ຍີ່ປຸ່ນແລະຟິລິບປິນປຶກສາຫາລືກັນກ່ຽວກັບບັນຫາທະເລຈີນໃຕ້
(GMT+08:00) 2011-09-12 16:50:03 cri
ວັນທີ9ກັນຍານີ້,ລັດຖະບານຍີ່ປຸ່ນແລະຟິລິບປິນໄດ້ຈັດການປຶກສາຫາລືລະດັບຮອງຫົວ ໜ້າກົມກ່ຽວກັບບັນຫາຄວາມປອດໄພເທິງທະເລເຂດອາຊີຄັ້ງທຳອິດ,ການເຮັດແນວໃດຮັບມືກັບເຈດຈຳນົງຂອງຈີນກ່ຽວກັບອະທິປະໄຕເໜືອເຂດທະເລຈີນຕາເວັນອອກແລະທະເລຈີນໃຕ້ແມ່ນຫົວຂໍ້ສຳຄັນຂອງການປຶກສາຫາລືຄັ້ງນີ້.ໃນເວລາທີ່ສະພາບການຢູ່ເຂດທະເລຈີນໃຕ້ແລະເຂດທະເລຈີນຕາເວັນອອກສັບສົນທີ່ສຸດ,ຍີ່ປຸ່ນແລະຟິລິບປິນຈັດການປຶກ ສາຫາລືລະຫວ່າງລັດຖະບານແບບນີ້,ໄດ້ດຶງດູດຄວາມສົນໃຈຫຼາຍ.
ຕາມສື່ມວນຊົນຍີ່ປຸ່ນລາຍງານວ່າ,ຍີ່ປຸ່ນແລະຟິລິບປິນບໍ່ໄດ້ປິດບັງຈຸດປະສົງຂອງການປຶກ ສາຫາລືຄັ້ງນີ້.ຈີນແລະຟິລິບປິນມີຄວາມຂັດແຍ່ງກັນຕໍ່ອະທິປະໄຕເໜືອໝູ່ເກາະນານຊ່າ,ສ່ວນທະເລຈີນໃຕ້ກໍ່ແມ່ນທາງເດີນເຮືອເທິງທະເລທີ່ສຳຄັນຂອງຍີ່ປຸ່ນ,ໃນບັນຫາທະເລຈີນຕາເວັນອອກ,ຈີນຍີ່ປຸ່ນມີຄວາມຂັດແຍ່ງກັນເລື່ອຍໆກ່ຽວກັບບັນຫາເກາະຕ້ຽວຢູ.ເພື່ອຮັບມືກັບເຈດຈຳນົງຂອງຈີນກ່ຽວກັບອະທິປະໄຕເໜືອເຂດທະເລຈີນຕາເວັນອອກແລະເຂດທະເລຈີນໃຕ້,ຍີ່ປຸ່ນແລະຟິລິບປິນຈະຈັດການປຶກສາຫາລືລະຫວ່າງລັດຖະບານເປັນເວລາປະ ຈຳ,ປະສານສົມທົບການດຳເນີນງານ,ຊຸກຍູ້ການຮ່ວມມື,ແລະຮັບປະກັນການເດີນເຮືອຢ່າງເສລີແລະປອດໄພຂອງຍີ່ປຸ່ນຢູ່ເຂດທະເລຈີນໃຕ້.ນອກນີ້,ສອງປະເທດຍັງໄດ້ບັນລຸຄວາມ ເຫັນທີ່ເປັນເອກະສັນກັນກ່ຽວກັບການຮ່ວມກັນຮັບມືກັບໂຈນທະເລຢູ່ຊ່ອງແຄບມາລັກກາແລະເຂດທະເລໂຊມາລີ.
ຍີ່ປຸ່ນແລະຟິລິບປິນໄດ້ໃຫ້ຄວາມສຳຄັນຫຼາຍສົມຄວນຕໍ່ການປຶກສາຫາລືຄັ້ງນີ້.ຍີ່ປຸ່ນໄດ້ສົ່ງເຈົ້າໜ້າທີ່ຂອງກະຊວງການຕ່າງປະເທດ,ກະຊວງປ້ອງກັນປະເທດແລະກົມປ້ອງກັນຄວາມປອດໄພເທິງທະເລເຂົ້າຮ່ວມ,ສ່ວນຟິລິບປິນໄດ້ສົ່ງເຈົ້າໜ້າທີ່ຂອງຕຳຫຼວດປ້ອງກັນຝັ່ງທະເລທີ່ເປັນພາກສ່ວນຄຸ້ມຄອງທະເລຂອງຕົນເຂົ້າຮ່ວມ.
