ເຈົ້າໜ້າທີ່ລີບີເລື່ອນເວລາໃນການສ້າງຕັ້ງລັດຖະບານຊົ່ວຄາວ
(GMT+08:00) 2011-09-30 16:46:35 cri
ທ່ານມາມຸດ ຈີບຼີນ ປະທານຄະນະບໍລິຫານງານຄະນະກຳມະການຊົ່ວຄາວແຫ່ງຊາດລີບີປະກາດໃນວັນທີ29ກັນຍານີ້ຢູ່ນະຄອນຫຼວງຕຼີໂບລີວ່າ,ເຈົ້າໜ້າທີ່ລີບີຕົກລົງເລື່ອນເວລາໃນການປະຕິບັດແຜນການຈັດຕັ້ງລັດຖະບານຊົ່ວຄາວອອກໄປອີກແລະໃນໄລຍະນີ້ຄະນະບໍລິຫານງານຈະສືບຕໍ່ປະຕິບັດໜ້າທີ່ບໍລິຫານງານຕໍ່ໄປ.
ທ່ານຈີບຼີນກ່າວໃນກອງປະຊຸມຂ່າວທີ່ຈັດຂຶ້ນໃນວັນທີ29ກັນຍານີ້ວ່າ,ພາຍຫຼັງຄະນະກຳມະການຊົ່ວຄາວແຫ່ງຊາດລີບີຕົກລົງເລື່ອນເວລາໃນການຈັດຕັ້ງລັດຖະບານຊົ່ວຄາວແລ້ວ,ປະຈຸບັນ,ການປຶກສາຫາລືທີ່ກ່ຽວຂ້ອງທັງໝົດລ້ວນແຕ່ໄດ້ຢຸດຕິແລ້ວ,ມີພຽງແຕ່ຄະນະກຳມະການຊົ່ວຄາວແຫ່ງຊາດສາມາດຄວບຄຸມ ດິນແດນລີບີທັງໝົດແລ້ວ,ຈິ່ງຈະເລີ່ມຈັດຕັ້ງລັດຖະບານຊົ່ວຄາວ.ກ່ອນໜ້ານີ້,ຄະນະກຳມະການຊົ່ວຄາວແຫ່ງຊາດຕົກລົງຈະຮັກສາໂຄງຮ່າງຂອງຄະນະບໍລິຫານງານເພື່ອໃຫ້ຄະນະບໍລິຫານງານເສີມຂະຫຍາຍບົດບາດທີ່ເປັນລັດຖະບານຮັກສາການ.ບາງຕຳແໜ່ງຂອງລັດຖະມົນຕີໃນຄະນະບໍລິຫານງານຈະມີການປັບປຸງ,ແຕ່ບໍ່ໄດ້ໝາຍຄວາມວ່າຈະປັບປຸງຄະນະບໍລິຫານງານຄືນໃໝ່.
ທ່ານຈີບຼີນຍັງກ່າວວ່າ,ຄະນະບໍລິຫານງານໄດ້ສະເໜີໃຫ້ຄະນະກຳມະການຊົ່ວຄາວແຫ່ງຊາດເລີ່ມຕົ້ນປະຕິບັດຕາມຫຼັກການປະຊາທິປະໄຕໂດຍໄວ,ຄະນະກຳມະການຊົ່ວຄາວແຫ່ງຊາດຈະປຶກສາຫາລືຂໍ້ສະເໜີດັ່ງກ່າວໃນອາທິດໜ້າ,ແຕ່ທ່ານຈີບຼີນປະຕິເສດເປີດເຜີຍເນື້ອໃນລະອຽດຂອງຂໍ້ສະເໜີດັ່ງກ່າວ.
