ມາຮອດວັນທີ30ສິງຫານີ້,ດາວທຽມ"ສາງເອີເລກ2"ຊຶ່ງເປັນດາວທຽມສຳຫຼວດດວງຈັນໜ່ວຍທີສອງຂອງຈີນໄດ້ບິນອ້ອມຈຸດລາເກຼນຈຽນL2ຢ່າງໝັ້ນທ່ຽງເປັນເວລາເກືອບ5ວັນແລ້ວ,ຄາດວ່າໃນວັນທີ1ກັນຍາໜ້ານີ້,ດາວທຽມ"ສາງເອີເລກ2"ພ້ອມກັບຕາເວັນ,ໜ່ວຍໂລກແລະ ຈຸດລາເກຼນຈຽນL2ຈະຢູ່ໃນໜ້າພຽງອັນດຽວກັນ.ນີ້ໝາຍຄວາມວ່າ,ຈີນກາຍເປັນປະເທດທີ3ໃນໂລກທີ່ສົ່ງດາວທຽມໄປເຖິງຈຸດ ລາເກຼນຈຽນL2ເຊິ່ງຮອງຈາກກົມອະວະກາດເອີລົບແລະອາເມລິກາ.
ຕາມການອອກແບບແລ້ວ , ດາວທຽມ"ສາງເອີເລກ2" ໄດ້ເຕັມອາຍຸໃຊ້ການເປັນເຄິ່ງປີໃນວັນທີ1ເມສາປີນີ້,ໂດຍໄດ້ປະຕິບັດເປົ້າໝາຍໂຄງການແລະສຳຫຼວດທາງດ້ານວິທະຍາສາດທຸກລາຍການມີຜົນສຳເລັດຢ່າງຈົບງາມ.ເນື່ອງຈາກວ່າທາວດຽມ"ສາງເອີເລກ2"ຍັງມີວັດຖຸເຊື້ອໄຟຢ່າງຫຼວງຫຼາຍ,ບັນດານັກວິທະຍາສາດຈິ່ງຕັດສິນໃຈໃຫ້ດາວທຽມໜ່ວຍນີ້ປະຕິບັດໜ້າທີ່ການທົດລອງແບບບຸກເບີກຫຼາຍກວ່າເກົ່າ.ວັນທີ9ມິຖຸນາຜ່ານມາ,ດາວທຽມ"ສາງເອີເລກ2"ໄດ້ບິນອອກຈາກດວງຈັນພາຍໃຕ້ການບັນຊາຄວບຄຸມ,ພາຍຫຼັງບິນໄດ້77ວັນແລ້ວ,ເວລາ23ໂມງ27ນາທີຂອງວັນທີ25ສິງຫານີ້,ດາວທຽມ"ສາງເອີເລກ2"ໄດ້ເຄື່ອນຕົວອອກຈາກວົງໂຄຈອນຂອງດວງຈັນຊຶ່ງເປັນເທື່ອທຳອິດໃນໂລກ,ແລ້ວເຂົ້າສູ່ວົງໂຄຈອນຂອງ ຈຸດລາເກຼນຈຽນL2ທີ່ເປັນຈຸດດຸນດ່ຽງທາງດ້ານແຮງດຶງດູດລະຫວ່າງດວງຕາເວັນແລະໜ່ວຍໂລກຊຶ່ງຈຸດນີ້ຫ່າງຈາກໜ່ວຍໂລກປະມານ1ລ້ານ5ແສນກິໂລແມັດ.
ຜົນສຳເລັດ ຂອງດາວທຽມ"ສາງເອີເລກ2"ໃນການທົດລອງແບບບຸກເບີກໄດ້ເຮັດໃຫ້ໄລຍະການບິນອະວະກາດຂອງຈີນຈາກ4ແສນກິໂລແມັດໃນເມື່ອກ່ອນເພີ່ມຂຶ້ນເປັນ1ລ້ານ5ແສນກິໂລແມັດໃນປະຈຸບັນຊຶ່ງເປັນການພັດທະນາແບບກ້າວກະໂດດ.
