ໄຂກອງປະຊຸມຄັ້ງທີ 5 ຂອງຄະນະກຳມະການຊີ້ນຳການຮ່ວມມືລະຫວ່າງຈີນຫວຽດນາມ
(GMT+08:00) 2011-09-08 15:05:04 cri
ຕາມຂ່າວສານຊີນຮວາ: ກອງປະຊຸມຄັ້ງທີ 5 ຂອງຄະນະກຳມະການຊີ້ນຳການຮ່ວມມືລະຫວ່າງຈີນຫວຽດນາມໄດ້ໄຂຂຶ້ນຢູ່ນະຄອນຫລວງຮ່າໂນຍຂອງຫວຽດນາມໃນວັນທີ 6 ກັນຍານີ້,.ທ່ານໄຕ້ປິງໂກ,ທີ່ປຶກສາແຫ່ງລັດຈີນ, ປະທານຝ່າຍຈີນຂອງຄະນະກຳມະການດັ່ງກ່າວກັບທ່ນຫງຽນທຽນເຢັນ,ຮອງນາຍົກລັດຖະມົນຕີຫວຽດນາມ, ປະທານຝ່າຍຫວຽດນາມຂອງຄະນະກຳມະການດັ່ງກ່າວໄດ້ເປັນປະທານຮ່ວມຂອງກອງປະຊຸມຄັ້ງນີ້.ໃນໄລຍະໄຂກອງປະຊຸມ, ທ່ານຫງວຽນຟູຈ໋ອງ, ເລຂາທິການໃຫຍ່ສູນກາງພັກກອມມູນິດຫວຽດນາມ, ທ່ານຫງວຽນເຕິນຢຸ່ງ, ນາຍົກລັດຖະມົນຕີຫວຽດນາມຕ່າງກໍ່ໄດ້ຕ້ອນຮັບການເຂົ້າພົບປະຂອງທ່ານໄຕ້ປິງໂກ,ສອງຝ່າຍໄດ້ໂອ້ລົມກັນດ້ວຍຄວາມງສະຫນິດສະຫນົມແລະເຕັມໄປດ້ວຍໄມຕີຈິດມິດຕະພາບອັນດີ.ທ່ານໄຕ້ປິງໂກໄດ້ສົ່ງຕໍ່ຄວາມເຫັນຂອງທ່ານເລຂາທິການໃຫຍ່ຫູຈີນທາວກ່ຽວກັບການຂະຫຍາຍການພົວພັນລະຫວ່າງສອງພັກແລະສອງລັດຕໍ່ທ່ານຫງວຽນຟູຈ໋ອງ.
ສອງຝ່າຍເຫັນວ່າ,ການແກ້ໄຂບັນຫາຢູ່ເທິງທະເລຈີນໃຕ້ນັ້ນແມ່ນສຳຄັນທີ່ສຸດຕໍ່ການປົກປັກຮັກສາມິດຕະພາບແລະການຮ່ວມມືລະຫວ່າງຈີນຫວຽດນາມ, ແລະກ່າວຢ້ຳວ່າຈະອີງຕາມຄວາມຮັບຮູ້ຄືກັນຂອງຜູ່ນຳສອງປະເທດ, ກົດຫມາຍສາກົນແລະນ້ຳໃຈຂອງຖະແຫລງການກ່ຽວກັບການກະທຳຂອງບັນດາຝ່າຍ ຢູ່ເຂດທະເລຈີນໃຕ້,ຍຶດຫມັ້ນແກ້ໄຂຄວາມຂັດແຍ່ງກັນເທິງທະເລໂດຍສັນຕິແລະດ້ວຍການເຈລະຈາແລະປຶກສາຫາລືກັນຢ່າງມີໄມຕີຈິດມິດຕະພາບ,ໃຊ້ມາດຕະການທີ່ບັງເກີດຜົນເພື່ອປົກປັກຮັກສາສັນຕິພາບແລະສະຖຽນລະພາບຢູ່ທະເລຈີນໃຕ້.ສອງຝ່າຍຈະເລັ່ງລັດການເຈລະຈາ, ຊອກຫາວິທີແກ້ໄຂບັນຫາຢ່າງຖາວອນທີ່ທັງສອງຝ່າຍລ້ວນແຕ່ຮັບເອົາໄດ້.ສອງຝ່າຍເຫັນດີເພີ່ມທະວີພື້ນຖານເພື່ອການເຈລະຈາ, ເພື່ອເຊັນສັນຍາກ່ຽວກັບຫລັກການພື້ນຖານໃນການຊີ້ນຳການແກ້ໄຂບັນຫາເທິງທະເລລະຫວ່າງຈີນຫວຽດນາມໂດຍໄວ. ສອງຝ່າຍຈະຊຸກຍູ້ການຜັນຂະຫຍາຍຖະແຫລງການກ່ຽວກັບການກະທຳຂອງບັນດາຝ່າຍຢູ່ເຂດທະເລຈີນໃຕ້ແລະວຽກງານຕ່າງໆຕາມພາຍຫລັງ,ພະຍາຍາມໃຫ້ໄດ້ຮັບຄວາມຄືບຫນ້າແທ້ຈິງໂດຍໄວ.
