ຕາມຂ່າວ CRI: ໃນຕອນບາຍຂອງວັນທີ 22 ກັນຍານີ້, ທີ່ຫ້ອງວ່າການລັດຖະບານພະນະທ່ານ ອາຊ່າງ ລາວລີ,ຮອງນາຍົກລັດຖະມົນຕີແຫ່ງສາທາລະນະລັດ ປະຊາທິປະໄຕປະຊາຊົນລາວໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຊາວໜຸ່ມເຂດກວາງຊີຂອງຈີນ,ຊຶ່ງນຳໂດຍທ່ານ ນາງ ເຢັນຊວງ,ຫົວໜ້າຄະນະຜູ້ແທນ, ຮອງເລຂາຄະນະບໍລິຫານງານຊາວໜຸ່ມເຂດກວາງຊີຂອງຈີນ,ຮອງປະທານສະມາຄົມນັກທຸລະກິດໜຸ່ມ ຈີນ-ອາຊຽນເຂດກວາງຊີ ພ້ອມດ້ວຍຄະນະຜູ້ແທນນັກທຸລະກິດໜຸ່ມຂອງຈີນ.
ໃນການເຂົ້າຢ້ຽມຂໍ່ານັບຄັ້ງນີ້, ທ່ານຮອງນາຍົກລັດຖະມົນຕີ ຂອງລາວ ໄດ້ຕີລາຄາສູງຕໍ່ການມາຢ້ຽມຢາມເຮັດວຽກຂອງຄະນະຊາວໜຸ່ມກວາງຊີ ເພື່ອເປັນການປະກອບສ່ວນສຳຄັນໃນການເພີ່ມທະວີມິດຕະພາບແລະການພົວພັນຮ່ວມມືສອງຝ່າຍບົນຈິດໃຈການພົວພັນຮ່ວມມືຮ່ວມມືຍຸດທະສາດຮອບດ້ານ-ຍາວນານ, ແລະປະກອບສ່ວນເຂົ້າໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນຄົບຮອບ 50 ປີ.
ໃນໂອກາດດຽວກັນນີ້, ທ່ານ ນາງ ເຢັນຊວງ ຫົວໜ້າຄະນະຜູ້ແທນນັກທຸລະກິດ ໜຸ່ມເຂດກວາງຊີຂອງຈີນ ໄດ້ສະແດງຄວາມຂອບອົກຂອບໃຈຢ່າງສູງຕໍ່ ທ່ານຮອງນາຍົກລັດຖະມົນຕີຂອງລາວ ໃຫ້ກຽດຕ້ອນຮັບຢ່າງອົບອຸ່ນແລະເປັນກຽດຢ່າງສູງແກ່ຄະ ນະຜູ້ແທນຂອງຈີນ.ທ່ານກ່າວວ່າ:ຄະນະຊາວໜຸ່ມເຂດກວາງຊີຂອງຈີນຈະຊອກຫາທຸກວິທີທາງເພື່ອຊ່ວຍເຫຼືອຊາວໜຸ່ມລາວ ໃນຫຼາຍດ້ານແລະຈະຮັດແໜ້ນສາຍພົວພັນມິດຕະບາບລະຫວ່າງສອງຄະນະຊາວໜຸ່ມລາວ-ຈີນ ຕາມທິດຊີ້ນຳຂອງຜູ້ນຳທັງສອງປະເທດ ຄື: "ໝັ້ນຄົງ-ຍາວນານ, ເພື່ອນບ້ານທີ່ເປັນມິດ, ໄວ້ເນື້ອເຊື່ອໃຈກັນ,ຮ່ວມມືຮອບດ້ານ" ແລະຈິດໃຈແຫ່ງ"ເພື່ອນບ້ານທີ່ດີ, ສະຫາຍທີ່ດີ ,ເພື່ອນມິດທີ່ດີແລະຄູ່ຮ່ວມມືທີ່ດີ".
ນອກນີ້, ຕອນບ່າຍວັນດຽວກັນ, ທີ່ນະຄອນຫຼວງວຽຈັນ ຍັງໄດ້ຈັກກອງປະຊຸມພົບປະນັກທຸລະກິດໜຸ່ມລາວ-ຈີນ,ສອງຝ່າຍໄດ້ມີການແລກປ່ຽນຄວາມເຫັນຢ່າງກ້ວາງຂວາງ ເພື່ອຊອກຫາຊອ່ງທາງໃນການສຶກສາຄວາມເປັນໄປໄດ້ໃນການລົງທຶນໂດຍກົງຫຼືລົງທຶນຮ່ວມກັນໃນອານາຄົດ,ສືບຕໍ່ຮັດແໜ້ນສາຍພົວພັນມິດຕະພາບຍາວນານແລະໝັ້ນຄົງລະຫວ່າງສອງຊາດລາວ-ຈີນ ກໍຄືຊາວໜຸ່ມປະຊາຊົນປະຕິວັດລາວແລະຊາວໜຸ່ມພັກກອມມູນິດຈີນ.
