ເຈົ້າໜ້າທີ່ຈີນ-ອາຊຽນຮ່ວມກັນສົນທະນາກ່ຽວກັບອະນາຄົດອັນດີງາມຂອງການພົວພັນ ລະຫວ່າງສອງຝ່າຍ
(GMT+08:00) 2011-08-24 15:29:30 cri
ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ່ຟັງທີ່ໂຄລົບ.ຕອນຄ່ຳວັນທີ23ສີງຫາ ນີ້,ຢູ່ທີ່ປັກກິ່ງ,ກະຊວງການຕ່າງປະເທດຈີນແລະຄະນະກຳມະການອາຊຽນປະຈຳປັກກິ່ງທີ່ປະກອບດ້ວຍເອກອັກຄະລັດຖະທູດຈາກ10ປະເທດອາຊຽນປະຈຳຈີນໄດ້ຮ່ວມກັນຈັດ ງານລ້ຽງຮັບຮອງ,ເພື່ອລະລຶກວັນສ້າງຕັ້ງສາຍພົວພັນຄູ່ເຈລະຈາລະຫວ່າງຈີນກັບອາຊຽນ ຄົບຮອບ20ປີ.
ໃນງານລ້ຽງຮັບຮອງ,ທ່ານຫງວຽນວີງກວາງ,ອັກຄະລັດຖະທູດຫວຽດນາມປະຈຳຈີນໄດ້ຕີລາຄາສູງຕໍ່ການຂະຫຍາຍຕົວແຫ່ງການພົວພັນລະຫວ່າງຈີນກັບອາຊຽນໃນປະຈຸບັນນີ້. ທ່ານກ່າວວ່າ:"ປີນີ້ເປັນປີແຫ່ງການສ້າງຕັ້ງສາຍພົວພັນຄູ່ເຈລະຈາລະຫວ່າງຈີນກັບອາຊຽນຄົບຮອບ20ປີ,ຂ້າພະເຈົ້າເຫັນວ່າ,ນີ້ແມ່ນຂີດໝາຍສຳຄັນແຫ່ງການພົວພັນຈີນອາຊຽນ.ທົບທວນຄືນປະຫວັດສາດ20ປີທີ່ຜ່ານມາ,ພວກຂ້າພະເຈົ້າສາມາດເຫັນຢ່າງຈະແຈ້ງວ່າ,ໃນ20ປີມານີ້,ຈີນກັບອາຊຽນໄດ້ເລີ່ມຈາກການບໍ່ມີກົນໄກເຈລະຈາ,ບໍ່ມີການໄປ ມາຫາສູ່ກັນ,ບໍ່ມີຄວາມໄວ້ເນື້ອເຊື່ອໃຈເຊິ່ງກັນແລະກັນ,ຈົນກ້າວມາຮອດທຸກມື້ນີ້ທີ່ໄດ້ມີ ການສ້າງຕັ້ງກົນໄກການເຈລະຈາ,ໄດ້ຮັບໝາກຜົນຢ່າງເດັ່ນຊັດ."
