ວັນທີ29ສິງຫານີ້, ຢູ່ນະຄອນຫຼວງປັກກິ່ງ ໃນເວລາຕ້ອນຮັບທ່ານນາເຊີທີ່ໄດ້ຮັບເລືອກຕັ້ງເປັນປະທານກອງປະຊຸມສະຫະປະຊາຊາດຄັ້ງທີ66,ທ່ານຊີຈິ້ນຜິງ, ຮອງປະທານປະເທດຈີນກ່າວເນັ້ນວ່າ,ຈີນເດັດດ່ຽວສະໜັບສະໜູນສະຫະປະຊາຊາດໃຫ້ປະກອບສ່ວນເຂົ້າໃນວຽກງານສາກົນໃຫ້ຫຼາຍກວ່າເກົ່າ,ເພື່ອເສີມຂະຫຍາຍບົດບາດນຳໜ້າໃນບັນຫາລີບີແລະອື່ນໆ,ປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນການປົກປັກຮັກສາສັນຕິພາບແລະຄວາມໝັ້ນຄົງຢູ່ໃນໂລກແລະພາກພື້ນ.
ທ່ານຊີຈິ້ນຜິງຊີ້ອອກວ່າ, ສະຖານະການສາກົນໃນປະຈຸບັນມີການປ່ຽນແປງໄປຢ່າງສັບສົນແລະເລິກເຊິ່ງ. ບັນຫາທົ່ວໂລກນັບມື້ນັບພົ້ນເດັ່ນຂຶ້ນ,ຕະຫຼາດການເງິນທົ່ວໂລກເກີດມີຄວາມປັນປ່ວນອັນໃໝ່. ຫວ່າງມໍ່ໆມານີ້, ສະຖານະການຢູ່ເຂດອາຊີຕາເວັນຕົກແລະອາຟຼກິກາເໜືອເຮັດໃຫ້ພວກເຮົາມີຄວາມເປັນຫ່ວງຫຼາຍ, ສັນຕິພາບແລະສະຖຽນລະພາບຢູ່ເຂດຕາເວັນອອກກາງໄດ້ປະເຊີນກັບການທົດສອບທີ່ເຄັ່ງຂຶມ. ຈີນຈະຕັ້ງໜ້າເຂົ້າຮ່ວມວຽກງານຂອງສະຫະປະຊາຊາດເໝືອນດັ່ງທີ່ຜ່ານມາ,ພ້ອມທັງສືບຕໍ່ສະໜັບສະໜູນວຽກງານຂອງສະຫະປະຊາຊາດແລະປະທານສະມັດຊາໃຫຍ່ສະຫະປະຊາຊາດຢ່າງຕັ້ງໜ້າ.
ທ່ານນາເຊີກ່າວວ່າ, ທ່ານຈະພະຍາຍາມຊຸກຍູ້ການແກ້ໄຂບັນຫາຄວາມປອດໄພດ້ານສະບຽງອາຫານ,ການຫຼຸດຜ່ອນຄວາມທຸກຍາກ,ການປະທະກັນດ້ວຍກຳລັງອາວຸດ,ການປ່ຽນແປງຂອງດິນຟ້າອາກາດແລະບັນຫາອື່ນໆ. ທ່ານຍັງກ່າວວ່າ,ຫວັງໃຫ້ຈີນເດັດດ່ຽວສືບຕໍ່ສະໜັບສະໜູນແນວຄິດແບບຫຼາຍຝ່າຍ,ແລະສະຫະປະຊາຊາດຈະເພີ່ມທະວີການຮ່ວມມືກັບຈີນໃຫ້ຫຼາຍຂຶ້ນຕື່ມອີກ.
