ຈັດກອງປະຊຸມເວທີປຶກສາຫາລືການພັດທະນາສັງຄົມແລະຫຼຸດຜ່ອນຄວາມທຸກຍາກຈີນອາຊຽນຄັ້ງທີ5ຢູ່ຈາກາຕາ
(GMT+08:00) 2011-09-15 16:38:26 cri
ວັນທີ14ກັນຍານີ້, ກອງປະຊຸມເວທີປຶກສາຫາລືການພັດທະນາສັງຄົມແລະຫຼຸດຜ່ອນຄວາມທຸກຍາກຈີນອາຊຽນຄັ້ງທີ5ໄດ້ຈັດຂຶ້ນຢູ່ນະຄອນຫຼວງຈາກາຕາຂອງອິນໂດເນເຊຍ, ທ່ານຫຼີຈີ່ນຮວາ, ຮອງປະທານສະພາປຶກສາການເມືອງປະຊາຊົນຈີນ, ປະທານກິຕິມະສັກສະມາຄົມຫຼຸດຜ່ອນຄວາມທຸກຍາກແລະພັດທະນາຂອງຈີນໄດ້ໄດ້ເຂົ້າຮ່ວມພິທີໄຂກອງປະຊຸມແລະກ່າວຄຳປາໄສ.
ທ່ານຫຼີຈີ່ນຮວາກ່າວວ່າ, ພະຍາຍາມລົບລ້າງຄວາມທຸກຍາກ, ຊຸກຍູ້ການຊົມໃຊ້ຜົນຂອງການພັດທະນາທາງສັງຄົມຮ່ວມກັນ, ແມ່ນອຸດົມການຮ່ວມໃນການພັດທະນາຂອງມວນມະນຸດ, ແລະກໍ່ແມ່ນໜ້າທີ່ຮ່ວມຂອງຈີນແລະປະເທດຕ່າງໆຂອງອາຊຽນ. ການຍົກສູງຄຸນນະພາບແຫ່ງການພັດທະນາ, ເຮັດໃຫ້ການເຕີບໂຕດ້ານເສດຖະກິດຊ່ວຍຫຼຸດຜ່ອນຈຳນວນຜູ້ທຸກຍາກ, ການບັນລຸເປົ້າໝາຍໃນການຫຼຸດຜ່ອນຄວາມທຸກຍາກແລະພັດທະນາຢ່າງຕໍ່ເນື່ອງ, ແມ່ນເປົ້າໝາຍຮ່ວມຂອງລັດຖະບານຈີນແລະປະເທດຕ່າງໆຂອງອາຊຽນ.
ທ່ານໄຊຍະການ ສີສຸວົງ, ຮອງເລຂາທິການອາຊຽນກ່າວວ່າ, ເສດຖະກິດອາຊຽນໄດ້ມີກຳລັງຊີວິດຊີວາຢ່າງແຂງແຮງ, ບາງປະເທດສະມາຊິກອາຊຽນໄດ້ພົ້ນອອກຈາກຜົນກະທົບຂອງວິກິດການການເງິນສາກົນ. ແຕ່ບົດລາຍງານຂອງທະນາຄານພັດທະນາອາຊີປີ2009ສະແດງໃຫ້ເຫັນວ່າ, ຢູ່ທະວີບອາຊີການໃຊ້ຈ່າຍຂອງຜູ້ທຸກຍາກຈຳນວນ1ຕື້600ລ້ານຄົນຍັງຕ່ຳກວ່າ2ໂດລາຕໍ່ມື້, ໃນນັ້ນ20%ໃຊ້ຈ່າຍບໍ່ຮອດ1,25ໂດລາຕໍ່ມື້. ສະນັ້ນ, ຈຶ່ງມີຄວາມຈຳເປັນໃນການຍົກສູງຄຸນນະພາບແຫ່ງການພັດທະນາເສດຖະກິດ, ນຳເອົາສະຫວັດດີການດ້ານວັດຖຸແລະບໍລິການດ້ານການປິ່ນປົວໃຫ້ເຂົ້າເຖິງປະຊາຊົນຂັ້ນຮາກຖານ, ເຮັດໃຫ້ເຂົາເຈົ້າມີສ່ວນຮ່ວມໃນການພັດທະນາເສດຖະກິດຢ່າງແທ້ຈິງ.
ປີ2007, ກອງປະຊຸມເວທີປຶກສາຫາລືພັດທະນາສັງຄົມແລະຫຼຸດຜ່ອນຄວາມທຸກຍາກຄັ້ງທຳອິດໄດ້ຈັດຂຶ້ນຢູ່ນະຄອນນານນີງເຂດເຜົ່າຈ້ວງກວາງຊີຂອງຈີນຢ່າງມີຜົນສຳເລັດ. ໃນ5ປີຜ່ານມາ, ກອງປະຊຸມເວທີປຶກສາຫາລືດັ່ງກ່າວໄດ້ກາຍເປັນກົນໄກແລກປ່ຽນອັນສຳຄັນທີ່ຊຸກຍູ້ການຮ່ວມມືດ້ານການພັດທະນາສັງຄົມແລະຫຼຸດຜ່ອນຄວາມທຸກຍາກລະຫວ່າງຈີນກັບປະເທດອາຊຽນ, ໄດ້ສົ່ງຜົນດີຕໍ່ການຊຸກຍູ້ສະຖຽນລະພາບແລະຄວາມຈະເລີນຮຸ່ງເຮືອງໃນພາກພື້ນນີ້.
