ວັນທີ23ກັນຍານີ້,ນາງຖູໂຢ່ວໂຢວ, ນັກຄົ້ນຄວ້າຕະຫຼອດຊີວິດຂອງສະຖາບັນວິທະຍາສາດແພດສາດພື້ນເມືອງຈີນໄດ້ຮັບລາງວັນຄົ້ນຄວ້າການປິ່ນປົວພະຍາດປີ2011ຂອງລາງວັນລັສເຄີ ເມດິໂຄເຣັສເຊີດຂອງອາເມລິກາ ເຊິ່ງເປັນລາງວັນແພດສາດສາກົນ,ລາງວັນນີ້ແມ່ນເພື່ອຍ້ອງຍໍສັນລະເສີນນາງທີ່ຄົ້ນພົບຢາປົວໄຂ້ມະເລເຣຍ,ຄື: ສານອາທີອານນູນ. ການຄົ້ນພົບຢາຊະນິດນີ້ສາມາດກອບກູ້ຊີວິດຂອງຄົນໃນໂລກໂດຍສະເພາະແມ່ນປະຊາຊົນໃນປະເທດທີ່ພວມພັດທະນາຫຼາຍລ້ານຄົນ.
ໃນຊຸມປີ1960ຫາ1970,ທີມງານຖູໂຢ່ວໂຢວໄດ້ຮັບແຮງບັນດານໃຈຈາກແພດສາດພື້ນເມືອງຂອງຈີນ,ໄດ້ຄົ້ນພົບວິທີໃໝ່ທີ່ໃຊ້ສານອາທີອານນູນປິ່ນປົວໄຂ້ມະເລເຣຍ. ປະຈຸບັນ, ຢາທີ່ມີສານອາທີອານນູນປະສົມຢູ່ນຳໂດຍພື້ນຖານໄດ້ກາຍເປັນຢາປົວໄຂ້ມະເລເຣຍທີ່ໄດ້ມາດຕະຖານ,ອົງການອະນາໄມໂລກຫຼືWHOຈະຈັດສານອາທີອານນູນແລະຢາທີ່ກ່ຽວຂ້ອງເຂົ້າໃນບັນຊີລາຍຊື່ຢາທົ່ວໄປ.
ລາງວັນລັສເຄີ ເມດິໂຄເຣັສເຊີດໄດ້ສ້າງຕັ້ງຂຶ້ນໃນປີ1946ໂດຍທ່ານອານເບີດ ລັສເຄີ,ຜູ້ອຳນວຍການໃຫຍ່ສື່ໂຄສະນາອາເມລິກາ,ເຊິ່ງຖືກເອີ້ນວ່າ "ບິດາແຫ່ງສື່ໂຄສະນາທັນສະໄໝ"ແລະພັນລະຍາຂອງທ່ານ, ເພື່ອຍ້ອງຍໍສັນສະເສີນນັກວິທະຍາສາດ,ນັກຄົ້ນຄວ້າແພດສາດແລະຜູ້ບໍລິການສາທາລະນະຫຼືອົງການທີ່ໄດ້ມີການປະກອບສ່ວນອັນພົ້ນເດັ່ນເຂົ້າໃນຂົງເຂດຄົ້ນຄວ້າແພດສາດ. ນັບແຕ່ສ້າງຕັ້ງລາງວັນດັ່ງກ່າວເປັນຕົ້ນມາ,ມີນັກວິທະຍາສາດທັງໝົດ300ກວ່າຄົນໄດ້ຮັບລາງວັນ, ໃນນັ້ນ, ມີ80ຄົນໄດ້ຮັບລາງວັນໂນເບວ. ລາງວັນລັສເຄີຖືກເອີ້ນເປັນ "ລາງວັນໂນເບວຂອງອາເມລິກາ"ມາດົນແລ້ວ.
