ຈີນຈະເພີ່ມທະວີການສ້າງຖັນແຖວວິທະຍາສາດເຕັກໂນໂລຊີ
(GMT+08:00) 2011-09-23 18:42:33 cri
ວັນທີ22ກັນຍານີ້,ຢູ່ເມືອງທຽນສິນ,ຊຶ່ງເປັນເມືອງທ່າກຳປັ່ນຢູ່ທາງພາກເໜືອຂອງປະເທດ ຈີນ,ກອງປະຊຸມປະຈຳປີຄັ້ງທີ13ຂອງສະມາຄົມວິທະຍາສາດເຕັກໂນໂລຊີຈີນໄດ້ໄຂຂຶ້ນ,ຫົວຂໍ້ຂອງກອງປະຊຸມຄັ້ງນີ້ແມ່ນ "ການປະດິດສ້າງວິທະຍາສາດເຕັກໂນໂລຊີກັບການພັດທະນາອຸດສາຫະກຳຈະເລີນໃໝ່ທີ່ເປັນແນວທາງຍຸດທະສາດ".ທ່ານນາງລິວອຽນຕົ່ງ,ທີ່ປຶກສາແຫ່ງລັດຈີນກ່າວເນັ້ນວ່າ,ໃນອະນາຄົດ,ຈີນຈະເອົາໃຈໃສ່ເຂົ້າໃນການພັດທະນາວຽກງານວິທະຍາສາດເຕັກໂນໂລຊີໃຫ້ຫຼາຍກວ່າເກົ່າ,ແລະເພີ່ມທະວີການສ້າງຖັນແຖວນັກວິທະຍາສາດເຕັກໂນໂລຊີຕື່ມອີກ.
ທ່ານນາງລິວອຽນຕົ່ງກ່າວວ່າ,ປະຈຸບັນນີ້,ການພັດທະນາວິທະຍາສາດເຕັກໂນໂລຊີຂອງຈີນໄດ້ກ້າວເຂົ້າສູ່ໄລຍະປະດິດສ້າງທີ່ຟົດຟື້ນທີ່ສຸດ.ພະນັກງານວິທະຍາສາດເຕັກໂນໂລຊີແມ່ນຊັບພະຍາກອນອັນລ້ຳຄ່າທີ່ສຸດຂອງການພັດທະນາວິທະຍາສາດເຕັກໂນໂລຊີຂອງຈີນ,ແມ່ນກຳລັງສຳຄັນທີ່ມີຄຸນຄ່າທາງດ້ານຍຸດທະສາດໃນການສ້າງສາທັນສະໄໝຂອງຈີນ.ທ່ານກ່າວເນັ້ນວ່າ,ໃນໄລຍະຕໍ່ໜ້າ,ສູນກາງຈີນຈະສືບຕໍ່ສ້າງແລະປັບປຸງກົນໄກທີ່ຮັບປະກັນໃຫ້ວຽກງານວິທະຍາສາດເຕັກໂນໂລຊີໄດ້ຮັບການພັດທະນາກ່ອນໝູ່,ເອົາໃຈໃສ່ການບຳລຸງສ້າງຖັນແຖວນັກວິຊາການດ້ານວິທະຍາສາດເຕັກໂນໂລຊີໃຫ້ຫຼາຍຂຶ້ນ.ທ່ານນາງລິວອຽນຕົ່ງກ່າວຕໍ່ໄປວ່າ:"ຄວນເພີ່ມການຊີ້ນຳແລະຊ່ວຍເຫຼືອຕໍ່ພະນັກງານວິທະຍາສາດເຕັກໂນໂລຊີ,ເພີ່ມງົບປະມານຮັບໃຊ້ເຂົ້າໃນດ້ານນີ້,ຕັ້ງໜ້າພັດທະນາສະພາບແວດລ້ອມທາງກົດໝາຍນະໂຍບາຍ,ສະພາບແວດລ້ອມທາງຕະຫຼາດແລະສິ່ງແວດລ້ອມທາງສັງຄົມວັດທະນະທຳໃຫ້ແກ່ການພັດທະນາວິທະຍາສາດເຕັກໂນໂລຊີ."
ທ່ານຮານສີເຕີ,ປະທານສະມາຄົມວິທະຍາສາດເຕັກໂນໂລຊີຈີນກ່າວວ່າ,ປະຈຸບັນນີ້,ພະ ນັກງານວິທະຍາສາດເຕັກໂນໂລຊີໃນທົ່ວປະເທດຈີນມີເກືອບ58ລ້ານຄົນ,ພວກເຂົາເຈົ້າ ແມ່ນຊັບພະຍາກອນອັນລ້ຳຄ່າແຫ່ງຊາດ,ຕ້ອງຖືຊັບພະຍາກອນເຫຼົ່ານີ້ເປັນຊັບພະຍາກອນອັນດັບໜຶ່ງ,ປຸກລະດົມຄວາມຫ້າວຫັນຂອງພະນັກງານວິທະຍາສາດເຕັກໂນໂລຊີ,ເຮັດໃຫ້ພວກເຂົາເຈົ້າມີບ່ອນນຳໃຊ້ຄວາມສາມາດຂອງຕົນແລະບໍ່ມີຄວາມວິຕົກກັງວົນ,ຮັກສາຄວາມກະຕືລືລົ້ນແລະພະລັງຊີວິດໃນການປະດິດສ້າງໂດຍຕະຫຼອດ.ທ່ານຮານສີເຕີກ່າວວ່າ:"ພວກຂ້າພະເຈົ້າຍັງຈະເປີດເວທີໃຫ້ກວ້າງຂວາງກວ່າເກົ່າເພື່ອເຮັດໃຫ້ພະນັກງານວິທະຍາສາດເຕັກນິກປະກອບຄຳຄິດຄຳເຫັນ,ເຮັດໃຫ້ພວກເຂົາເຈົ້າຮັບຮູ້ເຖິງຄວາມເຫັນດີເຫັນພ້ອມ,ຄວາມລົບນັບຖືຈາກລັດຖະບານແລະສັງຄົມ."
