ຈີນຮຽກຮ້ອງອີກເທື່ອໜຶ່ງໃຫ້ອາເມລິກາຍົກເລີກການຕັດສິນໃຈທີ່ບໍ່ຖືກຕ້ອງໃນການຂາຍອາວຸດໃຫ້ໄຕ້ຫວັນ
(GMT+08:00) 2011-09-27 17:34:55 cri
ວັນທີ26ກັນຍານີ້,ທ່ານຢາງເຈສື, ລັດຖະມົນຕີວ່າການກະຊວງການຕ່າງປະເທດຈີນທີ່ພວມເຂົ້າຮ່ວມກອງປະຊຸມສະມັດຊາໃຫຍ່ສະຫະປະຊາຊາດຢູ່ນິວຢອກໄດ້ຮຽກຮ້ອງອີກເທື່ອໜຶ່ງໃຫ້ອາເມລິກາຍົກເລີກການຕັດສິນໃຈທີ່ບໍ່ຖືກຕ້ອງໃນການຂາຍອາວຸດໃຫ້ໄຕ້ຫວັນ.
ມື້ດຽວກັນ, ໃນເວລາພົບປະເຈລະຈາກັບທ່ານນາງຮີລາຣີຄຼິນຕັນ,ລັດຖະມົນຕີວ່າການກະຊວງການຕ່າງປະເທດອາເມລິກາ,ທ່ານຢາງເຈສືກ່າວວ່າ,ການກະທຳທີ່ບໍ່ຖືກຕ້ອງຂອງອາເມລິກາໄດ້ລ່ວງລະເມີດແຈ້ງການຮ່ວມຈີນ-ອາເມລິກາ3ສະບັບຢ່າງໜັກໜ່ວງໂດຍສະເພາະແມ່ນຫຼັກການຂອງ "ແຈ້ງການ17ສິງຫາ",ໄດ້ແຊກແຊງວຽກງານພາຍໃນຂອງຈີນຢ່າງໜັກໜ່ວງ,ທຳລາຍຄວາມໝັ້ນຄົງແຫ່ງຊາດຈີນຢ່າງຮຸ່ນແຮງ,ແລະທຳລາຍວຽກງານທ້ອນໂຮມໂດຍສັນຕິຂອງຈີນແລະການພົວພັນລະຫວ່າງຈີນກັບອາເມລິກາ.
ຈີນຮຽກຮ້ອງໃຫ້ອາເມລິກາເອົາໃຈໃສ່ຢ່າງສູງແລະປະຕິບັດຕໍ່ຫຼັກໝັ້ນອັນເຄັ່ງຂຶມຂອງຈີນຢ່າງເຂັ້ມງວດ, ແກ້ໄຂການກະທຳທີ່ບໍ່ຖືກຕ້ອງໃນການຂາຍອາວຸດໃຫ້ໄຕ້ຫວັນ,ຍົກເລີກການຕັດສິນໃຈທີ່ບໍ່ຖືກຕ້ອງດັ່ງກ່າວໂດຍທັນທີ,ກຳຈັດຜົນກະກົບທີ່ບໍ່ດີ,ຢຸດຕິການຂາຍອາວຸດໃຫ້ໄຕ້ຫວັນແລະການຕິດຕໍ່ພົວພັນທາງການທະຫານລະຫວ່າງອາເມລິກາກັບໄຕ້ຫວັນ,ຮັກສາພາກສ່ວນໃຫຍ່ການພົວພັນລະຫວ່າງຈີນກັບອາເມລິກາດ້ວຍການກະທຳຕົວຈິງ.
ຕໍ່ເລື່ອງນີ້, ທ່ານນາງຮີລາຣີ ຄຼິນຕັນກ່າວວ່າ, ອາເມລິກາປະຕິບັດນະໂຍບາຍຈີນດຽວ, ເອົາໃຈໃສ່ຢ່າງສູງແລະປະຕິບັດຕໍ່ຫຼັກໝັ້ນແລະຄວາມສົນໃຈຂອງຈີນຢ່າງແທ້ຈິງກ່ຽວກັບບັນຫາອາເມລິກາຂາຍອາວຸດໃຫ້ໄຕ້ຫວັນ. ອາເມລິກາຊົມເຊີຍແລະສະໜັບສະໜູນການພົວພັນລະຫວ່າງສອງຝັ່ງຊ່ອງແຄບໄດ້ພັດທະນາໂດຍສັນຕິ,ຈະສືບຕໍ່ສຸມກຳລັງເຂົ້າໃນການຊຸກຍູ້ສັນຕິພາບແລະສະຖຽນລະພາບຂອງຊ່ອງແຄບໄຕ້ຫວັນ. ອາເມລິກາຍິນດີຮ່ວມກັບຈີນແກ້ໄຂຄວາມຂັດແຍ່ງກັນຢ່າງເໝາະສົມ, ຫຼີກເວັ້ນຜົນກະທົບໃນທາງລົບຕໍ່ການຮ່ວມມມືລະຫວ່າງອາເມລິກາກັບຈີນ.
