ຜົນສຳເລັດຂອງຮູບການໃໝ່ໃນການກະຈາຍສຽງແລະພາບສາກົນຂອງCRI
(GMT+08:00) 2011-09-22 18:13:23 cri
ທ່ານຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງສປປລາວໄດ້ເດີນທາງໄປຢ້ຽມຢາມວິທະຍຸສາກົນແຫ່ງປະເທດຈີນຫຼືCRIໃນວັນທີ21ກັນຍານີ້ເພື່ອເຂົ້າຮ່ວມພິທີລະລຶກການອອກອາກາດຂອງCRI FM 93 Mhzທີ່ນະຄອນຫຼວງວຽງຈັນຄົບຮອບ5ປີແລະຂຽນຄຳອວຍພອນວິທະຍຸສາກົນແຫ່ງປະເທດຈີນສ້າງຕັ້ງຂຶ້ນຄົບຮອບ70ປີ.ນີ້ເປັນເຫດການທີ່ມີໜ້ອຍທີ່ສຸດທີ່ປະມຸກລັດຕ່າງປະເທດໄດ້ຢ້ຽມຢາມສຳນັກງານສື່ມວນຊົນແຫ່ງໜຶ່ງແລະຮ່ວມກັນສະເຫຼີມສະຫຼອງວັນລະລຶກການອອກອາກາດຂອງສາຂາວິທະຍຸຂອງສື່ມວນຊົນນີ້.ຊຶ່ງຖືວ່າເປັນກຽດພິເສດສຳລັບ CRI ໃນນາມເປັນສື່ມວນຊົນແລະກໍ່ໄດ້ພິສູດໃຫ້ເຫັນເຖິງຜົນສຳເລັດຂອງຮູບການໃໝ່ຂອງCRIໃນການກະຈາຍສຽງແລະພາບສາກົນຊຶ່ງມີຈຸດປະສົງເພື່ອເຜີຍແຜ່ມິດຕະພາບ,ຊຸກຍູ້ການແລກປ່ຽນຊຶ່ງກັນແລະກັນ.
ຫວນຄືນ5ປີກ່ອນໜ້ານີ້,ໃນເວລາCRI FM 93 Mhzເລີ່ມອອກອາກາດຢູ່ນະຄອນຫຼວງວຽງຈັນຂອງລາວ,ທ່ານຫູຈິນທ່າວ ປະທານປະເທດຈີນແລະທ່ານຈູມມາລີໄຊຍະສອນ ປະທານປະເທດລາວໄດ້ຮ່ວມກັນກົດປຸ່ມການເລີ່ມອອກອາກາດ,ນັ້ນກໍ່ເປັນເຫດການທີ່ບໍ່ເຄີຍມີມາກ່ອນໃນປະຫວັດການກະຈາຍສຽງສາກົນ.ໃນເວລາຕ້ອນຮັບການເຂົ້າສຳພາດຂອງນັກຂ່າວCRIໃນປີ2009,ທ່ານປະທານຈູມມາລີ ໄຊຍະສອນໄດ້ກ່າວວ່າ,ລາຍການCRIໄດ້ໃຫ້ຂ່າວຄາວຂໍ້ມູນທີ່ວ່ອງໄວໜ້າເຊື່ອຖື,ໃຫ້ສາລະຄວາມຮູ້ອັນເປັນຜົນປະໂຫຍດແກ່ຜູ່ຟັງລາວ,ລັດຖະບານລາວຖື CRI ເປັນອົງປະກອບຂອງສື່ມວນຊົນໃນສັງຄົມລາວ.ໃນເວລາຢ້ຽມຢາມ CRIໃນວັນທີ21ກັນຍານີ້,ທ່ານປະທານຈູມມາລີໄຊຍະສອນໄດ້ກ່າວຄຳປາໃສໂດຍຊີ້ອອກວ່າ,ວິທະຍຸສາກົນແຫ່ງປະເທດຈີນ CRIໄດ້ເຮັດວຽກຢ່າງຫ້າວຫັນໃນການໂຄສະນາພາບພົດອັນດີງາມຂອງຈີນແລະກິດຈະກຳຕ່າງໆກ່ຽວກັບການພົວພັນຮ່ວມມືລາວ-ຈີນໃຫ້ປະຊາຊົນລາວກໍ່ຄືຊາວໂລກຮູ້.CRIໄດ້ເຮັດໜ້າທີ່ອັນສຳຄັນໃນການເສີມສ້າງຄວາມເຂົ້າໃຈ,ເສີມສ້າງມິດຕະພາບແລະສັນຕິພາບລະຫວ່າງປະຊາຊົນຈີນກັບປະຊາຊາດຕ່າງໆ.
