ປະເທດສາທາລະນະລັດນີເຊປະກົດມີກຳລັງທະຫານທ່ານກັດດາຟີ,ນາໂຕກ່າວເນັ້ນວ່າຈະບໍ່ຕິດຕາມນຳຈັບທ່ານກັດດາຟີພ້ອມດ້ວຍກອງທະຫານທີ່ຈົງຮັກພັກດີຂອງທ່ານ
(GMT+08:00) 2011-09-07 16:39:09 cri
ຄຽງຄູ່ກັບການຂະຫຍາຍຕົວຂອງສະຖານະການຢູ່ລີບີ,ບ່ອນລີ້ຕົວຂອງທ່ານກັດດາຟີ ຜູ່ນຳລີບີເປັນປິດສະໜາມາໂດຍຕະຫຼອດ.ຂ່າວສານລອຍເຕີໄດ້ອີງໃສ່ແຫຼ່ງຂ່າວຂອງເຈົ້າໜ້າທີ່ ທະຫານຂອງຝະຣັ່ງແລະນີເຊລາຍງານໃນວັນທີ6ກັນຍານີ້ວ່າ, ຂະບວນລົດທະຫານຈຳນວນ200ກວ່າຄັນຂອງກອງທັບທ່ານກັດດາຟີໄດ້ເດີທາງເຂົ້າສູ່ເມືອງອາກາເດສ ທາງພາກເໜືອຂອງສາທາລະນະລັດນີເຊໃນວັນທີ5ກັນຍານີ້.
ປະຈຸບັນ,ຍັງບໍ່ຮູ້ລະອຽດເທື່ອວ່າໃນຂະບວນລົດນີ້ມີສະມາຊິກວົງກະຕຸນຂອງທ່ານກັດດາຟີຫຼືເຈົ້າໜ້າທີ່ລະດັບສູງຂອງອຳນາດການປົກຄອງກັດດາຟີຫຼືບໍ່?ສະຖານີໂທລະພາບອັນຈາຊີລາໄດ້ອີງໃສ່ແຫຼ່ງຂ່າວຂອງເຈົ້າໜ້າທີ່ທະຫານຝະຣັ່ງລາຍງານວ່າ,ທ່ານກັດດາຟີພ້ອມດ້ວຍທ່ານຊາອິຟ ລູກຊາຍຂອງທ່ານອາດຈະ ເຂົ້າຮ່ວມຂະບວນລົດດັ່ງກ່າວຢູ່ກາງທາງເພື່ອເດີນທາງໄປບູກີນາຟາໂຊທີ່ເປັນປະເທດໃກ້ຄຽງຂອງນີເຊ,ສ່ວນລັດຖະບານບູກີນາຟາໂຊໄດ້ແຈ້ງວ່າຍິນດີໃຫ້ການຄຸ້ມຄອງຄວາມປອດໄພແກ່ທ່ານກັດດາຟີພ້ອມດ້ວຍຄອບຄົວເຂົ້າລີ້ໄພ.
ພ້ອມດຽວກັນນັ້ນ,ພັນເອກໂລແລນ ລາວອຍ ໂຄສົກທະຫານນາໂຕກ່າວເນັ້ນໃນວັນທີ6ກັນຍານີ້ວ່າ,ນາໂຕປະຕິບັດການເຄື່ອນໄຫວທີ່ມີຊື່ວ່າ"ຜູ່ປ້ອງກັນຮ່ວມ"ຢູ່ລີບີແມ່ນມີຈຸດປະສົງເພື່ອປົກປ້ອງປະຊາຊົນ,ແຕ່ບໍ່ແມ່ນຕິດຕາມຈັບຕົວທ່ານກັດດາຟີພ້ອມດ້ວຍທະຫານທີ່ຈົງຮັກພັກດີຂອງທ່ານ.
ນອກນີ້ຂ່າວຍັງແຈ້ງວ່າ,ວັນທີ6ກັນຍານີ້,ລັດຖະບານອານເຊຣີໄດ້ຕັດສິນໃຈຫ້າມບໍ່ໃຫ້ເຈົ້າໜ້າທີ່ລັດຖະບານກັດດາຟີພ້ອມດ້ວຍຄອບຄົວເຂົ້າສູ່ອານເຊຣີ,ແລະໄດ້ເນລະເທດເຈົ້າໜ້າທີ່ບາງຄົນທີ່ໄດ້ເຂົ້າເມືອງກ່ອນໜ້ານີ້ແລ້ວ.ແຕ່ພິຈາລະນາຈາກດ້ານມະນຸດສະທຳແລ້ວ,ຈະອະນຸຍາດໃຫ້ປະຊາຊົນລີບີສາມາດເຂົ້າລີໄພໃນອານເຊຣີໄດ້.
