ທ່ານເວີ່ນເຈ່ຍປາວສົນທະນາກັບຜູ່ແທນທີ່ເຂົ້າຮ່ວມກອງປະຊຸມເວທີປຶກສາຫາລືດາວົສລະດູຮ້ອນປີ 2011
(GMT+08:00) 2011-09-15 18:53:48 cri
ວັນທີ14ກັນຍານີ້,ທ່ານເວີ່ນເຈ່ຍປາວ,ນາຍົກລັດຖະມົນຕີຈີນພ້ອມດ້ວຍທ່ານຄລາວສ໌ ສະວັບ,ປະທານເວທີປຶກສາຫາລືເສດຖະກິດໂລກໄດ້ດຳເນີນການສົນທະນາແລະແລກປ່ຽນຄວາມເຫັນກັບຜູ່ແທນຈີນແລະຕ່າງປະເທດທີ່ເຂົ້າຮ່ວມກອງປະຊຸມເວທີປຶກສາຫາລືດາວົສລະດູຮ້ອນປີ2011ຢູ່ເມືອງຕ້າລຽນຂອງຈີນ.
ກ່ຽວກັບຄຳປາຖະກະຖາທີ່ທ່ານເວີ່ນເຈ່ຍປາວກ່າວຢູ່ພິທີໄຂກອງປະຊຸມເວທີປຶກສາຫາລືເທື່ອນີ້,ທ່ານສະວັບໄດ້ສະຫຼຸບເປັນສາມຄຳສັບ,ຄື:ຄວາມໝັ້ນໃຈ,ຄວາມຮັບຜິດຊອບແລະການຮ່ວມມື.ສິ່ງທີ່ທ່ານສະວັບເອົາໃຈໃສ່ທີ່ສຸດແມ່ນຈີນຈະເຮັດແນວໃດເພື່ອຊ່ວຍປະຊາຄົມໂລກຮັບມືກັບສິ່ງທ້າທາຍຈາກວິກິດການການເງິນໃນປະຈຸບັນນີ້.ໃນເວລາຕອບຄຳຖາມ,ທ່ານເວີ່ນເຈ່ຍປາວອະທິບາຍວ່າ,ຈີນມີການພົວພັນກັບການພັດທະນາຂອງໂລກທີ່ບໍ່ສາມາດຕັດແຍກ,ກ່ອນອື່ນ,ຈີນຕ້ອງພັດທະນາຕົນເອງໃຫ້ດີ,ພ້ອມກັນຊຸກຍູ້ການປະຕິຮູບລະ ບົບເສດຖະກິດແລະລະບົບການທະນາຄານສາກົນ,ພະຍາຍາມຮັກສາສະຖຽນລະພາບແລະການພັດທະນາຂອງເສດຖະກິດໂລກ,ເຮັດໃຫ້ເສດຖະກິດໂລກພັດທະນາຢ່າງແຂງ ແຮງ,ຕໍ່ເນື່ອງແລະສະໝ່ຳສະເໝີ.ກ່ຽວກັບຄວາມຫຍຸ້ງຍາກທີ່ເອີຣົບແລະອາເມລິກາປະສົບໃນປະຈຸບັນນີ້,ທ່ານເວີ່ນເຈ່ຍປາວໄດ້ສະແດງຄວາມເຫັນ.
ກ່ຽວກັບເອີລົບ,ທ່ານເວີ່ນເຈ່ຍປາວຊີ້ອອກວ່າ: "ເອີລົບແມ່ນຄູ່ຮ່ວມມືດ້ານຍຸດທະສາດ ຮອບດ້ານຂອງຈີນ,ພວກຂ້າພະເຈົ້າຕິດຕາມເອົາໃຈໃສ່ການຂະຫຍາຍຕົວແລະຄວາມຫຍຸ້ງຍາກຂອງເສດຖະກິດເອີລົບຢູ່ສະເໝີ.ໃນເວລາທີ່ບາງປະເທດໃນເອີຣົບເກີດວິກິດການໜີ້ສິນພາກລັດແລະປະສົບຄວາມຫຍຸ້ງຍາກດ້ານເສດຖະກິດ,ຈີນໄດ້ສະແດງເຈດ ຈຳນົງຂອງຕົນຫຼາຍເທື່ອວ່າ ຍິນດີສະໜອງການຊ່ວຍເຫຼືອ,ສືບຕໍ່ເພີ່ມການລົງທຶນຕໍ່ເອີຣົບ.ແຕ່ຂ້າພະເຈົ້າກໍ່ຫວັງວ່າ,ຜູ່ນຳຂອງສະຫະພາບເອີຣົບ,ແລະຜູ່ນຳຂອງບາງປະເທດສຳຄັນ ຂອງເອີຣົບຄວນປະຕິບັດຕໍ່ການພົວພັນຈີນເອີລົບຈາກລະດັບຍຸດທະສາດແລະປະຕິບັດຕໍ່ຢ່າງກ້າຫານ,ຕົວຢ່າງຄື:ຮັບຮອງຖານະຂອງຈີນທີ່ເປັນເສດຖະກິດຕະຫຼາດຢ່າງສົມບູນ.ທີ່ຈິງແລ້ວ,ຕາມກະຕິກາຂອງອົງການການຄ້າໂລກຫຼືWTO,ຖານະທີ່ເປັນເສດຖະກິດຕະ ຫຼາດສົມບູນຂອງຈີນຈະໄດ້ຮັບການຮັບຮອງຢ່າງແທ້ຈິງຈາກທົ່ວໂລກໃນປີ2016,ຖ້າວ່າຮັບຮອງກ່ອນໜ້ານີ້ຈັກປີໜຶ່ງນັ້ນ,ມັນເປັນການສະແດງຄວາມຈິງໃຈແນວໜຶ່ງ,ແມ່ນການພົວພັນລະຫວ່າງເພື່ອນມິດກັບເພື່ອນມິດ."