ຄຳຍ້ອງຍໍCRIຂອງທ່ານຈູມມາລີ ໄຊຍະສອນບໍ່ພຽງແຕ່ໄດ້ສະແດງໃຫ້ເຫັນວ່າໃນສາຍຕາຂອງທ່ານສື່ມວນຊົນຂອງຈີນແມ່ນຕ່າງກັນກັບບາງສື່ມວນຊົນຂອງປະເທດຕາເວັນຕົກແລະກໍ່ໄດ້ພິສູດໃຫ້ເຫັນວ່າສື່ມວນຊົນຈີນໄດ້ບຸກເບີກຮູບແບບໃໝ່ທີ່ມີສີສັນພິເສດຂອງຈີນໃນການກະຈາຍສຽງແລະພາບຕໍ່ສາກົນ,ໄດ້ປະຕິບັດແນວຄິດການຕ່າງປະເທດຂອງຈີນຄື ການກ້າວໄປຕາມເສັ້ນທາງພັດທະນາໂດຍສັນຕິ,ຊຸກຍູ້ການກໍ່ສ້າງໂລກທີ່ກົມກຽວກັນ.
ຕາມທຳມະດາ,ເມື່ອມີສື່ມວນຊົນຕ່າງປະເທດ ໂດຍສະເພາະແມ່ນສື່ມວນຊົນຈາກປະເທດຕາເວັນຕົກເຂົ້າສູ່ປະເທດໃດໜຶ່ງແລ້ວ, ມັກໃຊ້ວິທີລາຍງານຂ່າວທີ່ເປີດເຜີຍຂໍ້ຂາດຕົກບົກຜ່ອງຈົນວ່າໃຊ້ຮູບການເສກສັນຍຸຍົງເຫດການຫຍໍ້ທໍ້,ທຳລາຍໂສມໜ້າຂອງປະເທດທີ່ພວມພັດທະນາ,ແລະເອົາທັດສະນະຄ່ານິຍົມຂອງຕົນເຜີຍແຜ່ຕໍ່ປະຊາຊົນປະເທດນັ້ນ,ເຮັດໃຫ້ຜູ່ຟັງຜູ່ເບິ່ງຍາກທີ່ຈະຮູ້ສຶກເປັນມິດ.
ແຕ່ຄວາມແຕກຕ່າງກັນລະຫວ່າງວິທະຍຸCRIກັບສື່ມວນຊົນຕາເວັນຕົກແມ່ນ,ຈຸດປະສົງຂອງCRIແມ່ນເພື່ອເພີ່ມຄວາມເຂົ້າໃຈແລະມິດຕະພາບລະຫວ່າງປະຊາຊົນຈີນກັບປະຊາຊົນປະເທດຕ່າງໆໃນໂລກ,ຕອບສະໜອງການບໍລິການເພື່ອຊຸກຍູ້ການແລກປ່ຽນ,ການຮ່ວມມືແລະການພັດທະນາຮ່ວມກັນລະຫວ່າງຈີນກັບບັນດາປະເທດໃນໂລກ.5ປີມານີ້,CRIໄດ້ສະໜອງການບໍລິການຂໍ້ມູນຂ່າວສານໃຫ້ແກ່ຜູ່ຟັງລາວທີ່ພວມດຳເນີນ ພາລະກິດປ່ຽນແປງໃໝ່ໃນການພັດທະນາປະເທດ,ລາຍງານໂລກຢ່າງພາວະວິໄສ,ພ້ອມກັນນັ້ນ,ຍັງໄດ້ລາຍງານຜົນສຳເລັດຕ່າງໆທີ່ລາວໄດ້ຮັບໃນວຽກງານສ້າງສາປະເທດແລະສັງຄົມ,ພ້ອມດ້ວຍຖານະບົດບາດຂອງລາວໃນເວທີສາກົນແລະພາກພື້ນ,ສະນັ້ນ,CRIຈຶ່ງໄດ້ຮັບຄວາມເຊື່ອໝັ້ນຈາກລັດຖະບານແລະປະຊາຊົນລາວ.ຄືດັ່ງຄຳເວົ້າຂອງທ່ານປະ ທານຈູມມາລີ ໄຊຍະສອນທີ່ເວົ້າວ່າ "CRIໄດ້ເຮັດໜ້າທີ່ອັນສຳຄັນໃນການເສີມສ້າງຄວາມເຂົ້າໃຈ,ເສີມສ້າງມິດຕະພາບແລະສັນຕິພາບລະຫວ່າງປະຊາຊົນຈີນກັບປະຊາຊາດປະເທດຕ່າງໆ".
