ເປີດເຜີຍຄວາມເປັນຈິງຂອງກອງປະຊຸມກ່ຽວກັບທະເລຈີນໃຕ້ທີ່ຈັດຂຶ້ນໂດຍຟິລິບປິນ
(GMT+08:00) 2011-09-26 20:21:32 cri
ນັບແຕ່ວັນທີ22ຫາວັນທີ23ກັນຍານີ້,ກອງປະຊຸມຂອງຜູ່ຊ່ຽວຊານທາງດ້ານກົດໝາຍທາງທະເລຂອງອາຊຽນກ່ຽວກັບບັນຫາທະເລຈີນໃຕ້ທີ່ຟິລິບປິນເປັນປະທານນັ້ນໄດ້ດຳເນີນໄປ ຢູ່ນະຄອນຫຼວງມານີລາຂອງຟິລິບປິນ.ຜູ່ຮ່ວມປະຊຸມແມ່ນຜູ່ຕາງໜ້າທາງກົດໝາຍຂອງ ບາງປະເທດພາຄີຂອງອາຊຽນ.ນັກວິເຄາະເຫັນວ່າ,ບາງສື່ມວນຊົນຂອງຟິລິບປິນແລະປະເທດຕາເວັນຕົກມີເຈດຕະນາໃນການສ້າງຄວາມເປັນປໍລະປັກກັນລະຫວ່າງອາຊຽນກັບຈີນ.ກອງປະຊຸມຜູ່ຊ່ຽວຊານພາຍໃນປະເທດອາຊຽນເທື່ອນີ້ຖືກເວົ້າໂຍກເກີນຄວາມເປັນຈິງເປັນການກະທຳຮ່ວມກັນທີ່ແນໃສ່ຈີນ.
ກອງປະຊຸມເທື່ອນີ້ມີການພົວພັນກັບຍັດຕິສະບັບໜຶ່ງຊຶ່ງຟິລິບປິນສະເໜີອອກໃນໄລຍະກອງປະຊຸມລັດຖະມົນຕີການຕ່າງປະເທດອາຊຽນທີ່ຈັດຂຶ້ນໃນເດືອນກໍລະກົດປີນີ້ແລະກ່ອນໜ້ານີ້,ປະເທດພາຄີຂອງອາຊຽນບໍ່ຮູ້ຍັດຕິສະບັບນີ້ເລີຍ.ໃນເວລານັ້ນ,ເຈົ້າໜ້າທີ່ຂອງອາຊຽນມີຄວາມວິຕົກກັງວົນຕໍ່ຍັດຕິສະບັບນີ້,ແຕ່ເຈົ້າໜ້າທີ່ຟິລິບປິນກ່າວວ່າ,ຍັດຕິສະບັບນີ້ບໍ່ມີຈຸດປະສົງທີ່ເຂົ້າແທນທິດທາງຊີ້ນຳການກະທຳຕໍ່ໄປທີ່ຈັດຕັ້ງປະຕິບັດ"ຖະແຫຼງການວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້"ຊຶ່ງຝ່າຍຕ່າງໆພວມປຶກສາຫາລືຮ່ວມກັນຢູ່,ເມື່ອຟິລິບປິນມີການສະແດງແບບນີ້ແລ້ວ,ອາຊຽນຈຶ່ງເຫັນດີສົ່ງຜູ່ຊ່ຽວຊານທາງດ້ານກົດໝາຍທາງທະເລໄປຄົ້ນຄວ້າຍັດຕິສະບັບດັ່ງກ່າວຂອງຟິລິບປິນໃນເດືອນກັນຍານີ້ເອງ.
ກອງປະຊຸມທີ່ຈັດຂຶ້ນແຕ່ວັນທີ22ຫາວັນທີ23ກັນຍາເທື່ອນີ້ກໍ່ແມ່ນຈັດຂຶ້ນດ້ວຍເຫດຜົນດັ່ງກ່າວ.ທີ່ຈິງແລ້ວ,ມັນເປັນກອງປະຊຸມຄົ້ນຄວ້າຂອງຜູ່ຊ່ຽວຊານພາຍໃນອາຊຽນ,ບໍ່ສາມາດຕາງໜ້າສັນຍາຮ່ວມແລະຄວາມເຫັນທາງການຂອງອາຊຽນ,ແຕ່ວ່າພັດຖືກບາງສື່ມວນຊົນຂອງຟິລິບປິນແລະປະເທດຕາເວັນຕົກເວົ້າໂຍກເກີນເປັນຈິງເປັນການກະທຳຮ່ວມຂອງອາຊຽນທີ່ມີຈຸດປະສົງແນໃສ່ຈີນ.
