ນະຄອນຫຼວງແບກແດັດຈະຫຼຸດພົ້ນອອກຈາກກຳແພງປິດລ້ອມຢ່າງແທ້ຈິງໃນເວລາໃດ
(GMT+08:00) 2011-09-07 18:05:32 cri
ໃນເວລາກຳແພງແບກແລັງຖືກມ້າງໃນປີ1989, ຄົນທັງຫຼາຍເຄີຍກ່າວວ່າ, ກຳແພງປິດລ້ອມໄດ້ຖອນອອກຈາກເວທີປະຫວັດສາດຢ່າງແທ້ຈິງແລ້ວ. ແຕ່ເລີ່ມຈາກປີ2003ເປັນຕົ້ນມາ, ກຳແພງປິດລ້ອມປະເພດໃໝ່ໄດ້ປະກົດຕົວຂຶ້ນຢູ່ອີຣັກ, ເພື່ອສະກັດກັ້ນການຫຼອນໂຈມຕີແບບກໍ່ການຮ້າຍ, ແຕ່ກຳແພງນີ້ຊ້ຳເປັນການປິດລ້ອມການດຳລົງຊີວິດປະຈຳວັນຂອງປະຊາຊົນອີຣັກໄປໃນຕົວຕື່ມອີກ.
ກຳແພງທີ່ປິດລ້ອມນະຄອນຫຼວງແບກແດັດຂອງອີຣັກແມ່ນທະຫານອາເມລິກາປະຈຳອີຣັກເປັນຜູ້ລິເລີ່ມສ້າງຂຶ້ນ, ປີ2003, ເຂົາເຈົ້າໄດ້ກໍ່ສ້າງກຳແພງຊີມັງສູງໆຢູ່ນອກເຂດສີຂຽວ, ເພື່ອຮັບປະກັນຄວາມປອດໄພຂອງສະຖານທູດອາເມລິກາແລະພາກສ່ວນລັດຖະບານອີຣັກ. ຫຼັງຈາກນັ້ນ, ເພື່ອສະກັດກັ້ນການຫຼອນໂຈມຕີດ້ວຍການລະເບີດລົດຍົນ, ການເຄື່ອນໄຫວແຊກຊຶມຂອງພວກປະກອບອາວຸດຫົວຮຸນແຮງແລະການປະທະກັນແບບນອງເລືອດລະຫວ່າງສາສະໜານິກາຍຕ່າງໆ, ພາຍໃນນະຄອນແບກແດັດກໍ່ໄດ້ສ້າງກຳແພງປິດລ້ອມທີ່ມີຄວາມຍາວຫຼາຍຮ້ອຍກິໂລແມັດ.
ປີ2009, ເຈົ້າໜ້າທີ່ອີຣັກເຄີຍມີແຜນຈະເລີ່ມມ້າງກຳແພງທີ່ປິດລ້ອມນີ້, ແຕ່ພາຍຫຼັງມ້າງກຳແພງປິດລ້ອມຢູ່ນອກກະຊວງການຕ່າງປະເທດອີຣັກຜ່ານໄປສອງມື້ເທົ່ານັ້ນ, ພວກກໍ່ການຮ້າຍກໍໄດ້ກໍ່ການຫຼອນໂຈມຕີດ້ວຍລະເບີດລົດຍົນແບບສະຫຼະຊີບ, ເຮັດໃຫ້80ກວ່າຄົນເສຍຊີວິດ, ພາໃຫ້ແຜນການດັ່ງກ່າວປະຕິບັດຕໍ່ໄປບໍ່ໄດ້ອີກແລ້ວ. ແຕ່ວ່າ, ຍ້ອນວ່າປີນີ້ສະຖານະການຄວາມປອດໄພຂອງອີຣັກເລີ່ມປະກົດມີສະຖານະການດີຂຶ້ນ, ແຜນການມ້າງກຳແພງປິດລ້ອມກໍຖືກສະເໜີອອກມາອີກ, ອາດເວົ້າໄດ້ວ່າ, ການມ້າງກຳແພງປິດລ້ອມຈະເປັນໄປໄດ້ຫຼືບໍ່, ໄດ້ກາຍເປັນສັນຍະລັກແຫ່ງຄວາມປອດໄພຂອງນະຄອນຫຼວງແບກແດັດ. ຢູ່ເຂດໂຊເຈຍທີ່ຢູ່ໃຈກາງນະຄອນຫຼວງແບກແດັດ, ນັກຂ່າວໄດ້ເຫັນທະຫານອີຣັກຈຳນວນໜຶ່ງເລີ່ມມ້າງກຳແພງປິດລ້ອມຢູ່ຕາມຖະໜົນຫົນທາງ, ນັກຂ່າວໄດ້ພະຍາຍາມຖາມຫຼາຍເທື່ອ, ນາຍທະຫານຜູ້ໜຶ່ງທີ່ບໍ່ປະສົງອອກນາມໄດ້ຕອບການສຳພາດຂອງນັກຂ່າວ, ລາວບອກນັກຂ່າວວ່າ, ປີນີ້ໄດ້ມ້າງດິນຈີ່2ໝື່ນກວ່າກ້ອນຕາມແຜນການແລ້ວ.
ກຳແພງປິດລ້ອມໄດ້ນຳເອົາຄວາມຫຍຸ້ງຍາກສັບສົນຫຼາຍຢ່າງມາສູ່ການດຳລົງຊີວິດປະຈຳວັນຂອງປະຊາຊົນໃນນະຄອນຫຼວງແບກແດັດ. ທ່ານມາມຸດ ອາຊີສ ເຈົ້າຂອງຮ້ານຂາຍເຄື່ອງໃຊ້ໄຟຟ້າກ່າວວ່າ, ກຳແພງປິດລ້ອມບໍ່ມີປະໂຫຍດຫຍັງເລີຍ, ກຳແພງປິດລ້ອມຢູ່ຕໍ່ໜ້າຮ້ານຄ້າໄດ້ບັງຕາຂອງລູກຄ້າ, ເຮັດໃຫ້ຄວາມງາມຂອງຕົວເມືອງນັ້ນໝົດໄປ, ຂ້າພະເຈົ້າຫວັງຢາກໃຫ້ມ້າງກຳແພງປິດລ້ອມອອກທັງໝົດ.
ຄືກັນກັບຄວາມເວົ້າຂອງທ່ານອາຊີສ, ລັດຖະບານອີຣັກເຄີຍປະກາດວ່າ, ນອກຈາກເຂດສີຂຽວແລ້ວ, ກຳແພງປິດລ້ອມຢູ່ເຂດອື່ນໆຈະຖືກມ້າງໄປໝົດກ່ອນທ້າຍປີນີ້. ເມື່ອກຳແພງປິດລ້ອມຖືກມ້າງໄປແລ້ວ, ເມື່ອນະຄອນຫຼວງແບກແດັດຟື້ນຟູໃບໜ້າທີ່ສວຍງາມຄືເກົ່າແລ້ວ, ມັນອາດຈະສາມາດຊ່ວຍເຮັດໃຫ້ບາດແຜສົງຄາມທີ່ຢູ່ໃນໃຈຂອງປະຊາຊົນອີຣັກເປັນເວລາດົນນານນັ້ນ ຄ່ອຍໆຈືດຈາງແລະຖືກລຶບລ້າງໄປໃນທີ່ສຸດ.