ກ່ຽວກັບສະຫະລັດອາເມລິກາ,ທ່ານເວີ່ນເຈ່ຍປາວກ່າວວ່າ,ໃນຖານະທີ່ເປັນປະເທດທີ່ໄດ້ພັດທະນາແລ້ວທີ່ໃຫຍ່ທີ່ສຸດໃນໂລກ,ອາເມລິກາມີກຳລັງເສດຖະກິດທີ່ເຂັ້ມແຂງ,ມີພື້ນຖານວິທະຍາສາດເຕັກໂນໂລຢີທີ່ໜັກແໜ້ນ,ແລະມີວິຊາການດ້ານຕ່າງໆຢ່າງຫຼວງຫຼາຍ.ພວກຂ້າພະເຈົ້າເຊື່ອໝັ້ນວ່າ,ອາເມລິກາຈະສາມາດຜ່ານຜ່າຄວາມຫຍຸ້ງຍາກ,ເຮັດໃຫ້ເສດຖະກິດຟື້ນຕົວຢ່າງຮອບດ້ານໄປໄດ້ດ້ວຍດີ.ແຕ່ພວກຂ້າພະເຈົ້າຍັງມີຄວາມຫວັງໃຫ້ອາເມລິກາປະຕິບັດນະໂຍບາຍເສດຖະກິດທີ່ຖືກຕ້ອງ,ຮັກສາຄວາມໝັ້ນທ່ຽງດ້ານການເງິນແລະການທະນາຄານ,ເພື່ອປົກປ້ອງຜົນປະໂຫຍດແລະຄວາມໝັ້ນໃຈຂອງຜູ່ລົງທຶນ.
ກ່ຽວກັບຫົວຂໍ້ການປະຕິຮູບໂຄງປະກອບການເມືອງຂອງຈີນທີ່ຫຼາຍຄົນສົນໃຈມາຕະຫຼອດນັ້ນ,ທ່ານເວີ່ນເຈ່ຍປາວຊີ້ອອກວ່າ,ຈີນຍັງຈະຍຶດໝັ້ນວຽກໃນຫ້າດ້ານຢ່າງບໍ່ລົດລະ,ຄື:ຍຶດໝັ້ນການປົກຄອງປະເທດຕາມກົດໝາຍ;ຊຸກຍູ້ຄວາມຍຸດຕິທຳຄວາມເປັນທຳຂອງສັງຄົມ;ປົກປ້ອງຄວາມຍຸດຕິທຳດ້ານອຳນາດສານ;ປົກປັກຮັກສາສິດປະຊາທິປະໄຕຂອງປະຊາຊົນ;ແລະເດັດດ່ຽວຕ້ານການຊຸດໂຊມເປື່ອຍເຍື່ອຍ.ທ່ານກ່າວເນັ້ນວ່າ,ສິ່ງສຳຄັນທີ່ສຸດໃນວຽກເຫຼົ່ານີ້ແມ່ນເປີດກວ້າງປະຊາທິປະໄຕຢ່າງມີລະບຽບຫຼັກການ,ຊຸກຍູ້ຄວາມຍຸດຕິທຳຄວາມເປັນທຳຂອງສັງຄົມຢ່າງໝັ້ນໜຽວບໍ່ຫວັ່ນໄຫວຄອນແຄນ,ເດັດດ່ຽວຕ້ານການຊຸດໂຊມເປື່ອຍເຍື່ອຍ.ນີ້ແມ່ນເຫດຜົນທີ່ເຮັດໃຫ້ປະຊາຊົນມີຄວາມໝັ້ນໃຈຕໍ່ອະນາຄົດຂອງປະເທດ.
