ທ່ານຫູຈິນທາວຮຽກຮ້ອງໃຫ້ຊຸກຍູ້ການພັດທະນາແລະການຮ່ວມມືໃນຂະແໜງການປ່າໄມ້ຂອງພາກພື້ນອາຊີປາຊີຟິກ
(GMT+08:00) 2011-09-06 17:39:01 cri
ກອງປະຊຸມລະດັບລັດຖະມົນຕີປ່າໄມ້ຄັ້ງທຳອິດຂອງອົງການຮ່ວມມືທາງດ້ານເສດຖະກິດອາຊີປາຊີຟິກຫຼືAPECໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ6ກັນຍານີ້.ທ່ານຫູຈິນທາວ ປະທານປະເທດຈີນໄດ້ກ່າວຄຳປາໃສໃນພິທີໄຂກອງປະຊຸມໂດຍຊີ້ອອກວ່າ,ປ່າໄມ້ມີບົດບາດສຳຄັນໃນການຊຸກຍູ້ການເຕີບໂຕແບບອະນຸລັກສິ່ງແວດລ້ອມຫຼືການເຕີບໂຕແບບສີຂຽວ,ການຮ່ວມມືໃນຂະແໜງການປ່າໄມ້ຂອງອົງການອາເປັກມີກຳລັງແຮງບົ່ມຊ້ອນອັນມະຫາສານແລະມີອະນາຄົດອັນສົດໃສແລະກວ້າງຂວາງ.ທ່ານຫູຈິນທາວສະເໜີໃຫ້ບັນດາປະເທດອາຊີປາຊີຟິກເພີ່ມທະວີການພັດທະນາປ່າໄມ້,ຈັດເອົາການພັດທະນາປ່າໄມ້ເຂົ້າໃນແຜນແມ່ບົດແຫ່ງການພັດທະນາເສດຖະກິດສັງຄົມ,ເສີມຂະຫຍາຍປະສິດທິຜົນຫຼາຍຢ່າງຂອງປ່າໄມ້ໃນການພັດທະນາເສດຖະກິດ,ສັງຄົມ,ຊີວະຊາດ,ວັດທະນະທຳແລະອື່ນໆ,ຕັ້ງໜ້າເຂົ້າຮ່ວມການປຶກສາຫາລືແລະສົນທະນາກັນກ່ຽວກັບບັນຫາປ່າໄມ້ຂອງໂລກ,ເພີ່ມທະວີການສະໜັບສະໜູນຕໍ່ບັນດາປະເທດສະມາຊິກທີ່ພວມພັດທະນາ.
ທ່ານຫູຈິນທາວກ່າວເນັ້ນວ່າ,ຈີນຈະສືບຕໍ່ເລັ່ງລັດການພັດທະນາປ່າໄມ້,ພະຍາຍາມເຮັດໃຫ້ເນື້ອທີ່ປ່າໄມ້ໃນປີ2020ເພີ່ມຂຶ້ນ40ລ້ານເຮັກຕາເມື່ອທຽບໃສ່ປີ2005,ບໍລິມາດໄມ້ໃນປ່າເພີ່ມຂຶ້ນ1ຕື້300ລ້ານແມັດກ້ອນເມື່ອທຽບໃສ່ປີ2005ເພື່ອປະກອບສ່ວນອັນໃໝ່ເຂົ້າໃນການເຕີບໂຕແບບສີຂຽວແລະການພັດທະນາແບບຍືນຍົງ.
