ວັນທີ 10 ກັນຍານີ້, ທ່ານມຸສທາຟາ ອັບເດວ ຈາລິວ, ປະທານ "ຄະນະກຳມະການຊົ່ວຄາວແຫ່ງຊາດ" ລີບີເດີນທາງຈາກມິສຣາທັຮ ນະຄອນໃຫຍ່ທີ 3 ຂອງລີບີໄປຮອດນະຄອນຫຼວງຕຼີໂປລີ ເພື່ອດຳເນີນການສຳຫຼວດ. ໃນການສຳຫຼວດ, ທ່ານຈາລິວຊີ້ອອກວ່າ, ຄວາມໝັ້ນຄົງແລະຄວາມປອດໄພ, ຄວາມປອງດອງຊາດ, ການສ້າງສາຄືນໃໝ່ຫຼັງສົງຄາມຂອງລີບີແລະອື່ນໆແມ່ນ ໜ້າທີ່ຕົ້ນຕໍທີ່ຕ້ອງສຳເລັດໃນໄລຍະຕໍ່ໄປ.
ໃນຫຼາຍມື້ທີ່ຜ່ານມານີ້, ສະມາຊິກຂອງ "ຄະນະກຳມະການຊ່າວຄາວແຫ່ງຊາດ" ລີບີທີ່ລວງທັງທ່ານມາຮມູດ ຈິບຣິວ, ເຊິ່ງເປັນປະທານຂອງຄະນະກຳມະການດັ່ງກ່າວແລະ ສະມາຊິກກົມບໍລິຫານງານຂອງຄະນະກຳມະການລ້ວນແຕ່ໄດ້ເດີນທາງໄປຮອດຕຼີໂປລີ, ແຕ່ນັບມາຮອດປະຈຸບັນ, ວຽກງານຍ້າຍບ່ອນຍັງບໍ່ທັນສຳເລັດເທື່ອ.
ພ້ອມກັນນັ້ນ, ຄຽງຄູ່ກັບວັດຖຸກູ້ໄພມະນຸດສະທຳໄດ້ຖືກຂົນສົ່ງໄປຮອດຕຼີໂປລີ, ສະພາບການຂາດນ້ຳ, ໄຟຟ້າແລະນ້ຳມັນເຊື້ອໄຟຢູ່ນະຄອນຫຼວງແລະເຂດອ້ອມແອ້ມກໍ່ໄດ້ຜ່ອນຄາຍລົງ, ແຕ່ຍັງຂາດຢາຫຼາຍ.
ມື້ດຽວກັນ, ທ່ານຄຼິສຕິນ ລາກາເດ, ປະທານອົງການກອງທຶນເງິນຕາສາກົນ ຫຼື IMF ປະກາດຮັບຮອງ "ຄະນະກຳມະການຊົ່ວຄາວແຫ່ງຊາດ" ລີບີເປັນຜູ້ແທນທີ່ຊອບຕາມກົດໝາຍຂອງ IMF. ປະຈຸບັນ, ມີ 40 ກວ່າປະເທດແລະອົງການຈັດຕັ້ງສາກົນເຊິ່ງລວງທັງອາເມລິກາ, ອັງກິດ, ຝະຣັ່ງ, ເຢຍລະມັນ, ຣັດເຊຍແລະສະຫະພາບເອີລົບເປັນຕົ້ນ ໄດ້ປະກາດຮັບຮອງ "ຄະນະກຳມະການຊົ່ວຄາວແຫ່ງຊາດ" ລີບີເປັນລັດຖະບານພຽງໜຶ່ງດຽວທີ່ຊອບຕາມກົດໝາຍຂອງລີບີ.
