ຈີນຈະເພີ່ມທະວີການນຳເຂົ້າສິນຄ້າ,ຊຸກຍູ້ໃຫ້ການຄ້າພັດທະນາຢ່າງກົມກຽວກັນ
(GMT+08:00) 2011-10-02 15:44:44 cri
ໃນເວທີປຶກສາຫາລືການນຳເຂົ້າສິນຄ້າຂອງຈີນປີ2011ທີ່ຈັດຂຶ້ນຢູ່ຊຽງໄຮ້ໃນຫວ່າງມໍ່ໆມານີ້,ທ່ານຈົ່ງຊ່ານ ລັດຖະມົນຕີຊ່ວຍວ່າການກະຊວງການຄ້າຈີນທັງເປັນຮອງຜູ່ຕາງໜ້າຈີນໃນການເຈລະຈາການຄ້າສາກົນກ່າວວ່າ,ປະຈຸບັນ,ຈີນໄດ້ກ້າວເຂົ້າສູ່ໄລຍະໃໝ່ທີ່ໃຫ້ຄວາມສຳຄັນໃນການພັດທະນາການຄ້ານຳເຂົ້າແລະສົ່ງອອກໄປພ້ອມກັນ,ໃນຕໍ່ໜ້າ,ຈີນຈະສືບຕໍ່ເພີ່ມທະວີການນຳເຂົ້າສິນຄ້າ,ຊຸກຍູ້ໃຫ້ການຄ້າຂາເຂົ້າຂາອອກພັດທະນາຢ່າງກົມກຽວກັນ.
ທ່ານຈົ່ງຊ່ານຊີ້ອອກວ່າ,ນັບຕັ້ງແຕ່ເຂົ້າເປັນສະມາຊິກອົງການການຄ້າໂລກຫຼືWTOມານີ້,ລະບຽບກົດໝາຍທາງດ້ານການຄຸ້ມຄອງການນຳເຂົ້າຂອງຈີນນັບມື້ນັບສົມບູນຂຶ້ນ,ລະດັບການເປີດຕະຫຼາດໄດ້ຍົກສູງຂຶ້ນເລື້ອຍໆ,ການຄ້ານຳເຂົ້າໄດ້ເຕີບໂຕຢ່າງວ່ອງໄວ,ແຕ່ການຄ້ານຳເຂົ້າຍັງມີບັນຫາຫຼາຍຢ່າງເຊັ່ນໂຄງປະກອບການຄ້າແລະນະໂຍບາຍຍັງບໍ່ສົມບູນປານໃດ, ຄວາມສະດວກໃນດ້ານການຄ້າຍັງບໍ່ຫຼາຍປານໃດແລະອື່ນໆ.ໃນຕໍ່ໜ້າ,ພາກລັດ,ອົງການສື່ກາງການຄ້າຂາເຂົ້າຂາອອກພ້ອມດ້ວຍວິສາຫະກິດຄວນຮ່ວມມືກັນຊຸກຍູ້ການເປີດກວ້າງການນຳເຂົ້າ.ລັດຖະບານຈີນຈະປັບປຸງນະໂຍບາຍການນຳເຂົ້າທີ່ກ່ຽວຂ້ອງໃຫ້ດີຂຶ້ນ,ສ້າງສະພາບແວດລ້ອມການຄ້າທີ່ມີຜົນດີຕໍ່ການນຳເຂົ້າ,ເພີ່ມຄວາມແຮງໃນການຊຸກຍູ້ການຄ້າ.
ສະຖິຕິສະແດງໃຫ້ເຫັນວ່າ,ລະຫວ່າງປີ2002ຫາ2010,ປະລິມານການນຳເຂົ້າຂອງຈີນໄດ້ເພີ່ມຂຶ້ນ3,7ເທົ່າ,ມີລຳດັບໃນທົ່ວໂລກສູງຂຶ້ນຄືຈາກອັນດັບທີ6ຂຶ້ນເປັນອັນດັບທີ2,ກາຍເປັນປະເທດສຳຄັນໃນດ້ານການຄ້ານຳເຂົ້າຂອງໂລກແລະຍັງກາຍເປັນຕະຫຼາດສຳຄັນສຳລັບການສົ່ງອອກສິນຄ້າຂອງປະເທດໃຫຍ່ທາງດ້ານການຄ້າເຊັ່ນເອີລົບ,ອາເມລິກາແລະຍີ່ປຸ່ນ.
