ອາເມລິກາເປີດເຜີຍບົດລາຍງານສະບັບປະຈຳປີກ່ຽວກັບ"ການພັດທະນາດ້ານການທະຫານແລະຄວາມໝັ້ນຄົງທີ່ມີການພົວພັນກັບສາທາລະນະລັດປະຊາຊົນຈີນ"
(GMT+08:00) 2011-08-25 15:55:27 cri
ວັນທີ24ສິງຫານີ້, ກະຊວງປ້ອງກັນປະເທດອາເມລິກາໄດ້ເປີດເຜີຍບົດລາຍງານປະຈຳປີກ່ຽວກັບ"ການພັດທະນາດ້ານການທະຫານແລະຄວາມໝັ້ນຄົງທີ່ມີການພົວພັນກັບສາທາລະນະລັດປະຊາຊົນຈີນ"ໂດຍໄດ້, ຮັບຮອງແລະຊົມເຊີຍການປະກອບສ່ວນຂອງຈີນໃນວຽກງານຮັກສາຄວາມໝັ້ນຄົງສາກົນ. ແຕ່ພ້ອມກັນນັ້ນພັດບໍ່ໄດ້ເອົາໃຈໃສ່ນະໂຍບາຍປ້ອງກັນປະເທດທີ່ມີລັກສະນະປ້ອງກັນຕົວຂອງຈີນ, ພ້ອມທັງກ່າວວ່າອາເມລິກາຍັງບໍ່ແນ່ໃຈວ່າຈີນຈະນຳໃຊ້ຄວາມສາມາດດ້ານການປ້ອງກັນປະເທດທີ່ເພີ່ມໃໝ່ນັ້ນແນວໃດ.
ບົດລາຍງານກ່າວວ່າ, ຄຽງຄູ່ກັບເສດຖະກິດຈີນນັບມື້ນັບເຊື່ອມໂຍງເຂົ້າກັບເສດຖະກິດໂລກ,ຜົນປະໂຫຍດໃນການດຳເນີນການຮ່ວມມືກັບຈີນໄດ້ຮັບການເປີດກວ້າງອອກຢ່າງບໍ່ຢຸດຢັ້ງ. ອາເມລິກາເຫັນວ່າ,ເພີ່ມທະວີການພົວພັນທາງການທະຫານກັບຈີນມີຄວາມສຳຄັນຫຼາຍຕໍ່ການໃຊ້ໂອກາດການຮ່ວມມືແບບນີ້ຢ່າງເຕັມທີ່ແລະຫຼຸດຄວາມສ່ຽງຕ່າງໆ. ບົດລາຍງານຊີ້ອອກວ່າ, ລະດັບຄວາມໂປ່ງໃສຂອງຈີນໃນການເພີ່ມທະວີທາງດ້ານການທະຫານແລະບັນຫາຄວາມໝັ້ນຄົງໄດ້ຮັບການປັບປຸງຂຶ້ນສູ່ລະດັບສູງໃດໜຶ່ງແລ້ວ,ແຕ່ອາເມລິກາຍັງບໍ່ແນ່ໃຈວ່າຈີນຈະນຳໃຊ້ຄວາມສາມາດດ້ານການປ້ອງກັນປະເທດທີ່ເພີ່ມໃໝ່ນັ້ນແນວໃດ.
ໃນປີ2005, ຈີນໄດ້ເປີດເຜີຍປຶ້ມປົກຂາວທີ່ມີຫົວຂໍ້ວ່າ "ເສັ້ນທາງການພັດທະນາສັນຕິພາບຂອງຈີນ",ໄດ້ສະແດງໃຫ້ເຫັນຄວາມຕັ້ງໃຈໃນການເລືອກເຟ້ນແລະຄຳໝັ້ນສັນຍາທີ່ເຄັ່ງຂຶມຂອງລັດຖະບານແລະປະຊາຊົນຈີນໃນການພັດທະນາສັນຕິພາບ. ປຶ້ມປົກຂາວກ່ຽວກັບ"ວຽກງານການປ້ອງກັນປະເທດຂອງຈີນປີ2010"ໄດ້ເປີດເຜີຍໃນເດືອນມີນາຂອງປີນີ້, ຢັ້ງຢືນໃຫ້ເຫັນເຖິງຄວາມຕັດສິນໃຈທີ່ໜັກແໜ້ນຂອງຈີນໃນການຍຶດໝັ້ນເດີນຕາມເສັ້ນທາງການພັດທະນາສັນຕິພາບແລະປະຕິບັດຕາມນະໂຍບາຍປ້ອງກັນປະເທດທີ່ມີລັກສະນະປ້ອງກັນຕົວເອງ.
