ບາງປະເທດສະເໜີຄວາມຮຽກຮ້ອງຕ້ອງການຢ່າງເຄັ່ງຂັດຕໍ່ຈີນດ້ວຍເລື່ອງຮັບຮອງຖານະເສດຖະກິດຕະຫຼາດຂອງຈີນນັ້ນແມ່ນບໍ່ມີເຫດຜົນ
(GMT+08:00) 2011-09-27 19:47:03 cri
ຕາມສະຖິຕິຂອງກະຊວງການຄ້າຈີນ,ນັບມາຮອດປະຈຸບັນນີ້,ໃນທົ່ວໂລກ,ໄດ້ມີ81ປະເທດຊຶ່ງລວມທັງຣັດເຊຍ,ເບຼຊິນ,ນູແວນເຊລັງ,ສະວິສແລະອົສຕຼາລີໄດ້ຮັບຮອງຖານະເສດຖະກິດຕະຫຼາດຂອງຈີນ.ແຕ່ອາເມລິກາ,ສະຫະພາບເອີຣົບແລະຍີ່ປຸ່ນພັດຍັງບໍ່ທັນໄດ້ຮັບຮອງເທື່ອ.ທີ່ຈິງແລ້ວ,ອີງຕາມລະບຽບຂອງອົງການການຄ້າໂລກຫຼືWTO, ເມື່ອຈີນໄດ້ເຂົ້າເປັນສະມາຊິກຂອງWTO15ປີແລ້ວ,ກໍ່ຄືໃນປີ2016,ຈີນກໍ່ຈະໄດ້ກາຍເປັນຖານະເສດຖະກິດຕະຫຼາດສົມບູນໂດຍອັດຕະໂນມັດ.ດຣ.ກູ້ຊິ່ງຢາງຂອງສະຖາບັນນະໂຍບາຍສາທາລະນະຫຼີກວນຢູຂອງມະຫາວິທະຍາໄລແຫ່ງຊາດສິງກະໂປກ່າວວ່າ,ການຮັບຮອງຖານະເສດຖະກິດຕະຫຼາດຂອງຈີນກ່ອນເວລາກຳນົດ,ແມ່ນ ການສະແດງຄວາມເປັນມິດຕໍ່ຈີນ.
ໃນບັນດາປະເທດອາຊຽນ,ສິງກະໂປໄດ້ນຳໜ້າຮັບຮອງຖານະເສດຖະກິດຕະຫຼາດຂອງຈີນໃນປີ2004.ຕໍ່ຈາກນັ້ນມາ,ປະເທດອາຊຽນອື່ນອີກ9ປະເທດກໍ່ໄດ້ຮັບຮອງຢ່າງເປັນລຳ ດັບ.ດຣ.ກູ້ຊິ່ງຢາງກ່າວວ່າ,ອາຊຽນກັບຈີນມີທີ່ຕັ້ງພູມສັນຖານໃກ້ຄຽງກັນ,ມີໂຄງປະກອບຜະລິດຕະກຳຕ່າງຝ່າຍຕ່າງຊ່ວຍເຫຼືອກັນ.ສິງກະໂປແລະປະເທດອາຊຽນອື່ນໆລ້ວນແຕ່ເອົາໃຈໃສ່ນຳຖານະບົດບາດຂອງຈີນທີ່ເປັນແມ່ແຮງທາງດ້ານເສດຖະກິດຕະຫຼາດ,ແລະຮັບຮູ້ວ່າ,ຈີນມີທ່ວງທ່າທີຫັນເປັນຕະຫຼາດນັ້ນຢ່າງຈະແຈ້ງທີ່ສຸດ.ປະເທດອາຊຽນຮັບຮອງຖານະເສດຖະກິດຕະຫຼາດຂອງຈີນໂດຍໄວນັ້ນແມ່ນເລື່ອງທີ່ດີແລະເປັນການສະແດງເຖິງຄວາມເປັນມິດຕໍ່ຈີນ,ແມ່ນການຄັດເລືອກທີ່ມີການປະຕິບັດຕົວຈິງ,ແລະມີຜົນປະໂຫຍດຕໍ່ອາຊຽນໂດຍກົງອີກດ້ວຍ.