ໜັງສືພິມເດລີ ຕີຣບູນຂອງຟິລິບປິນສະບັບວັນທີ24ພິມບົດວິຈານໂດຍຂຽນວ່າ, ຜູ່ຊ່ຽວຊານທີ່ຮ່ວມປະຊຸມບໍ່ໄດ້ບັນລຸຄວາມເຫັນທີ່ເປັນເອກະສັນກັນ,ບໍ່ໄດ້ອະນຸມັດຂອບຂອງ"ເຂດການຮ່ວມມື"ທີ່ສະເໜີໂດຍຟິລິບປິນ,ກໍ່ບໍ່ໄດ້ຮັບຮອງຄວາມຊອບດ້ວຍກົດ ໝາຍສາກົນຂອງຍັດຕິສະບັບນີ້.ລາວແລະກຳປູເຈຍລ້ວນແຕ່ບໍ່ໄດ້ສົ່ງຜູ່ຊ່ຽວຊານເຂົ້າຮ່ວມ ກອງປະຊຸມເທື່ອນີ້,ນີ້ສະແດງໃຫ້ເຫັນແລ້ວວ່າ,ອາຊຽນບໍ່ມີຄວາມເປັນເອກະສັນກັນກ່ຽວກັບບັນ ຫານີ້.
ຍັດຕິຂອງຟິລິບປິນສະບັບນີ້ມີເນື້ອໃນຫຍັງແດ່?ສັງເກດຈາກຂ່າວສານທີ່ສື່ມວນຊົນຟິລິບປິນເປີດເຜີຍຢ່າງບໍ່ຢຸດຢັ້ງຮູ້ໄດ້ວ່າ,ໃນຍັດຕິສະບັບນີ້,ຟິລິບປິນໄດ້ຂີດແບ່ງອັນທີ່ວ່າ "ເຂດທີ່ມີຄວາມຂັດແຍ່ງກັນ"ແລະ"ເຂດທີ່ບໍ່ມີຄວາມຂັດແຍ່ງກັນ".ຟິລິບປິນກ່າວວ່າ,ຢູ່ບາງ "ເຂດທີ່ມີຄວາມຂັດແຍ່ງກັນ"ຢູ່ໝູ່ເກາະນານຊ່າແລະໝູ່ເກາະຊີ່ຊ່າ,ສາມາດເຮັດໃຫ້ບັນດາ ປະເທດທີ່ຮຽກຮ້ອງອະທິປະໄຕນັ້ນຮ່ວມກັນພັດທະນາ.ສ່ວນ"ເຂດທີ່ບໍ່ມີຄວາມຂັດແຍ່ງກັນ",ຄື:ຫາດຊາຍຫຼີຢຸ້ຍທ່ານຢູ່ເທິງໝູ່ເກາະນານຊ່າຂອງຈີນ (ຊຶ່ງຟິລິບປິນເອີ້ນເປັນຫາດ ຊາຍເຣັກໂຕ)ທີ່ຢູ່ພາຍໃນເຂດເສດຖະກິດພິເສດ200ໄມທະເລຂອງຟິລິບປິນນັ້ນ,ຄວນໃຫ້ຟິລິບປິນຄວບຄຸມໂດຍກົງ.
ນັກວິເຄາະຊີ້ອອກວ່າ,ການກະທຳຂອງຟິລິບປິນໄດ້ຝ່າຝືນກັບ"ຖະແຫຼງການກ່ຽວກັບການປະພຶດຂອງບັນດາຝ່າຍໃນທະເລຈີນໃຕ້"ແລະທິດທາງຊີ້ນຳການກະທຳຕໍ່ໄປທີ່ຫາກໍ່ລົງລາຍເຊັນນັ້ນຢ່າງຮຸນແຮງ.ສິ່ງສຳຄັນໃນປະຈຸບັນນີ້ແມ່ນຄວນຮ່ວມກັນຕັ້ງໜ້າຊຸກຍູ້ໃຫ້ບັນຫາທະເລຈີນໃຕ້ເດີນຕາມເສັ້ນທາງທີ່ກຳນົດໄວ້ໃນ "ຖະແຫຼງການວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້"ແລະທິດທາງຊີ້ນຳການກະທຳຕໍ່ໄປ,ການກະທຳໃດໆທີ່ ມີຈຸດປະສົງຕ່າງກັນນັ້ນມີແຕ່ຈະເຮັດໃຫ້ບັນຫາທະເລຈີນໃຕ້ມີຄວາມຫຍຸ້ງຍາກສັບສົນກວ່າເກົ່າ.
