ກອງປະຊຸມຄັ້ງທີ5ຂອງຄະນະກຳມະການຊີ້ນຳການຮ່ວມມືສອງຝ່າຍຈີນຫວຽດນາມໄຂຂຶ້ນຢູ່ຮ່າໂນຍ
(GMT+08:00) 2011-09-07 17:36:29 cri
ຕາມຂ່າວສານຊິນຮວາລາຍງານວ່າ, ກອງປະຊຸມຄັ້ງທີ5ຂອງຄະນະກຳມະການຊີ້ນຳການຮ່ວມມືສອງຝ່າຍຈີນຫວຽດນາມໄຂຂຶ້ນຢູ່ນະຄອນຫຼວງຮ່າໂນຍຂອງຫວຽດນາມໃນວັນທີ6ກັນຍານີ້.ທ່ານຕ້າຍປີງໂກວ ທີ່ປຶກສາແຫ່ງລັດຈີນ ,ປະທານຮ່ວມຝ່າຍຈີນ,ແລະທ່ານຫງວຽນຕຽນເຢິນຮອງນາຍົກລັດຖະມົນຕີ,ປະທານຮ່ວມຝ່າຍຫວຽດນາມໄດ້ຮ່ວມກັນເປັນປະທານຂອງກອງປະຊຸມຄັ້ງນີ້.
ທ່ານຕ້າຍປີງໂກວຊີ້ອອກວ່າ,ໃນ20ປີຜ່ານມາ,ສອງຝ່າຍຈີນຫວຽດນາມໄດ້ຮ່ວມກັນທຳຄວາມພະຍາຍາມໃນການຊຸກຍູ້ໃຫ້ການພົວພັນລະຫວ່າງສອງຝ່າຍກ້າວສູ່ລວງເລິກ,ເພື່ອສ້າງຄວາມຜາສຸກໃຫ້ແກ່ປະຊາຊົນສອງຊາດແລະ ຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງໃນພາກພື້ນ.
ຄະນະກຳມະການຊີ້ນຳການຮ່ວມມືສອງຝ່າຍຈີນ-ຫວຽດນາມເປັນກົນໄກສຳຄັນໃນການເພີ່ມຄວາມໄວ້ເນື້ອເຊື່ອໃຈກັນ,ຊຸກຍູ້ການຮ່ວມມືທີ່ມີການປະຕິບັດຕົວຈິງ,ໄດ້ເສີມຂະຫຍາຍບົດບາດອັນສຳຄັນໃນການຊຸກຍູ້ການພົວພັນລະຫວ່າງສອງຝ່າຍໃຫ້ມີການຂະຫຍາຍຕົວ.
ທ່ານຫວຽນຕຽນເຢິນກ່າວວ່າ, ຫວຽດນາມກັບຈີນມີຜົນປະໂຫຍດຮ່ວມກັນຫຼາຍຢ່າງ,ການຂະຫຍາຍການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີກັບຈີນແມ່ນເນື້ອໃນບູລິມະສິດອັນດັບໜຶ່ງຂອງນະໂຍບາຍຕໍ່ຕ່າງປະເທດຂອງຫວຽດນາມ.ຫວຽດນາມຍິນດີຮ່ວມກັບຈີນ,ເລີ່ມຈາກສະພາບລວມຂອງການພົວພັນລະຫວ່າງສອງປະເທດ,ປັບປຸງມິດຕະພາບອັນເປັນມູນເຊື້ອລະຫວ່າງສອງປະເທດໃຫ້ໝັ້ນຄົງ,ເພີ່ມທະວີການແລກປ່ຽນຢ້ຽມຢາມກັນລະຫວ່າງເຈົ້າໜ້າທີ່ລະດັບສູງແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆ,ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມຈີນໃຫ້ຂະຫຍາຍກ້າວໄປສູ່ໄລຍະໃໝ່.
