ທ່ານຫຼີຊ່າງຊຸ່ນຮຽກຮ້ອງໃຫ້ປະເທດຕ່າງໆຂອງອາຊີແລະເອີລົບລົງເລິກການຮ່ວມມື ພ້ອມກັນຜ່ານຜ່າຄວາມຫຍຸ້ງຍາກ
(GMT+08:00) 2011-09-23 17:57:21 cri
ວັນທີ23ກັນຍານີ້, ຢູ່ນະຄອນສີ່ອ່ານແຂວງສານຊີ່ຂອງຈີນ,ທ່ານຫຼີຊ່າງຊຸ່ນ, ກຳມະການປະຈຳກົມການເມືອງສູນກາງພັກກອມມູນິດຈີນຊີ້ອອກວ່າ, ປະຈຸບັນ, ຕະຫຼາດການເງິນສາກົນມີຄວາມປັ່ນປ່ວນຢ່າງຮຸນແຮງ, ຄວາມບໍ່ໝັ້ນໃຈແລະຄວາມບໍ່ໝັ້ນທ່ຽງຕໍ່ການຟື້ນຕົວຂອງເສດຖະກິດໂລກໄດ້ເພີ່ມຫຼາຍຂຶ້ນຕື່ມ, ໄດ້ນຳເອົາສິ່ງທ້າທາຍທີ່ຮ້າຍແຮງອັນໃໝ່ໃຫ້ແກ່ລັດຖະບານຂອງປະເທດຕ່າງໆໃນການປົກຄອງລັດແລະໃຫ້ແກ່ວິສາຫະກິດໃນການດຳເນີນທຸລະກິດ. ປະເທດຕ່າງໆຂອງອາຊີແລະເອີລົບຄວນເບິ່ງກວ້າງມອງໄກ, ລົງເລິກການຮ່ວມມື, ມີຄວາມໂອບອ້ອມອາລີແລະຊ່ວຍເຫຼືອເຊິ່ງກັນແລະກັນ,ພ້ອມກັນຜ່ານຜ່າຄວາມຫຍຸ້ງຍາກ.
ມື້ດຽວກັນ, ໃນເວລາເຂົ້າຮ່ວມພິທີໄຂກອງປະຊຸມເວທີປຶກສາຫາລືເສດຖະກິດອາຊີເອີລົບປະຈຳປີ2011, ທ່ານຫຼີຊາງຊຸ່ນໄດ້ກ່າວຄຳປາໄສວ່າ, ກອງປະຊຸມເວທີປຶກສາຫາລືຄັ້ງນີ້ມີຫົວຂໍ້ວ່າ "ປະດິດສ້າງໃໝ່ການຮ່ວມມືລະຫວ່າງອາຊີເອີລົບ,ນຳໃຊ້ໂອກາດໃນດ້ານການຫັນຮູບການ", ມີຈຸດປະສົງເພື່ອຊອກຫາໂອກາດແລະຊ່ອງທາງໃນດ້ານການຮ່ວມມືແບບໃໝ່ໃຫ້ປະເທດຕ່າງໆໃນໂລກ, ຊຸກຍູ້ເສດຖະກິດຂອງປະເທດຕ່າງໆໃນໂລກໃຫ້ພັດທະນາຢ່າງໝັ້ນທ່ຽງ,ມີປະສິດທິພາບສູງແລະຍືນຍົງ. ທ່ານສະເໜີໃຫ້ປະເທດຕ່າງໆຂອງອາຊີແລະເອີລົບຊຸກຍູ້ຂະບວນການເສດຖະກິດໃນພາກພື້ນເຊື່ອມໂຍງເຂົ້າກັນ;ລົງເລິກການຮ່ວມມືໃນຂົງເຂດຊັບພະຍາກອນດ້ານພະລັງງານ; ເອົາໃຈໃສ່ການຮ່ວມມືໃນຂົງເຂດວິທະຍາສາດເຕັກໂນໂລຊີທີ່ທັນສະໄໝ; ຮັດແໜ້ນການແລກປ່ຽນທາງດ້ານວັດທະນະທຳແລະການຮ່ວມມືໃນການປັບປຸງຊີວິດການເປັນຢູ່ຂອງປະຊາຊົນ,ລົງເລິກການຮ່ວມມືຕື່ມອີກ,ເພື່ອພ້ອມກັນຜ່ານຜ່າຄວາມຫຍຸ້ງຍາກ.
ມື້ດຽວກັນນີ້, ທ່ານຫຼີຊາງຊຸ່ນຍັງໄດ້ພົບປະເຈລະຈາກັບຜູ້ນຳແລະອະດີດຜູ້ນຳທີ່ສຳຄັນຫຼາຍຄົນຂອງຕ່າງປະເທດເຊັ່ນ:ທ່ານກຽດ ຊຸ່ນ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການເງິນກຳປູເຈຍ, ທ່ານມີໄຮ ໂມໂດວານູ, ຮອງນາຍົກລັດຖະມົນຕີມົນດາວີແລະຜູ້ນຳອື່ນໆທີ່ມາເຂົ້າຮ່ວມກອງປະຊຸມເວທີປຶກສາຫາລືໃນຄັ້ງນີ້.
