ກິດຈະກຳລະລຶກເຫດການ11ກັນຍາຄົບຮອບ10ປີໄດ້ຈັດຂຶ້ນຕາມໆກັນ, ຊາວອາເມລິກາສ່ວນຫຼາຍຍັງຢ້ານເຫດການຫຼອນໂຈມຕີແບບກໍ່ການຮ້າຍເກີດຂຶ້ນອີກ
(GMT+08:00) 2011-09-09 17:07:31 cri
ຄຽງຄູ່ກັບວັນລະລຶກເຫດການຫຼອນໂຈມຕີແບບກໍ່ການຮ້າຍ11ກັນຍານັບມື້ນັບໃກ້ເຂົ້າ, ທ້ອງຖິ່ນຕ່າງໆຂອງອາເມລິກາ, ໂດຍສະເພາະແມ່ນນະຄອນນິວຢອກ ທີ່ເປັນສະຖານທີ່ເກີດເຫດ ພວມຈັດກິດຈະກຳຕ່າງໆ, ຍ້ອນວ່າຢ້ານພວກກໍ່ການຮ້າຍສວຍໂອກາດກໍ່ເຫດການຫຼອນໂຈມຕີອີກ, ສະຖານະການຮັກສາຄວາມປອດໄພກໍຂ້ຽວຂາດທີ່ສຸດ.
ກ່ອນໜ້ານີ້, ຢູ່ພາຍໃນທຳນຽບຂາວເຄີຍມີຄົນມີຄວາມເຫັນວ່າ, ຕ້ອງລະລຶກເຫດການ11ກັນຍາຢ່າງໃຫຍ່ໂຕມະໂຫລານ, ເຊິ່ງລວມທັງຈັດງານຊຸມນຸມຂະໜາດໃຫຍ່ແລະກ່າວປາຖະກະຖາເປັນເວລາຍາວນານ. ແຕ່ວ່າ, ພາຍຫຼັງການອະພິປາຍພາຍໃນເປັນຫຼາຍອາທິດແລ້ວ, ເຈົ້າໜ້າທີ່ທຳນຽບຂາວໄດ້ຕົກລົງໃນທີ່ສຸດວ່າ, ໃນວັນທີ11ກັນຍານີ້, ເຊີນອະດີດປະທານາທິບໍດີແລະທ່ານບາຣັກ ໂອບາມາ ປະທານາທິບໍດີຜູ້ປະຈຸບັນ ຈັດພິທີໄວ້ອາໄລຂະໜາດນ້ອຍຢູ່ບ່ອນເກົ່າຂອງສູນການຄ້າໂລກນິວຢອກທີ່ພັງທະລາຍລົງແລະຢູ່ນອກທຳນຽບ5ແຈຂອງກະຊວງປ້ອງກັນປະເທດອາເມລິກາ. ນອກນີ້, ທ້າຍອາທິດນີ້, ທ່ານຈໍຈີ W ບຸສ ອະດີດປະທານາທິບໍດີອາເມລິກາຍັງຈະໄປລັດແປນຊີວາເນຍ, ເພື່ອຢ້ຽມຢາມອະນຸສາວະລີຖ້ຽວບິນ93ຂອງບໍລິສັດການບິນສະຫະລັດອາເມລິກາແລະກ່າວຄຳປາໄສ.
ເພື່ອຮັບປະກັນກິດຈະກຳລະລຶກເຫຼົ່ານີ້ຈັດຂຶ້ນຢ່າງສະດວກ, ແລະປ້ອງກັນບໍ່ໃຫ້ພວກກໍ່ການຮ້າຍສວຍໂອກາດລະລຶກກໍ່ເຫດການຫຼອນໂຈມຕີອີກ, ປະຈຸບັນນີ້, ອາເມລິກາໄດ້ເພີ່ມທະວີການຮັກສາຄວາມປອດໄພຢ່າງຮອບດ້ານຢູ່ສະຖານີລົດເມ, ສະຖານີລົດໄຟ, ຂົວແລະສະໜາມບິນຂອງນະຄອນນິວຢອກ. ທ່ານປາວ ບຼາວ ໂຄສົກກົມໃຫຍ່ຕຳຫຼວດນະຄອນນິວຢອກກ່າວວ່າ, ຕຳຫຼວດນະຄອນນິວຢອກໄດ້ສຳເລັດການຝຶກອົບຮົມກ່ຽວກັບເຕັກນິກໃໝ່, ແລະເພີ່ມຕຳຫຼວດຢູ່ເຂດອ້ອມຂ້າງບ່ອນເກົ່າຂອງສູນການຄ້າໂລກແລະເຂດສຳຄັນຕ່າງໆ.
ເຖິງຈະເປັນແນວນີ້ກໍຕາມ, ແຕ່ປະຊາຊົນອາເມລິກາຍັງຢ້ານວ່າຖືກຫຼອນໂຈມຕີແບບກໍ່ການຮ້າຍອີກ. ຜົນການສຳຫຼວດສະບັບໜຶ່ງຂອງບໍລິສັດຟອກສ໌ ນິວສ ຂອງອາເມລິກາສະແດງໃຫ້ເຫັນວ່າ, ປະຊາຊົນອາເມລິກາມີ75%ເຫັນວ່າ, ອາເມລິກາຈະຖືກຫຼອນໂຈມຕີແບບກໍ່ການຮ້າຍຂະໜາດໃຫຍ່ອີກເທື່ອໜຶ່ງ. ສ່ວນຜົນການຢັ່ງປະຊາມະຕິຂອງໜັງສີພິມນິວຢອກທາມສ໌ແລະສະຖານີໂທລະພາບຂອງບໍລິສັດກະຈາຍສຽງໂກລຳບີ ໄດ້ສະແດງໃຫ້ເຫັນວ່າ, ປະຊາຊົນນະຄອນນິວຢອກມີ79%ເຫັນວ່າ, ນະຄອນນິວຢອກຈະປະເຊີນກັບການຂົ່ມຂູ່ດ້ານການກໍ່ການຮ້າຍຕະຫຼອດໄປ.
