ຕາມຂ່າວສານຊິນຮວາ:ໃນຫຼາຍມື້ມານີ້,ທົ່ວປະເທດກຳປູເຈຍເກີດມີຝົນຕົກແຮງ,12ແຂວງທົ່ວປະເທດປະສົບໄພນ້ຳຖ້ວມທີ່ມີລະດັບຕ່າງກັນ,ໃນນັ້ນສະພາບໄພນ້ຳຖ້ວມຢູ່ແຂວງກຳປົງທົ່ມແລະແຂວງຊຽມຣຽມໜັກໜ່ວງທີ່ສຸດ.ຕາມລາຍງານສະຖິຕິເບື້ອງຕົ້ນຂອງຄະນະກຳມະການກູ້ໄພແຫ່ງຊາດກຳປູເຈຍສະແດງໃຫ້ເຫັນວ່າ,ນັບຮອດວັນທີ25 ກັນຍານີ້,ໄພນ້ຳຖ້ວມໄດ້ເຮັດໃຫ້ ມີຜູ່ເສຍຊີວິດຢ່າງໜ້ອຍ58ຄົນ,ທົ່ວປະເທດມີເນື້ອທີ່ນາ9ໝື່ນກວ່າເຮັກຕາ,ໂຮງຮຽນ265ແຫ່ງ,ໂຮງໝໍ3ແຫ່ງແລະເຮືອນຢູ່ເກືອບ5000ຫຼັງນ້ຳຖ້ວມ,ປະຊາຊົນໄດ້ຮັບຄວາມເດືອດຮ້ອນຈາກໄພນ້ຳຖ້ວມຫຼາຍກວ່າ1ແສນຄົນ.
ວັນທີ25 ກັນຍານີ້,ທ່ານຮຸນແຊນ ນາຍົກລັດຖະມົນຕີກຳປູເຈຍໄດ້ໄປສຳຫຼວດສະພາບໄພນ້ຳຖ້ວມແລະຢື້ຢາມຖາມຂ່າວປະຊາຊົນໃນເຂດປະສົບໄພຢູ່ແຂວງກຳປົງທົ່ມທີ່ປະສົບໄພຢ່າງໜັກໜ່ວງທີ່ສຸດ.ພ້ອມທັງໄດ້ຮຽກຮ້ອງໃຫ້ຂະແໜງການທີ່ກ່ຽວຂ້ອງດຳເນີນການກອບກູ້ແລະຊ່ອຍເຫຼືອເຂດປະສົບໄພແລະຜູ່ປະສົບໄພເປັນການດ່ວນ,ນັບທັງດ້ານສະບຽງອາຫານແລະຢຸກຢາເພື່ອປິ່ນປົວ.ທ່ານຮຸນແຊນຍັງໄດ້ແນະນຳໃຫ້ກະຊວງການຄ້າສະສົມເຂົ້າຈ້າວ300ໂຕນເພື່ອຊ່ວຍເຫຼືອຜູ່ປະສົບໄພ,ແຈກຢາຍເງິນກູ້ໄພໃຫ້ຄອບຄົວທີ່ມີຄົນເສຍຊີວິດຈາກໄພນ້ຳຖ້ວມຄອບຄົວລະ500ໂດລາ.