ກ່ຽວກັບການປຶກສາຫາລືຄັ້ງນີ້,ນັກວິເຄາະເຫັນວ່າ,ເວົ້າສຳລັບຍີ່ປຸ່ນແລ້ວ,ມັນມີຈຸດປະສົງສາມດ້ານ,ຄື:ໜຶ່ງ,ເພີ່ມທະວີການຮ່ວມມືແລະມິດຕະພາບກັບຟິລິບປິນຕື່ມອີກ,ແລ້ວປັບປຸງແລະເສີມສ້າງການພົວພັນກັບອາຊຽນໃຫ້ໜັກແໜ້ນ,ເພື່ອເພີ່ມສິດປະກອບຄຳຄິດຄຳເຫັນຂອງຕົນໃນວຽກງານອາຊີອາຄະເນ;ສອງ,ຜ່ານການແຊກແຊງວຽກງານເຂດທະເລຈີນໃຕ້,ສະກັດກັ້ນແລະຕ້ານຢັນກັບຈີນ;ສາມ,ຍ້ອນວ່າຍີ່ປຸ່ນບໍ່ມີວິທີຮັບມືຫຍັງຕໍ່ທ່າທີແຂງກະດ້າງ ຂອງສ.ເກົາຫຼີແລະຣັດເຊຍໃນບັນຫາຄວາມຂັດແຍ່ງກັນດ້ານຜືນແຜ່ນດິນເຊັ່ນດຽວກັນ,ຣັດເຊຍຊ້ຳພັດມີການເຄື່ອນໄຫວທາງການທະຫານເລື່ອຍໆຢູ່ເຂດທະເລສາທາລະນະ, ສະນັ້ນ,ຈຶ່ງຢາກໃຊ້ບັນຫາທະເລຈີນຕາເວັນອອກແລະບັນຫາທະເລຈີນໃຕ້ເພື່ອຫຼຸດຜ່ອນຄວາມກົດດັນດ້ານການເມືອງພາຍໃນປະເທດ.ເວົ້າສຳລັບຟິລິບປິນແລ້ວ,ມັນມັກເຄື່ອນໄຫວຢູ່ລະຫວ່າງຈີນ,ຍີ່ປຸ່ນແລະອາເມລິກາ,ພະຍາຍາມສ້າງຄຸນຄ່າຂອງຕົນທີ່ຖືກນຳໃຊ້,ເພື່ອສະແຫວງຫາຜົນປະໂຫຍດຫຼາຍທີ່ສຸດຂອງຕົນ.ໃນບັນຫາທະເລຈີນໃຕ້,ຈີນມີເຈດຈຳນົງທີ່ແກ້ໄຂຄວາມຂັດແຍ່ງກັນດ້ວຍການປຶກສາຫາລືຢ່າງມີໄມຕີຈິດລະຫວ່າງສອງປະເທດ,ຄັດຄ້ານຫັນບັນຫານີ້ເປັນບັນຫາສາກົນ,ແຕ່ຟິລິບປິນພັດມີເຈດຈຳນົງທີ່ຟ້ອງຮ້ອງບັນ ຫານີ້ຕໍ່ສານກົດໝາຍທະເລສາກົນ,ເຮັດໃຫ້ບັນຫານີ້ສັບສົນກວ່າເກົ່າ.ເທື່ອນີ້,ຍີ່ປຸ່ນແລະຟິລິບປິນຈັດການປຶກສາຫາລືລະຫວ່າງລັດຖະບານ,ກໍ່ມີຈຸດປະສົງທີ່ເຮັດໃຫ້ບັນຫາທະເລຈີນໃຕ້ສັບ ສົນກວ່າເກົ່າ.
ນັກວິເຄາະເຫັນໂດຍທົ່ວໄປວ່າ,ອາເມລິກາແມ່ນກຳລັງຊຸກຍູ້ຢູ່ເບື້ອງຫຼັງບັນຫາທະເລຈີນຕາເວັນອອກແລະບັນຫາທະເລຈີນໃຕ້,ສອງບັນຫານີ້ຈະຂະຫຍາຍຕົວແນວໃດໃນຕໍ່ໜ້າ, ມັນມີການພົວພັນອັນແໜ້ນແຟ້ນແລະຕັດແຍກບໍ່ໄດ້ກັບຫຼັກໝັ້ນຂອງອາເມລິກາ.
