ສ້າງໂຄງປະກອບຄວາມປອດໄພອາຊີອັນໃໝ່ດ້ວຍແນວຄິດຮ່ວມມືທີ່ສະຫຼາດຫຼັກແຫຼມ
(GMT+08:00) 2011-09-28 19:36:43 cri
ປີນີ້ແມ່ນຄົບຮອບ60ປີຂອງການລົງລາຍເຊັນໃນ"ສົນທິສັນຍາສັນຕິພາບກັບຍີ່ປຸ່ນ"ທີ່ແຊັນແຟຼນຊິສໂກ.ບາງສື່ມວນຊົນຕາເວັນຕົກເຫັນວ່າ,ໂຄງປະກອບຂອງປະເທດພັນທະມິດອາຊີໂດຍຖືເອົາອາເມລິກາເປັນຜູ່ນຳພາທີ່ຈໍ່ຕົວຂຶ້ນພາຍຫຼັງນັ້ນມາບໍ່ໄດ້ມີການປ່ຽນແປງຫຍັງ.ໂຄງປະກອບນີ້ໄດ້ຮັບການປັບປຸງໃຫ້ໝັ້ນຄົງກວ່າເກົ່າໃນໄລຍະສົງຄາມເຢັນ,ແລະໄດ້ມີການສືບທອດພາຍຫຼັງສົງຄາມເຢັນສິ້ນສຸດລົງຍ້ອນຄວາມເຂັ້ມແຂງຂຶ້ນຂອງຈີນ.
ສິ່ງທີ່ປະຕິເສດບໍ່ໄດ້ນັ້ນກໍແມ່ນ,ປະເທດອາຊີຈຳນວນໜຶ່ງມີຄວາມຮູ້ສຶກວ່າຈະບໍ່ມີຄວາມປອດໄພໃນລະດັບໃດໜຶ່ງຍ້ອນຈີນເຂັ້ມແຂງຂຶ້ນຢ່າງວ່ອງໄວ,ໂດຍສະເພາະແມ່ນມີຄວາມວິຕົກກັງວົນວ່າ,ກຳລັງທາງທະຫານຂອງຈີນເຂັ້ມແຂງຂຶ້ນຈະທຳລາຍຄວາມກ້ຳເກີ່ງກັນທີ່ອາເມລິກາໄດ້ສ້າງຂຶ້ນແລະຮັກສາຢ່າງລະອຽດເປັນເວລາດົນນານມານີ້.ແຕ່ວ່າ,ທຽບໃສ່60ປີກ່ອນ,ໃນທຸກມື້ນີ້,ອາຊີໄດ້ມີການປ່ຽນແປງຢ່າງໃຫຍ່ຫຼວງແລ້ວ.
ອົງກອນເສດຖະກິດທີ່ຈະເລີນໃໝ່ໄດ້ກາຍເປັນກຳລັງອັນສຳຄັນໃນການຊຸກຍູ້ການເຕີບໂຕຂອງໂລກ.ການພັດທະນາໂດຍສັນຕິຂອງຈີນໄດ້ປະກອບສ່ວນຊຸກຍູ້ການຮ່ວມມືໃນພາກພື້ນອາຊີຢ່າງແຂງແຮງ.ປະເທດຕ່າງໆໄດ້ຮັບຜົນປະໂຫຍດຈາກການພັດທະນາຂອງຈີນໂດຍທົ່ວໄປ.ບັນດາປະເທດອາຊີພວມຫຍັບເຂົ້າໃກ້ກັນ,ຫາກບໍ່ແມ່ນອອກຫ່າງໄກກັນ.ການຈໍ່ຕົວຂຶ້ນເປັນສອງກຸ່ມທີ່ເປັນປໍລະປັກກັນຄືນໃໝ່ນັ້ນແມ່ນເລື່ອງທີ່ເປັນໄປບໍ່ໄດ້.ອາຊີໄດ້ກ້າວອອກຈາກສົງຄາມເຢັນແລ້ວ.ແນວຄິດທີ່ຢາກຕັດແຍກຈີນອອກໄປເປັນອີກກຸ່ມໜຶ່ງນັ້ນແມ່ນແນວຄິດທີ່ບໍ່ສະຫຼາດຫຼັກແຫຼມຈັກໜ້ອຍເລີຍ.ຈີນມີຄວາມຂັດແຍ່ງກັນກັບບາງປະເທດໃນບັນຫາອະທິປະໄຕຢູ່ເໜືອຜືນແຜ່ນດິນແລະນ່ານທະເລ.ໃນຫຼາຍປີມານີ້,ຈີນໄດ້ຕັ້ງໜ້າຊຸກຍູ້ການແກ້ໄຂບັນຫານີ້ໂດຍສັນຕິຢ່າງບໍ່ຢຸດຢັ້ງ.ໃນບັນຫາທະເລຈີນໃຕ້,ຈີນພວມພະຍາຍາມແກ້ໄຂຄວາມຂັດແຍ່ງກັນດ້ວຍສັນຕິວິທີ,ຊຸກຍູ້ການຮ່ວມກັນພັດທະນາທະເລຈີນໃຕ້.
