ຝ່າຍຕໍ່ຕ້ານລັດຖະບານລີບີກ່າວວ່າທ່ານກັດດາຟີຍັງເປັນໄພຂົ່ມຂູ່ຢູ່ ຄອບຄົວຂອງທ່ານກັດດາຟີພັດຖິ່ນໄປຮອດອານເຊຣີ
(GMT+08:00) 2011-08-30 16:57:32 cri
ວັນທີ29ສິງຫານີ້, ທ່ານມຸສຕາຟາ ອັບດຸນ ເຈລິນ, ປະທານຄະນະກຳມະການຊົ່ວຄາວແຫ່ງຊາດຂອງຝ່າຍຕໍ່ຕ້ານລັດຖະບານລີບີກ່າວວ່າ, ທ່ານກັດດາຟີຍັງເປັນໄພຂົ່ມຂູ່ຕໍ່ປະເທດລີບີຈົນກະທັ້ງທົ່ວໂລກ, ແລະຮຽກຮ້ອງໃຫ້ນາໂຕດຳເນີນການເຄື່ອນໄຫວທາງທະຫານຢູ່ລີບີອີກຕໍ່ໄປ.
ທ່ານຈາລິນໄດ້ກ່າວຄວາມເວົ້າດັ່ງກ່າວຢູ່ໃນກອງປະຊຸມລັດຖະມົນຕີປ້ອງກັນປະເທດຂອງປະເທດຕ່າງໆທີ່ເຂົ້າຮ່ວມການເຄື່ອນໄຫວທາງທະຫານຢູ່ລີບີ, ເຊິ່ງກອງປະຊຸມດັ່ງກ່າວຈັດຂຶ້ນຢູ່ນະຄອນຫຼວງໂດຮາຂອງກາຕາໃນວັນທີ29ສິງຫານີ້. ກ່ຽວກັບເລື່ອງນີ້, ທ່ານຊາມຸເອັນ ລອກເລຍ, ພົນເອກທະຫານເຮືອອາເມລິກາທັງເປັນຜູ້ບັນຊາການກອງທະຫານນາໂຕໃນລີບີກ່າວວ່າ, ການເຄື່ອນໄຫວທາງທະຫານຂອງນາໂຕຢູ່ລີບີຢ່າງໜ້ອຍຈະດຳເນີນໄປຮອດວັນທີ27ເດືອນກັນຍາໜ້ານີ້.
ພ້ອມກັນນັ້ນ, ວັນທີ29ສິງຫານີ້, ສະຫະພາບອາຟຼິກາຮຽກຮ້ອງໃຫ້ລີບີຢຸດຕິການປະທະກັນດ້ວຍກຳລັງອາວຸດໂດຍໄວ, ແລະກ່າວວ່າສະຫະພາບອາຟຼິກາໄດ້ກຽມພ້ອມແລ້ວທີ່ຈະຮັບເອົາລັດຖະບານຊົ່ວຄາວລີບີເຂົ້າແທນບ່ອນນັ່ງຂອງອຳນາດການປົກຄອງເກົ່າໃນສະຫະພາບອາຟຼິກາ.
ມື້ດຽວກັນ, ກະຊວງການຕ່າງປະເທດອານເຊຣີອອກປະກາດແຈ້ງການວ່າ, ພັນລະຍາ, ພ້ອມດ້ວຍລູກສາວແລະລູກຊາຍສອງຄົນຂອງທ່ານກັດດາຟີພ້ອມດ້ວຍລູກຂອງເຂົາເຈົ້າໄດ້ຜ່ານຊາຍແດນເຂົ້າໃນດິນແດນອານເຊຣີແລ້ວ.
