ຈີນຮັບຮອງ"ຄະນະກຳມະການຂ້າມຜ່ານແຫ່ງຊາດ"ລີບີ,ສະແດງໃຫ້ເຫັນສີສັນການຕ່າງປະເທດຂອງຈີນທີ່ສຸຂຸມໜັກແໜ້ນ
(GMT+08:00) 2011-09-13 18:05:48 cri
ປະຈຸບັນນີ້,ສະຖານະການຢູ່ລີບີແມ່ນເລື່ອງທີ່ທົ່ວໂລກພວມໃຫ້ຄວາມສົນໃຈ,ກໍ່ແມ່ນສະ ໜາມແຂ່ງຂັນທາງດ້ານການຕ່າງປະເທດລະຫວ່າງບັນດາມະຫາອຳນາດ.ການໃຊ້ນະໂຍບາຍແບບໃດຕໍ່ບັນຫາລີບີ,ຈະສະແດງໃຫ້ເຫັນທັດສະນະຄະຕິການຕ່າງປະເທດ,ທັດ ສະນະຕໍ່ຜົນປະໂຫຍດແລະສີສັນການປະຕິບັດວຽກງານຂອງປະເທດໃດໜຶ່ງ.
ຈີນມີເຈດຈຳນົງທີ່ດີໃນການເຄົາລົບຄວາມເປັນເອກະລາດດ້ານອະທິປະໄຕແລະຜືນແຜ່ນ ດິນອັນຄົບຖ້ວນຂອງປະເທດຕ່າງໆ,ຍຶດໝັ້ນຫຼັກການທີ່ບໍ່ແຊກແຊງວຽກງານພາຍໃນຂອງປະເທດອື່ນມາໂດຍຕະຫຼອດ.ສະນັ້ນ,ຈີນຈຶ່ງມີທ່າທີສຸຂຸມຮອບຄອບທີ່ສຸດຕໍ່ມະຕິສອງສະ ບັບຂອງສະພາຄວາມໝັ້ນຄົງແຫ່ງສະຫະປະຊາຊາດກ່ຽວກັບບັນຫາລີບີແລະການຮັບຮອງ"ຄະນະກຳມະການຂ້າມຜ່ານແຫ່ງຊາດ"ລີບີ.ເມື່ອລີບີເກີດມີຄວາມບໍ່ສະຫງົບແລ້ວ,ລັດຖະບານຈີນໄດ້ເອົາໃຈໃສ່ຜົນປະໂຫຍດພື້ນຖານຂອງປະຊາຊົນລີບີແລະສັນຕິພາບ, ສະຖຽນລະພາບຂອງພາກພື້ນ,ຕິດຕໍ່ພົວພັນກັບສອງຝ່າຍ ຄື:ອຳນາດການປົກຄອງກັດດາຟີແລະຝ່າຍຕໍ່ຕ້ານລັດຖະບານກັດດາຟີ,ເພື່ອຜ່ອນຄາຍການປະທະກັນແລະເສິກສົງຄາມ,ຮັກສາການແລກປ່ຽນຄວາມເຫັນແລະປະສານງານກັບປະຊາຄົມໂລກ,ຕັ້ງໜ້າສົ່ງເສີມການເຈລະຈາໂດຍສັນຕິ.ຫວ່າງມໍ່ໆມານີ້,ສະພາບການຢູ່ລີບີໄດ້ເກີດການປ່ຽນແປງຢ່າງໃຫຍ່ຫຼວງ,"ຄະນະກຳມະການຂ້າມ ຜ່ານແຫ່ງຊາດ"ລີບີໄດ້ຄວບຄຸມເຂດສ່ວນໃຫຍ່ຂອງທົ່ວປະເທດ,ລັດຖະບານຈີນຈຶ່ງປັບປ່ຽນນະໂຍບາຍອັນເໝາະສົມຕໍ່ລີບີ.ວັນທີ12ກັນຍານີ້,ລັດຖະບານຈີນປະກາດຮັບຮອງ"ຄະນະກຳມະການແຫ່ງຊາດ"ລີບີເປັນອຳນາດການປົກຄອງລີບີແລະເປັນຜູ່ຕາງໜ້າປະຊາຊົນລີບີ.ການປັບນະໂຍບາຍຕໍ່ລີບີຂອງຈີນດ້ານໜຶ່ງແມ່ນສອດຄ່ອງກັບນະໂຍບາຍການຕ່າງປະເທດຂອງຈີນ,ອີກດ້ານໜຶ່ງແມ່ນເນື່ອງຈາກການວິເຄາະຕໍ່ການປ່ຽນແປງຂອງສະພາບການໃນລີບີ.ບໍ່ພຽງແຕ່ໄດ້ຕອບສະໜອງຜົນປະໂຫຍດແລະຄວາມມຸ່ງມາດປາຖະໜາຂອງປະຊາຊົນລີບີເທົ່ານັ້ນ,ຍັງໄດ້ສ່ອງແສງໃຫ້ເຫັນຄວາມສຸຂຸມຮອບຄອບແລະໜັກແໜ້ນທາງດ້ານການຕ່າງປະເທດຈີນ.
