ຣັດເຊຍແລະສປປເກົາຫຼີຕົກລົງເຫັນດີຮ່ວມກັນກ່ຽວກັບແຜນການວາງທໍ່ສົ່ງອາຍແກັສທຳມະຊາດຂ້າມຊາຍແດນລະຫວ່າງສອງປະເທດ
(GMT+08:00) 2011-08-25 14:21:31 cri
ວັນທີ24ສິງຫານີ້,ທ່ານດີມີຕຼີ ເມັດເວເດັຟ ປະທານາທິບໍດີຣັດເຊຍໄດ້ພົບປະກັບທ່ານກິມເຈີ່ງອິນ ຜູ່ນຳສູງສຸດຂອງສປປເກົາຫຼີທີ່ໄປຢ້ຽມຢາມຣັດເຊຍ.ທັງສອງຝ່າຍໄດ້ມີຄວາມເຫັນເປັນເອກະສັນກັນກ່ຽວກັບການສ້າງຄະນະກຳມະການສາມຝ່າຍໃນໂຄງການວາງທໍ່ສົ່ງອາຍແກັສທຳມະຊາດຂອງຣັດເຊຍຜ່ານດິນແດນສປປເກົາຫຼີໄປສູ່ສ.ເກົາຫຼີ.
ພາຍຫຼັງການພົບປະເຈລະຈາກັນ,ທ່ານເມັດເວເດັຟໄດ້ຖະແຫຼງຕໍ່ສື່ມວນຊົນວ່າ,ທ່ານພ້ອມກັບທ່ານກິມເຈີ່ງອິນ ຜູ່ນຳສປປເກົາຫຼີໄດ້ມີຄວາມເຫັນເປັນເອກະສັນກັນກ່ຽວກັບການສ້າງຄະນະກຳມະການສາມຝ່າຍເພື່ອໂຄງການວາງທໍ່ສົ່ງອາຍແກັສທຳມະຊາດຂອງຣັດເຊຍຜ່ານດິນແດນສປປເກົາຫຼີໄປສູ່ສ.ເກົາຫຼີ.ພາກສ່ວນທີ່ກ່ຽວຂ້ອງຈະດຳເນີນວຽກງານທາງດ້ານເຕັກນິກໃນໄວໆນີ້.ທ່ານເມັດເວເດັຟຍັງເປີດເຜີຍໃຫ້ຮູ້ວ່າ,ທໍ່ສົ່ງອາຍແກັສທຳມະຊາດຈະມີຄວາມຍາວເຖິງ1100ກິໂລແມັດ,ໃນນັ້ນຄວາມຍາວຂອງທໍ່ສົ່ງແກັສສ່ວນຫຼາຍແມ່ນຢູ່ໃນດິນແດນສປປເກົາຫຼີ,ເຊິ່ງຈະສົ່ງອາຍແກັສທຳມະຊາດເຖິງ10ຕື້ແມັດກ້ອນຕໍ່ປີ.
ນອກນີ້,ຕາມຂ່າວສານອີຕາຕາສຂອງຣັດເຊຍລາຍງານວ່າ,ໃນເວລາພົບປະເຈລະຈາກັບທ່ານເມັດເວເດັຟ ,ທ່ານກິມເຈີ່ງອິນກ່າວວ່າ,ສປປເກົາຫຼີຈະກັບຄືນສູ່ການເຈລະຈາຫົກຝ່າຍກ່ຽວກັບບັນຫານີວເຄຼຍໃນແຫຼມເກົາຫຼີຢ່າງບໍ່ມີເງື່ອນໄຂແລະຈະແກ້ໄຂບັນຫາກ່ຽວກັບການຢຸດຕິເປັນການຊົ່ວຄາວໃນການທົດລອງແລະຜະລິດອາວຸດນີວເຄຼຍ.
ວັນທີ20ເດືອນນີ້,ທ່ານກິມເຈີ່ງອິນໄດ້ເລີ່ມຢ້ຽມຢາມຣັດເຊຍຢ່າງບໍ່ເປັນທາງການ,ນີ້ແມ່ນທ່ານຢ້ຽມຢາມຣັດເຊຍເປັນເທື່ອທີ3ໃນຮອບ10ປີມານີ້.
