ງານວາງສະແດງສິນຄ້າຈີນອາຊຽນມີໂອກາດການຄ້າບໍລິການຢ່າງຫຼວງຫຼາຍ
(GMT+08:00) 2011-09-08 16:35:35 cri
ງານວາງສະແດງສິນຄ້າຈີນອາຊຽນຄັ້ງທີ8 ທີ່ຈະຈັດຂຶ້ນຢູ່ນະຄອນນານນິງຈີນແຕ່ວັນທີ21ຫາ26ຕຸລານີ້, ຈະສືບຕໍ່ຈັດການວາງສະແດງການຄ້າບໍລິການເປັນອັນສະເພາະ, ໃຊ້ວິທີວາງສະແດງແລະຈັດກິດຈະກຳປະສານສົມທົບກັນ, ລົງເລິກເນື້ອໃນການຄ້າບໍລິການໃຫ້ອຸດົມສົມບູນຂຶ້ນ, ສືບຕໍ່ຊຸກຍູ້ການຮ່ວມມືແລະແລກປ່ຽນລະຫວ່າງຈີນກັບອາຊຽນໃນດ້ານການບໍລິການທະນາຄານ, ການທ່ອງທ່ຽວແລະການສຶກສາ.
ການວາງສະແດງການບໍລິການທະນາຄານໃນງານວາງສະແດງສິນຄ້າຈີນອາຊຽນຄັ້ງທີ8 ຈະເປັນສູນຮວມວາງສະແດງເນື້ອໃນໃນດ້ານຕ່າງໆ ເຊັ່ນ: ການທະນາຄານເອກະຊົນ, ການທະນາຄານທຸລະກິດແລະການໃຫ້ຄຳປຶກສາດ້ານຂໍ້ມູນຂ່າວສານທະນາຄານ, ເພື່ອສ້າງເວທີໃຫ້ແກ່ອົງການຈັດຕັ້ງທີ່ເຂົ້າຮ່ວມການວາງສະແດງຊອກຮູ້ຂໍ້ມູນທະນາຄານຫຼ້າສຸດ, ຊອກຫາໂອກາດທາງດ້ານການຄ້າດ້ານການຮ່ວມມືແລະຮ່ວມກັນຮັບມືກັບສິ່ງທ້າທາຍໃນອະນາຄົດ.
ໃນໄລຍະງານວາງສະແດງຍັງຈະຈັດເວທີປຶກສາຫາລືວ່າດ້ວຍການຮ່ວມມືແລະການພັດທະນາດ້ານການທະນາຄານຈີນອາຊຽນຄັ້ງທີ3, ຫົວໜ້າພາກສ່ວນທະນາຄານຂອງຈີນແລະບັນດາປະເທດອາຊຽນ, ຜູ້ຮັບຜິດຊອບຂັ້ນສູງຂອງອົງການຈັດຕັ້ງທະນາຄານຂອງຈີນ, ອາຊຽນແລະຂອງອາເມລິກາແລະເອີລົບທີ່ປະຈຳຢູ່ພາກພື້ນອາຊີປາຊີຟິກ, ຜູ້ຕາງໜ້າທະນາຄານປະເພດອື່ນໆ, ຊ່ຽວຊານທີ່ມີຊື່ສຽງໃນວົງການທະນາຄານແລະຜູ້ຕາງໜ້າວິສາຫະກິດຕ່າງໆຈະເຂົ້າຮ່ວມເວທີປຶກສາຫາລືຕາມຄຳເຊີນ. ແຕ່ລະພາກສ່ວນທີ່ເຂົ້າຮ່ວມກອງປະຊຸມຈະຮ່ວມກັນຫາລືເຮັດແນວໃດເພື່ອຊຸກຍູ້ການພັດທະນາເສດຖະກິດພາກພື້ນຢ່າງແທ້ຈິງແລະຊອກຫາວິທີພັດທະນາໃໝ່ ໂດຍພາຍໃຕ້ປະຖົມປັດໄຈທີ່ຊຸກຍູ້ການຮ່ວມມືດ້ານການທະນາຄານເຊື່ອມໂຍງເຂົ້າກັນ.
ຈີນແລະບັນດາປະເທດອາຊຽນມີຊັບພະຍາກອນທ່ອງທ່ຽວທີ່ອຸດົມສົມບູນ, ມີພື້ນຖານແລະອະນາຄົດແຫ່ງການຮ່ວມມືທີ່ດີ. ງານວາງສະແດງສິນຄ້າຈີນອາຊຽນຄັ້ງທີ8 ຈະອີງຕາມຈຸດພິເສດແລະຄວາມຕ້ອງການດ້ານການທ່ອງທ່ຽວຂອງສອງຝ່າຍ, ຕັ້ງເຂດວາງສະແດງການບໍລິການດ້ານການທ່ອງທ່ຽວເປັນຄັ້ງທຳອິດໃນການວາງສະແດງການຄ້າບໍລິການ, ວາງສະແດງຮູບຊົງຕົວເມືອງແລະການບໍລິການດ້ານການທ່ອງທ່ຽວຂອງຈີນແລະບັນດາປະເທດອາຊຽນ, ແລະປະສານສົມທົບກັບການວາງສະແດງເມືອງສະເໜ່, ຜ່ານຈາກຈັດກິດຈະກຳໂຄສະນາທ່ອງທ່ຽວຕ່າງໆ, ສ້າງໂອກາດການຄ້າທີ່ຫຼາຍກວ່າເກົ່າໃຫ້ແກ່ການຮ່ວມມືດ້ານການທ່ອງທ່ຽວລະຫວ່າງຈີນກັບອາຊຽນ.
ງານວາງສະແດງສິນຄ້າຈີນອາຊຽນຄັ້ງທີ8 ຈະສືບຕໍ່ໃຫ້ການບໍລິການທີ່ມີຄຸນນະພາບດີແກ່ນັກທຸລະກິດທີ່ມາຮ່ວມງານວາງສະແດງບົນພື້ນຖານຄວາມສຳເລັດຂອງຫຼາຍຄັ້ງທີ່ຜ່ານມາ, ຍົກປະສິດທິພາບຂອງການວາງສະແດງການຄ້າບໍລິການແລະກິດຈະກຳຕ່າງໆໃຫ້ສູງຂຶ້ນຢ່າງແທ້ຈິງ.
