ນາຍົກຈີນໂທລະສັບລົມກັບນາຍົກຍີ່ປຸ່ນໂດຍກ່າວວ່າຍິນດີຊຸກຍູ້ການພົວພັນທາງດ້ານຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໃຫ້ໄດ້ຮັບຄວາມຄືບໜ້າໃໝ່
(GMT+08:00) 2011-09-07 17:20:10 cri
ວັນທີ6ກັນຍານີ້,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ໂທລະສັບລົມກັບທ່ານໂຢຊີຮິໂກະ ໂນດະ ນາຍົກລັດຖະມົນຕີຍີ່ປຸ່ນໂດຍທີ່ທ່ານເວິ່ນເຈ່ຍປາວໄດ້ອວຍພອນທ່ານໂຢຊີຮິໂກະ ໂນດະ ທີ່ໄດ້ດຳລົງຕຳແໜ່ງນາຍົກລັດຖະມົນຕີຍີ່ປຸ່ນແລະກ່າວວ່າ,ການຮັກສາການພົວພັນລະຫວ່າງສອງປະເທດມີຄວາມໝັ້ນທ່ຽງຍາວນານແລະຂະຫຍາຍຕົວຢ່າງປອດໃສນັ້ນແມ່ນມີຜົນດີຕໍ່ການເພີ່ມທະວີຄວາມຜາສຸກໃຫ້ແກ່ປະຊາຊົນສອງຊາດ,ຊຸກຍູ້ສັນຕິພາບແລະຄວາມຈະເລີນຮຸ່ງເຮືອງຂອງອາຊີກໍ່ຄືຂອງໂລກ.ລັດຖະບານຈີນຍິນດີຮ່ວມກັບຄະນະລັດຖະບານຊຸດໃໝ່ຂອງຍີ່ປຸ່ນ,ຍຶດໝັ້ນຫຼັກການໃນເອກະສານການເມືອງ4ສະບັບລະຫວ່າງຈີນ-ຍີ່ປຸ່ນ,ຮັກສາການໄປມາຫາສູ່ກັນລະຫວ່າງເຈົ້າໜ້າທີ່ລະດັບສູງ,ຕັ້ງໜ້າເປີດກວ້າງການແລກປ່ຽນແລະການຮ່ວມມືໃນຂົງເຂດຕ່າງໆ,ຮັດແໜ້ນການປະສານສົມທົບກັນໃນວຽກງານສາກົນແລະພາກພື້ນ,ນຳໃຊ້ໂອກາດທີ່ດີໃນການຕ້ອນຮັບວັນສ້າງຕັ້ງສາຍພົວພັນທາງການທູດລະຫວ່າງຈີນຍີ່ປຸ່ນຄົບຮອບ40ປີ,ຊຸກຍູ້ ການພົວພັນທາງດ້ານຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໃຫ້ໄດ້ຮັບຄວາມຄືບໜ້າໃໝ່.
ທ່ານໂຢຊີຮິໂກະ ໂນດະ ກ່າວວ່າ,ຄະນະລັດຖະບານຊຸດໃໝ່ຂອງຍີ່ປຸ່ນຖືການພົວພັນຍີ່ປຸ່ນຈີນເປັນໜຶ່ງໃນບັນດາການພົວພັນສອງຝ່າຍທີ່ສຳຄັນທີ່ສຸດ,ຍິນດີຮ່ວມກັບຈີນ,ຮັດແໜ້ນການໄປມາຫາສູ່ກັນລະຫວ່າງເຈົ້າໜ້າທີ່ລະດັບສູງ,ເພີ່ມທະວີການຮ່ວມມືໃນຂົງເຂດຕ່າງໆເຊັ່ນການພັດທະນາຄືນໃໝ່ຫຼັງໄພພິບັດ,ການທ່ອງທ່ຽວ,ວຽກງານທາງທະເລເປັນຕົ້ນແລະການແລກປ່ຽນກັນລະຫວ່າງຊາວໜຸ່ມເຍົາວະຊົນຂອງສອງປະເທດ,ນຳໃຊ້ໂອກາດທີ່ດີທີ່ສອງປະເທດສ້າງສາຍພົວພັນທາງການທູດຄົບຮອບ40ປີເພື່ອເພີ່ມທະວີຄວາມເຂົ້າໃຈກັນແລະມິດຕະພາບລະຫວ່າງປະຊາຊົນສອງຊາດ,ຊຸກຍູ້ໃຫ້ການພົວພັນທາງດ້ານຍຸດທະສາດທີ່ຕ່າງຝ່າຍຕ່າງມີຜົນປະໂຫຍດຂອງສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.
