ຫຼາຍປະເທດອາຊີອາຄະເນພິຈາລະນາປັບປຸງນະໂຍບາຍເງິນເດືອນຂັ້ນຕ່ຳສຸດ
(GMT+08:00) 2011-08-26 17:43:07 cri
ຫວ່າງມໍ່ໆນີ້,ທ່ານວາງຈີ້ຢວນ,ຫົວໜ້າກົມໄທ,ກຳປູເຈຍແລະລາວຂອງອົງການແຮງງານສາກົນກ່າວວ່າ:"ຫຼາຍປະເທດອາຊີທີ່ເປັນຕະຫຼາດຈະເລີນໃໝ່ນັ້ນພວມພິຈາລະນາການຍົກສູງເງິນເດືອນ." ລາວ,ໄທ,ຫວຽດນາມ,ມະເລເຊຍແລະກຳປູເຈຍລ້ວນແຕ່ໄດ້ທາບທາມເຖິງນະໂຍບາຍທີ່ກ່ຽວຂ້ອງນຳກົມອາຊີປາຊິຟິກຂອງອົງການແຮງງານສາກົນແລ້ວ.ຫວ່າງກ່ອນນີ້ບໍ່ດົນ,ໜັງສືພິມ"International Herald Tribune"ຂອງອາເມລິກາ ລາຍງານວ່າ,ໃນ10ປີທີ່ຜ່ານມາ,ຫຼາຍປະເທດແລະເຂດແຄ້ວນຂອງອາຊີໄດ້ນຳເຂົ້າລະບົບ ເງິນເດືອນຕ່ຳສຸດ,ເພື່ອໄລ່ໃຫ້ທັນບາດກ້າວຂອງເຂດແຄ້ວນອື່ນໆໃນໂລກໃນດ້ານຮັບປະກັນລາຍໄດ້ຕ່ຳສຸດຂອງຜູ່ອອກແຮງງານ.
ການຄົ້ນຄວ້າຂອງອົງການແຮງງານສາກົນສະແດງໃຫ້ເຫັນວ່າ,ໃນ10ປີທີ່ຜ່ານມາ,ຖ້າວ່າ ປຽບທຽບລະດັບເງິນເດືອນກັບສະມັດຕະພາບການຜະລິດຈະເຫັນໄດ້ວ່າ,ສະມັດຕະພາບການຜະລິດຂອງເຂດອາຊີເຕີບໂຕຢ່າງວ່ອງໄວ,ແຕ່ອັດຕາການເພີ່ມຂຶ້ນຂອງເງິນເດືອນພັດບໍ່ສົມຄູ່ກັນ.ນອກນີ້,ລະດັບເງິນເດືອນຕ່ຳສຸດຂອງບາງປະເທດກໍ່ບໍ່ໄລ່ທັນກັບການເຕີບໂຕຂອງອັດຕາເງິນເຟີ້.ນີ້ສະແດງໃຫ້ເຫັນວ່າ,ໃນການແບ່ງປັນຂອງສັງຄົມ,ເງິນເດືອນຂອງຜູ່ອອກແຮງງານຍັງຮັກສາຢູ່ສະພາບການເຕີບໂຕຊ້າເປັນເວລາຍາວນານ.ພ້ອມກັນ ນັ້ນ,ລາຍໄດ້ຂອງຜູ່ຄົນທີ່ມີລາຍໄດ້ຕ່ຳກັບລາຍໄດ້ຂອງຜູ່ຄົນທີ່ມີລາຍໄດ້ສູງໄດ້ຜິດໂຕນກັນນັບມື້ນັບຫຼາຍ.ທ່ານວາງຈີ້ຢວນກ່າວວ່າ:"ຖ້າວ່າສະພາບການແບບນີ້ແກ່ຍາວຕໍ່ໄປອີກເປັນເວລາຍາວນານ,ແມ່ນບໍ່ມີຜົນດີຕໍ່ການພັດທະນາເສດຖະກິດສັງຄົມ ຂອງປະເທດໃດໜຶ່ງ."
ຫຼາຍປະເທດໄດ້ຮັບຮູ້ບັນຫານີ້ຢ່າງຈະແຈ້ງ.ແຕ່ວ່າ,ການປັບປຸງນະໂຍບາຍເງິນເດືອນມັກກາຍເປັນຈຸດສຸມຂອງສັງຄົມ,ຈະພາໃຫ້ເກີດມີການເວົ້າພິພາກວິຈານກັນຢ່າງກວ້າງຂວາງ.ໃນເວລາເຂົ້າຮ່ວມການແຂ່ງຂັນການເລືອກຕັ້ງ,ພັກເພື່ອໄທຂອງໄທທີ່ນຳພາໂດຍນາງຍິ່ງລັກ ຊິນນະວັດຊີ້ອອກວ່າ,ຈະຍົກສູງເງິນລາຍໄດ້ຕ່ຳສຸດໃຫ້ຂຶ້ນເປັນ300ບາດຕໍ່ມື້.ນີ້ສູງກວ່າເງິນລາຍໄດ້ຕ່ຳຕໍ່ມື້ຂອງຈັງຫວັດຕ່າງໆຂອງໄທໃນປະຈຸບັນນີ້40%,ເຊິ່ງໄດ້ຖືກວົງການອຸດສາຫະກຳການຄ້າຂອງໄທຄັດຄ້ານ.ບົດຄົ້ນຄວ້າຂອງສະພາອຸດສາຫະກຳການຄ້າຂອງໄທກ່າວວ່າ,ຖ້າວ່າປະຕິບັດນະໂຍບາຍນີ້,ມີວິສາຫະກິດໄທ1ແສນຫາ2ແສນແຫ່ງຈະລົ້ມລະລາຍພາຍໃນ3ເດືອນ.
