ຈີນປະທ້ວງຢ່າງຮຸນແຮງຕໍ່ອາເມລິກາທີ່ປະກາດຂາຍອາວຸດໃຫ້ໄຕ້ຫວັນ
(GMT+08:00) 2011-09-22 17:42:18 cri
ໂດຍແນໃສ່ຂ່າວທີ່ວ່າ ອາເມລິກາໄດ້ປະກາດແຜນການຂາຍອາວຸດທີ່ມີມູນຄ່າ 5 ຕື້ 852 ລ້ານໂດລາໃຫ້ໄຕ້ຫວັນຄື ປັບປຸງຍົນສູ້ຮົບ F16A/B, ຂາຍເຄື່ອງອາໄຫຼ່ແລະຊີ້ນສ່ວນຂອງເຄື່ອງບິນທີ່ໃຊ້ທາງການທະຫານແລະສະໜອງໂຄງການຝຶກອົບຮົມທີ່ກ່ຽວຂ້ອງໃຫ້ໄຕ້ຫວັນ, ຈີນໄດ້ສະແດງຄວາມປະທ້ວງຢ່າງຮຸນແຮງ, ແລະຮຽກຮ້ອງໃຫ້ອາເມລິກາຈົ່ງຢຸດຕິການຂາຍອາວຸດໃຫ້ໄຕ້ຫວັນແລະຕັດການພົວພັນທາງການທະຫານກັບໄຕ້ຫວັນໂດຍທັນທີ.
ວັນທີ 21 ກັນຍານີ້ ທ່ານຈ່າງຈື້ຈູ່ນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນໄດ້ຮຽກທ່ານແກຣີ ຟາເຢ ລັອກ, ເອກອັກຄະລັດຖະທູດອາເມລິກາປະຈຳຈີນເຂົ້າພົບແບບສຸກເສີນ. ທ່ານຈ່າງຈື້ຈູ່ນຊີ້ອອກວ່າ, ການກະທຳຂອງອາເມລິກາໄດ້ຝ່າຝືນຫຼັກການຂອງປະກາດແຈ້ງການຮ່ວມຈີນອາເມລິກາ 3 ສະບັບໂດຍສະເພາະແມ່ນປະກາດແຈ້ງການທີ 17 ກັນຍາຢ່າງໜັກໜ່ວງ, ເປັນການແຊກແຊງວຽກງານພາຍໃນຂອງຈີນຢ່າງຮຸນແຮງ, ເປັນໄພຂົ່ມຂູ່ຕໍ່ຄວາມປອດໄພແຫ່ງຊາດຂອງຈີນຢ່າງໜັກໜ່ວງ, ທັງໄດ້ທຳລາຍພາລະກິດອັນຍິ່ງໃຫຍ່ແຫ່ງການທ້ອນໂຮມທົ່ວປະເທດໂດຍສັນຕິຂອງຈີນແລະທຳລາຍການພົວພັນຈີນອາເມລິກາ. ຈີນສະແດງຄວາມຄຽດແຄ້ນທີ່ສຸດແລະຄັດຄ້ານຢ່າງເດັດຂາດ.
ວັນທີ 22 ກັນຍານີ້ ທ່ານເກີງຢ້ຽນເຊິ່ງ, ໂຄສົກກະຊວງປ້ອງກັນປະເທດຂອງຈີນກ່າວວ່າ, ກອງທັບຈີນມີຫຼັກໝັ້ນຢ່າງເດັດດ່ຽວແລະຈະແຈ້ງໃນບັນຫາປົກປັກຮັກສາອະທິປະໄຕແຫ່ງຊາດແລະຜືນແຜ່ນດິນອັນຄົບຖ້ວນ. ການກະທຳທີ່ຜິດພາດຂອງອາເມລິກາໃນບັນຫາຂາຍອາວຸດໃຫ້ໄຕ້ຫວັນນັ້ນຈະກະທົບກະເທືອນເຖິງການພົວພັນລະຫວ່າງສອງກອງທັບຈີນອາເມລິກາເຊິ່ງແມ່ນເລື່ອງທີ່ຫຼີກລ້ຽງບໍ່ໄດ້.
ມື້ດຽວກັນ, ໂຄສົກຫ້ອງການວຽກງານໄຕ້ຫວັນລັດຖະບານຈີນຊີ້ອອກວ່າ, ແຜ່ນດິນໃຫຍ່ຫວັງຢາກໃຫ້ໄຕ້ຫວັນຈົ່ງຮັບຮູ້ສະຖານະການຢ່າງແທ້ຈິງ, ຢ່າກໍ່ໃຫ້ເກີດມີການເປັນປໍລະປັກກັນລະຫວ່າງສອງຝັ່ງຊ່ອງແຄບ, ຢ່າທຳລາຍສະຖຽນລະພາບຂອງເຂດຊ່ອງແຄບໄຕ້ຫວັນ, ແລະຢ່າສ້າງໃຫ້ມີການກະທົບກະເທືອນເຖິງການຂະຫຍາຍການພົວພັນສອງຝັ່ງໂດຍສັນຕິ.