ທ່ານຈ່ວງເຊິນຈົ່ງ,ຮອງນັກເສດຖະສາດຜູ່ທີໜຶ່ງຂອງທະນາຄານພັດທະນາອາຊີກ່າວວ່າ, ປະເທດອາຊຽນຊົມເຊີຍຈີນທີ່ຈະໄດ້ຮັບຖືກຮັບຮອງເປັນເສດຖະກິດຕະຫຼາດຈາກບັນດາ ປະເທດຫຼາຍກວ່າເກົ່າ.ສິ່ງທີ່ປະຕິເສດບໍ່ໄດ້ແມ່ນ,ຜະລິດຕະພັນຂອງຈີນແລະປະເທດອາຊຽນມີການແກ່ງແຍ່ງກັນໃນຕະຫຼາດສາກົນ.ແຕ່ປະເທດອາຊຽນກັບຈີນມີການພົວພັນທາງດ້ານການຄ້າຢ່າງແໜ້ນແຟ້ນ,ຮູບການການຄ້າລະຫວ່າງກັນຕົ້ນຕໍແມ່ນການຄ້າປຸງແຕ່ງ, ເປັນຕົ້ນແມ່ນປະເທດອາຊຽນໄດ້ສະໜອງວັດຖຸດິບແລະເຄື່ອງຊີ້ນສ່ວນຕ່າງໆໃຫ້ແກ່ອຸດ ສາຫະກຳປຸງແຕ່ງຂອງຈີນ.ເມື່ອຈີນມີຄວາມຮຽກຮ້ອງຕ້ອງການເພີ່ມຫຼາຍຂຶ້ນ,ກໍ່ຈະເພີ່ມການນຳເຂົ້າວັດຖຸດິບຈາກປະເທດອາຊຽນຫຼາຍຂຶ້ນເຊັ່ນດຽວກັນ.ສະນັ້ນ,ເມື່ອເວົ້າລວມແລ້ວ,ນີ້ແມ່ນຕ່າງຝ່າຍຕ່າງໄດ້ຮັບຜົນປະໂຫຍດ.
ສະຫະພາບເອີຣົບແລະອາເມລິກາບໍ່ຍອມຮັບຮອງຖານະທາງດ້ານເສດຖະກິດຕະຫຼາດສົມບູນຂອງຈີນ.ມີນັກວິເຄາະກ່າວວ່າ,ສະຫະພາບເອີຣົບແລະອາເມລິກາເຮັດແນວນີ້,ບໍ່ໄດ້ໝາຍຄວາມວ່າບໍ່ໄດ້ເຫັນທ່ວງທ່າພັດທະນາທາງດ້ານເສດຖະກິດຂອງຈີນ,ແຕ່ແມ່ນຢາກໃຊ້ເລື່ອງນີ້ເປັນຂໍ້ອ້າງເພື່ອບັງຄັບໃຫ້ຈີນຜ່ອນຜັນສັ້ນຍາວໃນບັນຫາອື່ນໆ.
ດຣ.ກູ້ຊິ່ງຢາງກ່າວວ່າ,ເມື່ອໄດ້ເຂົ້າເປັນສະມາຊິກຂອງWTOແລ້ວ,ຖານະທາງດ້ານເສດຖະກິດຂອງຈີນໄດ້ມີການປ່ຽນແປງຢ່າງເຖິງຖອງ.ໃນລະດັບຫັນເປັນຕະຫຼາດແລະການພົວພັນກັບເສດຖະກິດສາກົນ,ຈີນໄດ້ສະແດງໃຫ້ເຫັນລັກສະນະພິເສດຂອງເສດຖະກິດຕະຫຼາດເສລີ.ນອກນີ້,ຈີນໄດ້ເສີມຂະຫຍາຍບົດບາດນັບມື້ນັບສຳຄັນໃນການຄ້າກັບຕ່າງ ປະເທດ.ກົງກັນຂ້າມ,ມີບາງປະເທດຕາເວັນຕົກ,ດ້ານໜຶ່ງເປັນຜູ່ວາງລະບຽບການທາງດ້ານເສດຖະກິດຕະຫຼາດ,ອີກດ້ານໜຶ່ງພັດເປັນຜູ່ທຳລາຍລະບຽບການນີ້ຢ່າງຮຸນແຮງທີ່ສຸດ,ເມື່ອເປັນຄືແນວນັ້ນ,ໃນຄວາມເປັນຈິງແລ້ວແມ່ນເພື່ອປະຕິບັດລັດທິປົກປ້ອງການຄ້າຂອງເຂົາເຈົ້າເອງ.
