ສັນນິບາດອາຣັບຍອມຮັບວ່າຝ່າຍຕໍ່ຕ້ານລັດຖະບານລີບີເປັນຜູ່ຕາງໜ້າທີ່ຊອບດ້ວຍກົດໝາຍຂອງລີບີ
(GMT+08:00) 2011-08-26 15:23:20 cri
ຄຽງຄູ່ກັບສະຖານະການໃນລີບີຂະຫຍາຍຕົວຢ່າງບໍ່ຢຸດຢັ້ງ,ທ່ານນາບິວ ເອລາບີ ເລຂາທິການໃຫຍ່ສັນນິບາດອາຣັບກ່າວໃນວັນທີ25ສິງຫານີ້ວ່າ,ສັນນິບາດອາຣັບຍອມຮັບວ່າຄະນະກຳມະການຊົ່ວຄາວແຫ່ງຊາດຂອງຝ່າຍຕໍ່ຕ້ານລັດຖະບານລີບີເປັນຜູ່ຕາງໜ້າທີ່ຊອບດ້ວຍກົດໝາຍພຽງຝ່າຍດຽວຂອງປະຊາຊົນລີບີ.
ທ່ານນາບິວ ເອລາບີ ກ່າວວ່າ, ຄະນະກຳມະການຊົ່ວຄາວແຫ່ງຊາດຈະສົ່ງຜູ່ແທນໄປເຂົ້າຮ່ວມກອງປະຊຸມລະດັບລັດຖະມົນຕີສັນນິບາດອາຣັບທີ່ຈະຈັດຂຶ້ນໃນວັນທີ27ສິງຫານີ້,ຮອດເວລານັ້ນ,ສັນນິບາດອາຣັບຈະຢຸດຕິການຍົກເລີກຄຸນວຸດທິຄວາມເປັນສະມາຊິກຂອງລີບີນັບຕັ້ງແຕ່ເດືອນກຸມພາປີນີ້ເປັນຕົ້ນມາ,ແລ້ວຟື້ນຟູບ່ອນນັ່ງຂອງລີບີຢູ່ສັນນິບາດອາຣັບ.
ພ້ອມດຽວກັນນັ້ນ,ໜ່ວຍງານຕິດຕໍ່ພັວພົນບັນຫາລີບີທີ່ປະກອບດ້ວຍຜູ່ຕາງໜ້າຈາກ28ປະເທດເຊັ່ນອັງກິດ,ອາເມລິກາ,ຝະຣັ່ງແລະ7ອົງການຈັດຕັ້ງສາກົນໄດ້ຈັດກອງປະຊຸມຢູ່ນະຄອນອິສຕັນບູນ ເມືອງໃຫຍ່ທີ່ສຸດຂອງຕວກກີໃນວັນທີ25ສິງຫານີ້ໂດຍກ່າວຢ້ຳວ່າຄະນະກຳມະການຊົ່ວຄາວແຫ່ງຊາດຂອງລີບີແມ່ນຜູ່ຕາງໜ້າພຽງຝ່າຍດຽວຂອງປະເທດລີບີແລະປະຊາຊົນລີບີ,ແລະປຶກສາຫາລືບັນຫາກ່ຽວກັບສະຖານະການແລະການຊ່ວຍເຫຼືອທາງດ້ານເສດຖະກິດແກ່ລີບີພາຍຫຼັງສົງຄາມ.
ພາຍຫຼັງກອງປະຊຸມ,ໜ່ວຍງານຕິດຕໍ່ພົວພັນດັ່ງກ່າວໄດ້ອອກຖະແຫຼງການວ່າ,ຜູ່ທີ່ຮ່ວມປະຊຸມເຫັນດີຍົກເລີກການອາຍັດຊັບສິນຂອງລັດຖະບານກັດດາຟີທີ່ຢູ່ຕ່າງປະເທດຈຳນວນ2ຕື້500ລ້ານໂດລາກ່ອນທ້າຍເດືອນສິງຫານີ້,ແລະມອບເງິນທຶນກ້ອນນີ້ໃຫ້ຄະນະກຳມະການຊົ່ວຄາວແຫ່ງຊາດລີບີ.ຖະແຫຼງການຍັງຮຽກຮ້ອງໃຫ້ສະຫະປະຊາຊາດເປັນຜູ່ນຳພາໃນການຈັດຕັ້ງປະຕິບັດວຽກງານການຊ່ວຍເຫຼືອລີບີພາຍຫຼັງສົງຄາມ.
ຕໍ່ເລື່ອງນີ້,ທ່ານອາເລັກຊັນເດີ ລູຄາເຊັນວິສ ໂຄສົກກະຊວງການຕ່າງປະເທດຣັດເຊຍກ່າວໃນວັນທີ25ສິງຫານີ້ວ່າ,ສະຫະປະຊາຊາດພ້ອມດ້ວຍສະພາຄວາມໝັ້ນຄົງຄວນເສີມຂະຫຍາຍບົດບາດນຳພາໃນການແກ້ໄຂບັນຫາລີບີ,ຫາກບໍ່ແມ່ນໜ່ວຍງານຕິດຕໍ່ພົວພັນບັນຫາລີບີຫຼືອົງການຈັດຕັ້ງອື່ນໆເປັນຜູ່ນຳພາ.ທ່ານລູຄາເຊັນວິສຍັງກ່າວວ່າ,ສະຖານະການຢູ່ລີບີຍັງບໍ່ຈະແຈ້ງເທື່ອ,ປະຈຸບັນ,ມັນຍັງໄວເກີນໄປທີ່ຈະເວົ້າວ່າສະຖານະການຢູ່ລີບີໄດ້ພິກປີ້ນຢ່າງເຖິງຖອງແລ້ວ.