ສາເຫດອີກອັນໜຶ່ງທີ່CRIຖືກຖືເປັນພາກສ່ວນໜຶ່ງຂອງສື່ມວນຊົນລາວກໍແມ່ນຍ້ອນ ວ່າ,CRIໄດ້ສ້າງການພົວພັນຮ່ວມມືຢ່າງສະໜິດແໜ້ນກັບວິທະຍຸກະຈາຍສຽງແຫ່ງຊາດລາວ,ໄດ້ດຳເນີນການທົດລອງຢ່າງມີຜົນສຳເລັດທາງດ້ານກົນໄກການຮ່ວມມື,ການແລກປ່ຽນແລະອົບຮົມຍົກລະດັບພະນັກງານ,ແລະການຈັດທຳລາຍການຢູ່ໃນປະເທດຂອງຜູ່ຟັງ.ຍ້ອນວ່າໄດ້ຮັບຜົນສຳເລັດໃນການຮ່ວມມືຄືແນວນີ້,CRI FM93MHzຈຶ່ງຖືກທ່ານປະທານຈູມມາລີ ໄຊຍະສອນເອີ້ນເປັນແບບຢ່າງຂອງການຮ່ວມມືທີ່ດີລະຫວ່າງສື່ມວນຊົນລາວແລະຈີນ.
ຮູບແບບໃໝ່ໃນການກະຈາຍສຽງແລະພາບຢູ່ສາກົນCRIຍັງໄດ້ຮັບຄວາມເຫັນດີເຫັນພ້ອມຢູ່ບາງປະເທດ.ຕົວຢ່າງຄື,ຢູ່ກຳປູເຈຍ,CRIກັບວິທະຍຸກະຈາຍສຽງແຫ່ງຊາດກຳປູເຈຍຮ່ວມມືກັນສ້າງຕັ້ງ "ວິທະຍຸມິດຕະພາບຈີນກຳປູເຈຍ",ນັບແຕ່ເລີ່ມກະຈາຍສຽງໃນປີ2008ຢູ່ພະນົມເປັນເປັນຕົ້ນມາ,ໄດ້ຮັບຄວາມນິຍົມຊົມຊອບຈາກຜູ່ຟັງກຳປູເຈຍຢ່າງກວ້າງຂວາງ.ແລະເມື່ອບໍ່ດົນມານີ້,ຜ່ານການອະນຸມັດຂອງລັດຖະບານກຳປູເຈຍ,CRIກັບວິທະຍຸກະຈາຍສຽງແຫ່ງຊາດກຳປູເຈຍໄດ້ສ້າງ "ວິທະຍຸມິດຕະພາບຈີນກຳປູເຈຍ"ແຫ່ງທີສອງຢູ່ເມືອງຊຽມຣຽບ,ເພື່ອຕອບສະໜອງການບໍລິການຂໍ້ມູນຂ່າວສານໃຫ້ແກ່ຜູ່ຟັງກຳປູເຈຍຫຼາຍກວ່າເກົ່າ.
