ລັດຖະບານຊົ່ວຄາວຂອງລີບີຈະສ້າງຕັ້ງຂຶ້ນພາຍໃນບໍ່ທໍ່ໃດມື້ ອະດີດນາຍົກລັດຖະມົນຕີບລີບີຖືກຈຳຄຸກເຄິ່ງປີຢູ່ຕຸຍນີຊີ
(GMT+08:00) 2011-09-24 15:57:28 cri
ທ່ານອັບເດວ ຮາຟິສ ໂກກາ, ໂຄສົກຄະນະກຳມະການຊົ່ວຄາວແຫ່ງຊາດລີບີທີ່ກຳອຳນາດຢູ່ປັດຈຸບັນກ່າວໃນວັນທີ 23 ກັນຍານີ້ວ່າ:ລັດຖະບານຊົ່ວຄາວລີບີຈະສ້າງຕັ້ງຂຶ້ນພາຍໃນບໍ່ທໍ່ໃດມື້ຂ້າງຫນ້ານີ້.
ທ່ານໂກກາກ່າວວ່າ:ຄະນະກຳມະການຊົ່ວຄາແຫ່ງຊາດລີບີໄດ້ມີຄວາມເຫັນເປັນເອກະສັນກັນກ່ຽວກັບຜູ່ທີ່ຮັບເລືອກຕັ້ງເປັນລັດຖະມົນຕີບາງກະຊວງແລະຜູ່ທີ່ຈະຮັບຕຳແຫນ່ງສຳຄັນໃນລັດຖະບານຊົ່ວຄາວແລ້ວ, ເຊິ່ງລັດຖະບານຈະປະກອບດ້ວຍລັດຖະມົນຕີ 22 ທ່ານແລະຮອງນາຍົກລັດຖະມົນຕີ 1 ທ່ານ.
ກ່ອນນີ້,ຄະນະກຳມະການດັ່ງກ່າວເຄີຍປະກາດວ່າເຂດພາກໃຕ້ຂອງລີບີໄດ້ຮັບການປົດປ່ອຍຫມົດແລ້ວ.ປັດຈຸບັນ, ກອງທະຫານຂອງຄະນະກຳມະການນີ້ຍັງພວມປິດລ້ອມເມືອງເຊີດ,ທີ່ເປັນບ້ານເກີດຂອງທ່ານກັດດາຟີແລະເມືອງບານີວາລິດທີ່ເປັນອີກເຂດຫນຶ່ງທີ່ກັດດາຟີຄວບຄຸມ.
ວັນທີ 22 ກັນຍານີ້, ກະຊວງຕຸລາການຂອງຕຸຍນີຊີເຜີຍວ່າ,ທ່ານອານ ບັກດາດີ ອານ ມາມຸດີ,ອະດີດນາຍົກລັດຖະມົນຕີລີບີພ້ອມກັບພັກພວກອີກສອງຄົນທີ່ຢາກຜ່ານຕຸຍນີຊີເດີນທາງໄປອານເຊຣີຖືກຕຸຍນີຊີຈັບຕົວແລ້ວ, ສານທ້ອງຖີ່ນໄດ້ຕັດສິນໃຫ້ຈຳຄຸກທ່ານເປັນເວລາ 6 ເດືອນແລະປະຕິບັດໃນທັນທີ.
ມື້ດຽວກັນ, ສະຖານທູດອາເມລິກາປະຈຳລີບີໄດ້ເປີດບໍລິການຄືນໃຫມ່ຢູ່ນະຄອນຫລວງຕຼີໂປລີຂອງລີບີ.ເອກອັກຄະລັດຖະທູດອາເມລິກາປະຈຳລີບີກ່າວວ່າ,ຈະອອກແຮງຊ່ວຍບໍລິສັດອາເມລິກາໄປເຮັດທຸລະກິດຢູ່ລີບີ.
