັບທ່ານແລະແຈ້ງວ່າ,ທ່ານກັດດາຟີຍັງຢູ່ໃນນະຄອນຫຼວງຕີຼໂປລີແລະບໍ່ຢາກອອກຈາກລີບີ.
ຕອນຂ້ອນແຈ້ງວັນທີ23ສິງຫານີ້,ທ່ານຊາອິຟ ອັນ ອິສຣາມ ກັດດາຟີລູກຊາຍຜູ່ທີສອງຂອງກັດດາຟີໄດ້ຈັດກອງປະຊຸມຂ່າວຢູ່ຄ້າຍທະຫານອາຊີຊີຢາວ່າ,ນະຄອນຫຼວງຕຼີໂປລີຍັງຢູ່ພາຍໃຕ້ການຄວບຄຸມຂອງທ່ານກັດດາຟີ,ທ່ານກັດດາຟີພ້ອມດ້ວຍຄອບຄົວລ້ວນແຕ່ຢູ່ຕຼີໂປລີ.ແຕ່ທ່ານຊາອິຟປະຕິເສດເປີດເຜີຍທີ່ຢູ່ລະອຽດຂອງຄອບຄົວ.
ນອກນີ້,ມີຂ່າວແຈ້ງວ່າ,ມື້ດຽວກັນ,ຝ່າຍຕໍ່ຕ້ານລັດຖະບານລີບີຍັງໄດ້ຄວບຄຸມເມືອງລາສ ລານົຟ ເມືອງສຳຄັນໃນການຜະລິດນ້ຳມັນທີ່ຢູ່ທາງພາກຕາເວັນອອກຂອງລີບີ.
ປະຈຸບັນ,ສັນຍານໂທລະພາບແຫ່ງຊາດຂອງລີບີຖືກຕັດຂາດແລ້ວ,ແຕ່ລະບົບອິນເຕີເນັດແລະການສື່ສານໂທລະສັບຍັງດຳເນີນໄປເປັນປົກກະຕິຢູ່.ກຸ່ມປະກອບອາວຸດຕໍ່ຕ້ານລັດຖະບານໄດ້ຄວບຄຸມເຂດສ່ວນຫຼາຍຂອງນະຄອນຫຼວງແລະເຂດຊານເມືອງ,ແລະໄດ້ຕັ້ງປ້ອມກວດກາຢ່າງຫຼວງຫຼາຍຢູ່ຕາມເສັ້ນທາງ,ຄົນສັນຈອນໄປມາຕ້ອງແຈ້ງບັດປະຈຳຕົວເພື່ອຮັບການກວດກາ.
