ກຳລັງປະກອບອາວຸດຂອງຄະນະກຳມະການຊົ່ວຄາວແຫ່ງຊາດລີບີໄດ້ບຸກເຂົ້າເມືອງເຊີດທ໌ຢ່າງມີຜົນສຳເລັດ
(GMT+08:00) 2011-09-16 20:16:27 cri
ວັນທີ15ກັນຍານີ້, ຄະນະກຳມະການຊົ່ວຄາວແຫ່ງຊາດລີບີກ່າວວ່າ, ກຳລັງປະກອບອາວຸດຂອງຄະນະກຳມະການຊົ່ວຄາວແຫ່ງຊາດລີບີໄດ້ບຸກໂຈມຕີຖານທີ່ໝັ້ນຂອງກຳລັງປະກອບອາວຸດທີ່ຈົງຮັກພັກດີຕໍ່ທ່ານກັດດາຟີຢູ່ເມືອງເຊີດທ໌ຢ່າງດຸເດືອດ, ຊຶ່ງໄດ້ບຸກເຂົ້າເມືອງເຊີດທ໌ຈາກສອງທິດຄື:ທິດຕາເວັນຕົກແລະທິດໃຕ້ຈົນໄດ້ຮັບຜົນສຳເລັດໃນຕອນຄ່ຳວັນທີ15ກັນຍານີ້ຕາມເວລາທ້ອງຖິ່ນ, ປະຈຸບັນໄດ້ຄວບຄຸມທາງອອກຫຼາຍແຫ່ງຢູ່ໃນເມືອງນີ້. ມື້ດຽວກັນນີ້, ທ່ານແຮັກມານ ວັນຣົມປຸຍ, ປະທານຖາວອນສະພາມົນຕີສະຫະພາບເອີລົບກ່າວຢູ່ອາຟຼິກກາໃຕ້ວ່າ, ສະຫະພາບເອີລົບຍິນດີຊຸກຍູ້ການສ້າງຕັ້ງລັດຖະບານທີ່ມີຄວາມປອງດອງສາມັກຄີໂດຍໄວເທົ່າທີ່ຄວາມສາມາດຂອງຕົນເຮັດໄດ້.
ຢູ່ເມືອງບານີ ວາລິດ, ທະຫານທັງສອງຝ່າຍສືບຕໍ່ມີການປະທະກັນ,ປະຈຸບັນ,ໄດ້ຕົກຢູ່ໃນສະພາບທີ່ບໍ່ໄປບໍ່ມາ. ຂ່າວແຈ້ງວ່າ,ທະຫານແລະເຄື່ອງຊ່ວຍເຫຼືອຈາກແຫ່ງຕ່າງໆຂອງລີບີທີ່ສົ່ງໄປສະໜັບສະໜູນກຳລັງປະກອບອາວຸດຂອງຄະນະກຳມະການຊົ່ວຄາວແຫ່ງຊາດລີບີໄດ້ໄປເຕົ້າໂຮມກັນຢູ່ເມືອງບານີ ວາລິດ, ສ່ວນຢູ່ໃນເມືອງ,ລະບົບນ້ຳປະປາ,ໄຟຟ້າແລະໂທລະຄົມມະນາຄົມຖືກຕັກຂາດ.
ມື້ດຽວກັນ, ສະພາເອີລົບໄດ້ຮັບຮອງຜ່ານມະຕິຕົກລົງສະບັບໜຶ່ງຢູ່ປະເທດຝັ່ງໂດຍກ່າວວ່າ, ສະພາເອີລົບສະໜັບສະໜູນຄະນະກຳມະການຊົ່ວຄາວແຫ່ງຊາດລີບີຢ່າງຈິງໃຈ. ແລະຮຽກຮ້ອງໃຫ້ສະຫະພາບເອີລົບໃຊ້ຍຸດທະສາດຮ່ວມກັນຢ່າງແທ້ຈິງຕໍ່ລີບີ,ແລະຮຽກຮ້ອງບໍ່ໃຫ້ປະເທດສະມາຊິກຂອງສະຫະພາບເອີລົບໃຊ້ມາດຕະການແລະການກະທຳທີ່ບໍ່ມີຜົນດີຕໍ່ຍຸດທະສາດດັ່ງກ່າວພຽງຝ່າຍດຽວ.