ສະຫຼຸບແລ້ວເຫັນໄດ້ວ່າ,ຄົນສ່ວນຫຼາຍມີຄວາມເປັນຫ່ວງສາມຢ່າງຕໍ່ການຍົກສູງເງິນເດືອນຕ່ຳສຸດ,ຄື:ເປັນຫ່ວງວ່າຈະພາໃຫ້ເກີດໄພເງິນເຟີ້;ຢ້ານວ່າຕົ້ນທຶນຄ່າແຮງງານຖືກຍົກສູງຂຶ້ນຈະມີຜົນກະທົບຕໍ່ກຳລັງແກ່ງແຍ່ງຂອງວິສາຫະກິດ;ແລະເປັນຫ່ວງວ່າຈະມີຜົນກະທົບຕໍ່ກຳລັງແກ່ງແຍ່ງຂອງປະເທດໃດໜຶ່ງໃນບາງຂະແໜງການຫຼືບາງຂົງເຂດໃນຕະຫຼາດສາກົນ.
ທ່ານວາງຈີ້ຢວນເຫັນວ່າ: "ອີງຕາມການຄົ້ນຄວ້າຂອງອົງການແຮງງານສາກົນ,ເວົ້າສຳ ລັບໄທແລະບາງປະເທດອາຊີອາຄະເນ,ຄວາມເປັນຫ່ວງສາມຢ່າງນັ້ນແມ່ນບໍ່ຈຳເປັນ.ສາເຫດຕົ້ນຕໍທີ່ພາໃຫ້ປະເທດຕະຫຼາດຈະເລີນໃໝ່ໃນອາຊີເກີດໄພເງິນເຟີ້ນັ້ນບໍ່ແມ່ນເງິນເດືອນ,ມັນຫາກແມ່ນປັດໄຈດ້ານອື່ນໆ,ໂດຍສະເພາະແມ່ນຍ້ອນວ່າລາຄານ້ຳມັນດິບແລະລາຄາວັດຖຸດິບທີ່ສຳຄັນແພງຂຶ້ນ.ນອກນີ້,ເຖິງແມ່ນວ່າເງິນເດືອນຂອງຜູ່ອອກແຮງງານຈະເພີ່ມຂຶ້ນດ້ວຍຄວາມໄວສູງ,ກໍ່ຈະບໍ່ມີຜົນກະທົບຕໍ່ສະເໜ່ຂອງເຂດອາຊີທີ່ມີຕໍ່ການລົງທຶນ ຂອງຕ່າງປະເທດ."
ຫວ່າງມໍ່ໆນີ້,ໜັງສືພິມແຟແນນໂຊແທັມສ໌ພິມບົດຄວມຊີ້ອອກວ່າ,ໃນກໍລະນີທີ່ອົງກອນເສດຖະກິດທີ່ໄດ້ພັດທະນາແລ້ວຂອງຕາເວັນຕົກຕົກຢູ່ໃນວິກິດການການເງິນ,ປະເທດອາຊີອາຄະເນຕ້ອງຫັນປ່ຽນຮູບການພັດທະນາເສດຖະກິດທີ່ຖືການສົ່ງອອກສິນຄ້າເປັນຫຼັກ,ຄວນກະຕຸ້ນຄວາມຮຽກຮ້ອງຕ້ອງການພາຍໃນປະເທດຢ່າງແຂງແຮງກວ່າເກົ່າ,ໂດຍສະເພາະ ແມ່ນຄວາມຮຽກຮ້ອງຕ້ອງການດ້ານການບໍລິໂພກ.ເງິນເດືອນເພີ່ມຫຼາຍຂຶ້ນ,ແມ່ນຂໍກະແຈແຫ່ງການເພີ່ມຄວາມຮຽກຮ້ອງຕ້ອງການທັງໝົດຂອງສັງຄົມ,ກະຕຸ້ນການບໍລິໂພກພາຍໃນປະເທດແລະຊຸກຍູ້ໃຫ້ເສດຖະກິດເຕີບໂຕ.
ເວົ້າລວມແລ້ວ,ນະໂຍບາຍເງິນເດືອນຕ່ຳສຸດຄວນປະຕິບັດໄປຄຽງຄູ່ກັບກັບນະໂຍ ບາຍທີ່ກ່ຽວຂ້ອງ.ໃນຂະນະທີ່ໃຫ້ຜູ່ນຳໃຊ້ແຮງງານຍົກສູງເງິນເດືອນຂອງຜູ່ອອກແຮງງານ,ກໍ່ຄວນໃຫ້ເຂົາເຈົ້າໄດ້ຮັບການຝຶກອົບຮົມຕື່ມອີກເພື່ອເປັນການຍົກສູງສີມືແຮງງານແລະ ສະມັດຕະພາບການຜະລິດ.ເວົ້າສຳລັບວິສາຫະກິດຂະໜາດກາງແລະນ້ອຍທີ່ຖືກຜົນກະທົບອ່າວຫຼາຍຍ້ອນຍົກສູງເງິນເດືອນຕ່ຳສຸດນັ້ນ,ລັດຖະບານຄວນຫຼຸດລະດັບການເສຍພາສີອາກອນຂອງເຂົາເຈົ້າແລະເພີ່ມຊ່ອງທາງໃນການເຂົ້າເຖິງແຫຼ່ງເງິນທຶນໃຫ້ເຂົາເຈົ້າໄດ້ກູ້ຢືມ,ເພື່ອຫຼຸດຜ່ອນແຮງກົດດັນຕໍ່ເຂົາເຈົ້າທີ່ມາຈາກການປັບຂຶ້ນເງິນເດືອນຂອງຜູ່ອອກແຮງງານ.
