ຢາກເປັນເພື່ອນມິດຂອງລີບີຫຼືວ່າຢາກໄດ້ນ້ຳມັນເຊື້ອໄຟຂອງລີບີ?
(GMT+08:00) 2011-09-05 17:34:30 cri
ເຖິງວ່າ"ສົງຄາມປ້ອງກັນຕຼີໂປລີ"ສິ້ນສຸດລົງດ້ວຍວິທີທີ່ນອກເໜືອຈາກຄວາມຄາດຄະເນຂອງບັນດານັກວິເຄາະ,ແລະນະຄອນຫຼວງຂອງລີບີກໍ່ໄດ້ກາຍເປັນທີ່ຕັ້ງສຳນັກງານໃຫຍ່ຂອງ"ຄະນະກຳມະການຂ້າມຜ່ານແຫ່ງຊາດ"ຂອງຝ່າຍຕໍ່ຕ້ານລັດຖະບານລີບີແລ້ວກໍ່ຕາມ.ແຕ່ວ່າ,ເສິກສົງ ຄາມຢູ່ລີບີ,ທີ່ເປັນປະເທດທະເລຊາຍນີ້ຍັງບໍ່ໄດ້ສິ້ນສຸດລົງຢ່າງແທ້ຈິງ.ໃນຂະນະດຽວກັນນີ້,ຢູ່ປາຣີຂອງຝະຣັ່ງ,ເສິກສົງຄາມຄັ້ງໃໝ່ທີ່ປິ່ນອ້ອມຜົນປະໂຫຍດດ້ານນ້ຳມັນເຊື້ອໄຟຂອງລີບີກໍ່ໄດ້ເລີ່ມຕົ້ນຂຶ້ນແລ້ວ.ວັນທີ1ກັນຍານີ້,ຝະຣັ່ງໄດ້ເຊີນຜູ່ແທນຈາກ60ກວ່າປະເທດແລະອົງການສາ ກົນມາເຂົ້າຮ່ວມກອງປະຊຸມສາກົນທີ່ຊື່ວ່າ"ເພື່ອນມິດຂອງລີບີ",ປຶກສາຫາລືກ່ຽວກັບເຮັດແນວໃດເພື່ອຊ່ວຍເຫືອລີບີໃນການສ້າງຕັ້ງລັດຖະບານປົກຄອງປະເທດແລະການພັດທະນາເສດຖະກິດຄືນໃໝ່ຫຼັງສົງຄາມ.
ການພັດທະນາຄືນໃໝ່ເຖິງວ່າແມ່ນວຽກທີ່ລີບີຕ້ອງເຮັດກໍ່ຕາມ,ແຕ່ການສ້າງສາລີບີຄືນໃໝ່ຫຼັງ ສົງຄາມພັດພົວພັນເຖິງຂໍ້ຜູກພັນທີ່ມີມູນຄ່າອັນມະຫາສານທາງດ້ານການຂຸດຄົ້ນນ້ຳມັນເຊື້ອໄຟແລະກໍ່ສ້າງພື້ນຖານໂຄງລ່າງ,ອາດເວົ້າໄດ້ວ່າມັນມີກຳໄລຢ່າງຫຼວງຫຼາຍ.
ໃນສົງຄາມລີບີຄັ້ງນີ້,ປະເທດເອີຣົບເປັນຕົວລະຄອນທີ່ສຳຄັນ,ແລະກໍ່ກຽມ"ຫາບແບກໜ້າທີ່ອັນໜັກໜາ"ໃນການສ້າງສາລີບີຄືນໃໝ່ຫຼັງສົງຄາມ.ໃນກອງປະຊຸມປາຣີ,ທ່ານນິໂຄລັສ ຊາໂຄຊີ,ປະທານາທິບໍດີຝະຣັ່ງກ່າວວ່າ: "ລີບີຕິດກັບທະເລເມດີເຕຣາເນ,ວຽກກ່ຽວກັບທະເລເມດີເຕຣາເນກ່ອນອື່ນແມ່ນວຽກຂອງເອີຣົບ,ຖັດມາຈຶ່ງແມ່ນວຽກຂອງອາເມລິກາ".ເຖິງຈະເປັນແນວນີ້ກໍ່ ຕາມ,ອາເມລິກາທີ່ເປັນຫົວໂປ່ຂອງອົງການນາໂຕນັ້ນພັດບໍ່ຍອມນັ່ງຢູ່ທາງຫຼັງໃນການສ້າງສາລີບີຄືນໃໝ່,ສະນັ້ນ,ຈຶ່ງໄດ້ສົ່ງຄະນະຜູ່ແທນລະດັບສູງທີ່ມີນາງຮິວລາຣີ ຄຼິນຕັນ,ລັດຖະມົນຕີການຕ່າງປະເທດເປັນຫົວໜ້າຄະນະເຂົ້າຮ່ວມກອງປະຊຸມຄັ້ງນີ້.
ຍ້ອນມີຜົນປະໂຫຍດຢ່າງມະຫາສານ,ບາງປະເທດຊຶ່ງເມື່ອກ່ອນບໍ່ເຫັນດີນຳໃນການໃຊ້ກຳລັງອາວຸດຕໍ່ລີບີນັ້ນ,ກໍ່ເລີ່ມຫັນປ່ຽນທ່າທີແລະມີຄວາມສົນໃຈຕໍ່ບັນຫາລີບີຫຼາຍຂຶ້ນ.ເຢຍລະມັນໄດ້ໃຫ້ຄຳໝັ້ນສັນຍາວ່າຈະສະໜອງເງິນກູ້ລັກສະນະຂ້າມຜ່ານ100ລ້ານເອີໂຣໃຫ້ແກ່ຄະນະກຳມະການຂ້າມຜ່ານແຫ່ງຊາດລີບີ.ສ່ວນຣັດເຊຍກໍ່ໄດ້ຮັບຮອງ"ຄະນະກຳມະການຂ້າມຜ່ານແຫ່ງຊາດ"ຂອງລີບີໃນວັນທີ1ກັນຍານີ້.
