ອຳນາດການປົກຄອງຂອງລີບີກ່າວໄດ້ພົບເຫັນຮ່ອງຮອຍຂອງລູກຊາຍ ທ່ານກັດດາຟີ2ຄົນ
(GMT+08:00) 2011-09-29 16:51:20 cri
ຕາມຂ່າວສານຊີນຮວາ: ວັນທີ28ກັນຍານີ້, ຢູ່ນະຄອນຫຼວງຕຣີໂປລີ, ໂຄສົກຕຳຫຼວດຂອງອຳນາດການປົກຄອງລີບີກ່າວວ່າ, ປະຈຸບັນ, ໄດ້ຊອກພົບຮ່ອງຮອຍຂອງລູກຊາຍຜູ້ທີ2ແລະລູກຊາຍຜູ້ທີ4ຂອງທ່ານກັດດາຟີຄື:ທ້າວເຊວຟອານອິສລາມແລະທ້າວມູຕາສຊິມກັດດາຟີ,ແຕ່ຍັງບໍ່ຮູ້ຮ່ອງຮອຍຂອງທ່ານກັດດາຟີເທື່ອ.
ໃນກອງປະຊຸມຂ່າວທີ່ຈັດຂຶ້ນຢູ່ຕຣີໂປລີ,ທ່ານອາເມັດ ໂອມາບານີກ່າວວ່າ, ປະຈຸບັນ,ທ້າວເຊວຟ ອານອິສລາມໄດ້ລີ້ຊ່ອນຢູ່ບານີ ວະລິດທີ່ຫ່າງຈາກທິດຕາເວັນອອກສຽງໃຕ້ຂອງຕຣີໂປລີປະມານ 180ກິໂລແມັດ, ສ່ວນທ້າວມູຕາສຊິມ ກັດດາຟີໄດ້ລີ້ຊ່ອນຢູ່ເມືອງເຊີດທ໌ຫ່າງຈາກພາກຕາເວັນອອກຂອງຕຣີໂປລີປະມານ 450ກິໂລແມັດ.
ທ່ານອາເມັດ ໂອມາບານີກ່າວວ່າ, ປະຈຸບັນ, ອຳນາດການປົກຄອງ ລີບີບໍ່ໄດ້ສົນໃຈວ່າທ່ານກັດດາຟີໄປລີ້ຢູ່ໃສ, ແຕ່ສິ່ງທີ່ສຳຄັນແມ່ນປົດປ່ອຍລີບີ,ແລະຮັບປະກັນຄວາມໝັ້ນຄົງຂອງເມືອງທີ່ໄດ້ຮັບການປົດປ່ອຍ. ຫຼັງຈາກນັ້ນ, ອຳນາດການປົກຄອງຂອງລີບີຈະອອກແຮງຊອກຈັບທ່ານກັດດາຟີ. ທ່ານບານີກ່າວເນັ້ນວ່າ, ບໍ່ວ່າທ່ານກັດດາຟີຈະໄປຫຼົບຢູ່ເຂດຊາຍແດນຂອງປະເທດໃດກໍ່ຕາມ,ອຳນາດການປົກຄອງລີບີກໍ່ຈະສືບຕໍ່ຊອກຫາໃຫ້ພົບຈົນໄດ້.