ຈີນປັບນະໂຍບາຍຕໍ່ລີບີກໍ່ແມ່ນການສະໜັບສະໜູນຕໍ່ສະຖຽນລະພາບແລະການພັດທະ ນາຂອງລີບີ.ຜູ່ນຳຂອງ"ຄະນະກຳມະການຂ້າມຜ່ານແຫ່ງຊາດ"ລີບີເຄີຍຍ້ອງຍໍສັນລະເສີນຫຼັກໝັ້ນທີ່ເປັນທຳຂອງລັດຖະບານຈີນໃນບັນຫາລີບີຢູ່ຫຼາຍສະຖານແບບເປີດປະຕູ,ກ່າວວ່າ,ຈະເຄົາລົບປະຕິບັດຂໍ້ຜູກພັນທີ່ຈີນລີບີໄດ້ເຊັນໃນກ່ອນໜ້ານີ້,ຍິນດີຕ້ອນຮັບວິສາຫະ ກິດຈີນເຂົ້າຮ່ວມການສ້າງສາຄືນໃໝ່ຫຼັງສົງຄາມຂອງລີບີ.ໃນຂະນະດຽວກັນນີ້,ໃນເວລາໃຫ້ສຳພາດຕໍ່ນັກຂ່າວ,"ຄະນະກຳມະການຂ້າມຜ່ານແຫ່ງຊາດ"ຂອງລີບີແລະປະຊາຊົນລີບີຈຳນວນບໍ່ໜ້ອຍໄດ້ກ່າວວ່າ,ການປົກຄອງຂອງກັດດາຟີໄດ້ເສຍຄວາມຊອບດ້ວຍກົດ ໝາຍ,ແລະ"ຄະນະກຳມະການຂ້າມຜ່ານແຫ່ງຊາດ"ລີບີຖືກກັບຄວາມມຸ່ງມາດປາຖະໜາຂອງປະຊາຊົນລີບີ,ແລະໄດ້ຮັບການສະໜັບສະໜູນຈາກປະຊາຊົນລີບີ,ສະນັ້ນ,ຍ່ອມທີ່ຈະໄດ້ຮັບການຮັບຮອງຈາກຈີນທີ່ເປັນເພື່ອນມິດຂອງປະຊາຊົນລີບີ.ຍ້ອນມີສຽງຮຽກຮ້ອງຂອງປະຊາຊົນລີບີ,ຈີນໄດ້ຮັບຮອງ"ຄະນະກຳມະການຂ້າມຜ່ານແຫ່ງຊາດ"ລີບີໃນເວລາອັນເໝາະສົມ,ນີ້ສະແດງໃຫ້ເຫັນຈີນທີ່ມີຄວາມເຄົາລົບນັບຖືຕໍ່ການເລືອກເຟ້ນຂອງປະຊາຊົນລີບີ,ແລະສະແດງໃຫ້ເຫັນທ່າທີອັນຕັ້ງໜ້າແລະນະໂຍບາຍແບບຮ່ວມມືຂອງລັດຖະບານຈີນທີ່ມີຕໍ່ການຂະຫຍາຍການພົວພັນກັບລີບີ.