ນັບຕັ້ງແຕ່ມີການສ້າງຕັ້ງສາຍພົວພັນຄູ່ເຈລະຈາລະຫວ່າງຈີນກັບອາຊຽນເປັນຕົ້ນມາ,ການຮ່ວມມືດ້ານເສດຖະກິດການຄ້າລະຫວ່າງສອງຝ່າຍໄດ້ຮັບຜົນສຳເລັດຢ່າງຫຼວງຫຼາຍ.ມູນຄ່າການຄ້າລະຫວ່າງສອງຝ່າຍໄດ້ມີເຖິງ300ຕື້ໂດລາ.ໃນງານລ້ຽງຮັບຮອງ,ທ່ານສູນີງນີງ,ຮອງເລຂາທິການປະຈຳການຂອງສະພາມົນຕີການຄ້າຈີນ-ອາຊຽນກ່າວວ່າ,ເຊື່ອໝັ້ນວ່າ,ທ່ວງທ່າການຮ່ວມມືລະຫວ່າງສອງຝ່າຍທີ່ຟົດຟື້ນ,ຮອບດ້ານແລະເລິກເຊິ່ງນັ້ນຈະໄດ້ຮັບການພັດທະນາຢ່າງຕໍ່ເນື່ອງ,ແລະຈະປະກົດມີອີກ4ຈຸດພິເສດໃໝ່.ທ່ານກ່າວວ່າ:"ຈຸດພິເສດອັນທີໜຶ່ງແມ່ນການຮ່ວມມືທີ່ມີການປະຕິບັດຕົວຈິງ.ຫຼາຍປີກ່ອນ, ຈີນກັບອາຊຽນໄດ້ຂະຫຍາຍການພົວພັນຮ່ວມມືດ້ວຍບາດກ້າວໃຫຍ່,ດຽວນີ້ມີຄວາມຮຽກຮ້ອງຕ້ອງການພວກຂ້າພະເຈົ້າປະຕິບັດຢ່າງແທ້ຈິງ;ອັນທີສອງແມ່ນການຮ່ວມມືທີ່ມີການປະດິດສ້າງ,ຍ້ອນວ່າມີການປ່ຽນແປງອັນໃໝ່ຢ່າງຫຼວງຫຼາຍ,ຈຶ່ງຕ້ອງການໃຫ້ພວກຂ້າພະເຈົ້າຕັ້ງໜ້າດຳເນີນການປະດິດສ້າງ;ອັນທີສາມແມ່ນການຮ່ວມມືຢ່າງຮອບດ້ານ;ສ່ວນຈຸດພິເສດໃໝ່ອັນທີສີ່ແມ່ນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ.ບົດຮຽນສຳຄັນອັນໜຶ່ງທີ່ໄດ້ມາຈາກການພັດທະນາການພົວພັນລະຫວ່າງສອງຝ່າຍໃນຫຼາຍປີມານີ້ກໍ່ແມ່ນ, ໄດ້ພິຈາລະນາເຖິງຄວາມສະດວກສະບາຍຂອງທັງສອງຝ່າຍຢ່າງເຕັມສ່ວນ."
ທ່ານນູຣາ ສວາຈາຢາ,ຜູ່ຕາງໜ້າພິເສດຂອງອິນໂດເນເຊຍປະຈຳອາຊຽນໄດ້ມີຄວາມປາ ຖະໜາຢ່າງແຮງກ້າຕໍ່ການແລກປ່ຽນລະຫວ່າງປະຊາຊົນສອງຝ່າຍ,ໂດຍສະເພາະແມ່ນຊາວໜຸ່ມຂອງຈີນແລະອາຊຽນ.ທ່ານກ່າວວ່າ:"ການແລກປ່ຽນລະຫວ່າງປະຊາຊົນສອງຝ່າຍແມ່ນສ່ວນປະກອບອັນສຳຄັນຂອງການຂະຫຍາຍການພົວພັນສອງຝ່າຍ.ພວກຂ້າພະເຈົ້າເຫັນວ່າ,ໄປອີກ10ຫາ20ປີ,ຊາວໜຸ່ມລຸ່ນນີ້ກໍ່ຈະກາຍເປັນເສົາຄ້ຳອັນສຳຄັນຂອງການຂະຫຍາຍການພົວພັນລະຫວ່າງອາຊຽນກັບຈີນແລ້ວ.ຖ້າວ່າພວກຂ້າພະເຈົ້າລົງມືເພີ່ມທະວີການແລກປ່ຽນໄປມາສູ່ກັນລະຫວ່າງຊາວໜຸ່ມສອງຝ່າຍເລີ່ມຈາກມື້ນີ້ເປັນຕົ້ນໄປ,ການພົວພັນລະຫວ່າງອາຊຽນກັບຈີນຈະມີອະນາຄົດທີ່ສົດໄສຂະໜາດໄດ."