ມີບາງປະເທດບໍ່ເຂົ້າໃຈ,ຈົນວ່າມີຄວາມວິຕົກກັງວົນຕໍ່ການພັດທະນາໂດຍສັນຕິຂອງຈີນ.ນີ້ບໍ່ແມ່ນເລື່ອງແປກ.ບາງປະເທດໃຊ້ວິທີປ້ອງກັນຫຼືຕ້ານຢັນກັບຈີນຍ້ອນມີຄວາມວິຕົກກັງ ວົນ,ຈີນກໍ່ບໍ່ຮູ້ສຶກກະຕຸ້ນເສັ້ນ,ແລະຈະບໍ່ປ່ຽນແປງທິດການພັດທະນາໂດຍສັນຕິຂອງຕົນ.
ປະຈຸບັນນີ້,ຢູ່ອາຊີຍັງມີພື້ນຖານສຳລັບການເຕີບໂຕຂອງຈິນຕະນາການສົງຄາມເຢັນ. ສະນັ້ນ,ຕ້ອງລະມັດລະວັງຄວາມອັນຕະລາຍສາມຢ່າງ,ຄື:ໜຶ່ງ,ບາງປະເທດທີ່ເຂັ້ມແຂງ ຢາກນຳເອົາຄວາມເຂັ້ມແຂງຂອງຈີນແລະເງື່ອນໄຂທາງປະຫວັດສາດເປັນຂໍ້ອ້າງ,ເພື່ອເພີ່ມທະວີການພົວພັນທາງດ້ານການທະຫານກັບອາຊີແລະມີຈຸດປະສົງທີ່ແນໃສ່ຈີນ;ສອງ,ມີບາງສື່ມວນຊົນຕາເວັນຕົກຕັ້ງແກ້ງເວົ້າໂຍກເກີນຄວາມເປັນຈິງກ່ຽວກັບບັນຫາທີ່ໄດ້ຜ່ອນຄາຍແລ້ວ,ເວົ້າໂຍກກ່ຽວກັບຄວາມຂັດແຍ່ງກັນລະຫວ່າງຈີນກັບປະເທດໃດໜຶ່ງ ເປັນການປະທະກັນໃນທົ່ວພາກພື້ນ;ສາມ,ມີບາງປະເທດຢາກສວຍໃຊ້ກຳລັງທາງທະຫານຂອງອາເມລິກາເພື່ອສະກັດກັ້ນ.
ເວົ້າສຳລັບການສ້າງໂຄງປະກອບຄວາມປອດໄພອາຊີອັນໃໝ່,ການຄັດເລືອກທີ່ດີທີ່ສຸດແມ່ນກ້າວເດີນໄປໜ້າ.ການກ້າວເດີນໄປໜ້າຕ້ອງການໃຫ້ຝ່າຍຕ່າງໆມີທັດສະນະທີ່ ສ້າງສັນ,ມີຄວາມໃຈກວ້າງແລະມີແນວຄິດປະດິດສ້າງທີ່ຢາກລື່ນກາຍປະເພນີ,ສະເໜີຂໍ້ລິເລີ່ມຫຼາຍກວ່າເກົ່າທີ່ມີຜົນດີຕໍ່ການແກ້ໄຂຄວາມຂັດແຍ່ງກັນ,ປັບປຸງຊ່ອງທາງການແລກ ປ່ຽນແລະປະສານງານໃຫ້ລຸລ່ວງຕື່ມອີກ.ກ່ຽວກັບບັນຫາທະເລຈີນໃຕ້,ຝ່າຍຕ່າງໆຄວນພະຍາຍາມຊຸກຍູ້ການປະຕິບັດ"ຖະແຫຼງການວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້"ແລະທິດທາງຊີ້ນຳການປະຕິບັດຕໍ່ໄປ,ຕັ້ງຫົວຂໍ້ພິຈາລະນາຫຼາຍກວ່າເກົ່າເພື່ອຜ່ອນຄາຍສະຖານະການເຄັ່ງຕຶງຢູ່ເຂດທະເລຈີນໃຕ້,ສ້າງໂຄງປະກອບຄວາມປອດໄພອາຊີອັນໃໝ່ດ້ວຍແນວຄິດຮ່ວມມືທີ່ສະຫຼາດຫຼັກແຫຼມ.
