ຈີນເດັດດ່ຽວຄັດຄ້ານປະທານາທິບໍດີແມັກຊິກພົບປະດາໄລລາມະ
(GMT+08:00) 2011-09-11 15:32:30 cri
ວັນທີ 10 ກັນຍານີ້, ທ່ານມາຈ່າວຊູ້, ໂຄສົກກະຊວງການຕ່າງປະເທດຈີນກ່າວຄຳປາໄສກ່ຽວກັບທ່ານຟີລິບ ຄາເດຣົນ, ປະທານາທິບໍດີແມັກຊິກພົບປະດາໄລລາມະ, ໂດຍກ່າວວ່າ, ຈີນສະແດງຄວາມບໍ່ພໍໃຈທີ່ສຸດແລະຄັດຄ້ານຢ່າງເດັດດ່ຽວ, ກະຊວງການຕ່າງປະເທດຈີນແລະສະຖານທູດຈີນປະຈຳແມັກຊິກຕ່າງໄດ້ຕໍ່ວ່າທັກທ້ວງຕໍ່ແມັກຊິກຢ່າງເຄັ່ງຂືມຢູ່ນະຄອນຫຼວງປັກກິ່ງແລະນະຄອນແມັກຊິກ.
ທ່ານມາຈ່າວຊູ້ກ່າວວ່າ, ແມັກຊິກບໍ່ເອົາຫົວຊານຳການຕໍ່ວ່າທັກທ້ວງແລະການຄັດຄ້ານຢ່າງເດັດດ່ຽວຂອງຈີນ, ບັງອາດຈັດວາງໃຫ້ທ່ານຟີລິບ ຄາເດຣົນ, ປະທານາທິບໍດີແມັກຊິກພົບປະດາໄລລາມະໃນວັນທີ 9 ກັນຍາ. ນີ້ແມ່ນການແຊກແຊງວຽກງານພາຍໃນຂອງຈີນຢ່າງຮ້າຍກາດ, ໄດ້ທຳຮ້າຍອາລົມຈິດຂອງປະຊາຊົນຈີນ, ແລະກໍ່ໄດ້ທຳລາຍການພົວພັນລະຫວ່າງຈີນກັບແມັກຊິກ.
ທ່ານມາຈ່າວຊູ້ກ່າວວ່າ, ວຽກງານເຂດຕິເບດແມ່ນວຽກງານພາຍໃນຂອງຈີນ, ບັນຫາເຂດຕິເບດກ່ຽວພັນເຖິງຜົນປະໂຫຍດໃຈກາງຂອງຈີນແລະອາລົມຈິດຂອງປະຊາຊົນຈີນ. ໃນໄລຍະດົນນານມານີ້, ດາໄລລາມະໄດ້ກໍ່ການເຄື່ອນໄຫວແບ່ງແຍກຈີນໂດຍຖືສາສະໜາເປັນຂໍ້ອ້າງ. ຈີນເດັດດ່ຽວຄັດຄ້ານຜູ້ນຳແລະເຈົ້າໜ້າທີ່ລັດຖະບານຂອງປະເທດໃດໆພົບປະດາໄລລາມະດ້ວຍຮູບການຕ່າງໆ.
