ຮອງປະທານາທິບໍດີອາເມລິກາກ່າວວ່າຈີນໄດ້ຮັບຜົນສຳເລັດສາມາເຮັດໃຫ້ອາເມລິກາຈະເລີນຮຸ່ງເຮືອງກວ່າເກົ່າ
(GMT+08:00) 2011-09-09 16:11:08 cri
ວັນທີ8ກັນຍານີ້, ທ່ານໂຈ ບິເດິນ ຮອງປະທານາທິບໍດີອາເມລິກາທີ່ເຄີຍຢ້ຽມຢາມຈີນໃນເດືອນແລ້ວນີ້ໄດ້ຂຽນບົດຄວາມໂດຍກ່າວວ່າ, ທ່ານຍັງເຊື່ອໝັ້ນວ່າ, ຈີນທີ່ໄດ້ຮັບຜົນສຳເລັດພົ້ນເດັ່ນ ສາມາເຮັດໃຫ້ອາເມລິກາຈະເລີນຮຸ່ງເຮືອງກວ່າເກົ່າ.
ມື້ດຽວກັນ, ທ່ານບິເດິນໄດ້ພິມບົດຄວາມຄໍລຳສະເພາະທີ່ມີຫົວຂໍ້ວ່າ: "ຈີນພົ້ນເດັ່ນຂຶ້ນບໍ່ແມ່ນຈຸດສຸດທ້າຍຂອງພວກເຮົາ"ລົງໃນໜັງສືພິມນິວຢອກແທມສ໌ ໂດຍຂຽນວ່າ, ການຄ້າແລະການລົງທຶນລະຫວ່າງສອງຝ່າຍໄດ້ເຮັດໃຫ້ອາເມລິກາແລະຈີນມີການພົວພັນກັນຢ່າງແໜ້ນແຟ້ນ. ຄວາມສຳເລັດຂອງສອງຝ່າຍມີຄວາມສຳຄັນຫຼາຍຕໍ່ຜົນປະໂຫຍດຂອງກັນ. ເມື່ອສັງເກດຈາກບັນຫາຕ່າງໆ ເຊັ່ນ: ຈາກຄວາມໝັ້ນຄົງຂອງທົ່ວໂລກຮອດການເຕີບໂຕຂອງເສດຖະກິດໂລກ, ສອງປະເທດລ້ວນແຕ່ປະເຊີນກັບສິ່ງທ້າທາຍແລະໜ້າທີ່ຮັບຜິດຊອບຮ່ວມກັນ, ສະນັ້ນຈິ່ງມີກຳລັງຊຸກຍູ້ການຈັບມືຮ່ວມກັນພະຍາຍາມ.
ໂດຍແນໃສ່ພາຍໃນປະເທດອາເມລິກາມີຄວາມວິຕົກກັງວົນຕໍ່ເລື່ອງທີ່ວ່ານຳເຂົ້າຜະລິດຕະພັນຂອງຈີນຈະເຮັດໃຫ້ໂອກາດປະກອບອາຊີບຂອງຊາວອາເມລິກາໜ້ອຍລົງ, ທ່ານບິເດິນຊີ້ອອກວ່າ, ປີກາຍນີ້, ບໍລິສັດອາເມລິກາໄດ້ສົ່ງອອກສິນຄ້າແລະການບໍລິການທີ່ມີມູນຄ່າ100ກວ່າຕື້ໂດລາໃຫ້ຈີນ, ແລະພາໃຫ້ພາຍໃນປະເທດອາເມລິກາມີຫຼາຍແສນຕຳແໜ່ງງານຍ້ອນ. ຈັງຫວະເຕີບໂຕດ້ານການສົ່ງອອກຕໍ່ຈີນຂອງອາເມລິກາໄດ້ສູງກວ່າການສົ່ງອອກຕໍ່ເຂດອື່ນໆຂອງໂລກ.
ທ່ານບິເດິນຊີ້ອອກວ່າ, ອາເມລິກາແລະຈີນມີການຮ່ວມມືກັນແລະກໍມີການແກ່ງແຍ່ງກັນ, ທ່ານເຊື່ອໝັ້ນວ່າ, ອາເມລິກາຈະສາມາດຈະເລີນຮຸ່ງເຮືອງຂຶ້ນໃນການແກ່ງແຍ່ງແບບນີ້. ເມື່ອເວົ້າເຖິງໜີ້ສິນຂອງອາເມລິກາ, ທ່ານບີເດິນກ່າວວ່າ, ໜີ້ສິນລັດຖະບານອາເມລິກາມີເກືອບ70%ຢູ່ໃນກຳມືຂອງຊາວອາເມລິກາ, ສະນັ້ນ, ອາເມລິກາຈະບໍ່ລະເມີດພັນທະໜີ້ສິນຂອງຕົນ.