ມຽນມາໄດ້ເຂົ້າສູ່ໄລຍະເປີດກວ້າງການນຳໃຊ້ໂທລະສັບມືຖື
(GMT+08:00) 2011-10-03 16:52:09 cri
ຕາມຂ່າວໜັງສືພິມ<ກວ່າງໝິງຢື້ປ້າວ>: ເປັນເວລາດົນນານມາແລ້ວ, ໃນເວລາຄົນຕ່າງ ປະເທດກ່າວຍ້ອງຍໍຊົນເຊີຍຮີດຄອງປະເພນີອັນດີງາມຂອງມຽນມາຫຼັງຈາກໄດ້ດຳລົງຊີວິດຢູ່ນະຄອນຢາງກຸ້ງໃນໄລຍະໜຶ່ງ, ກໍ່ຮູ້ສຶກສັບສົນແລະເສຍດາຍຕໍ່ສະ ພາບການສື່ສານຢູ່ແຫ່ງນີ້ຍັງຫຼ້າຫຼັງ. ແຕ່ສິ່ງທີ່ໜ້າຊຶນຊົມທີ່ສຸດໃນປັດຈຸບັນນີ້ສະ ພາບເຊັ່ນນີ້ໄດ້ຮັບການປ່ຽນແປງໄປໃນທາງທີ່ດີຂຶ້ນ, ໂທລະສັບມືຖືເລີ່ມເຂົ້າສູ່ຊີ ວິດການເປັນຢູ່ຂອງປະຊາຊົນຫຼາຍຂຶ້ນ.
ປີ2007, ໃນເວລາທີ່ນັກຂ່າວຫາກໍ່ມາຮອດນະຄອນຢາງກຸ້ງ, ໂທລະສັບມືຖືມຽນມາຊຶ່ງຖືເປັນ"ສິ່ງຟູມເຟືອຍ"ມີຈຳນວນບໍ່ຫຼາຍ. ມີເຈົ້າໜ້າທີ່ຂອງສະຖານທູດຈີນປະຈຳມຽນມາຜູ້ໜຶ່ງກ່າວວ່າ, ນອກຈາກຢູ່ເຂດຊາຍແດນ, ຢູ່ທົ່ວປະເທດມຽນມາມີຄົນທີ່ໃຊ້ໂທລະສັບມືຖືພຽງແຕ່ບໍ່ເທົ່າໃດໝື່ນຄົນ, ແລະເຂດນຳໃຊ້ມືຖືແມ່ນຖືກຈຳກັດຢູ່ໃນນະຄອນຢາງກຸ້ງແລະເມືອງມັງດາເລ2ເມືອງໃຫຍ່ເທົ່ານັ້ນ. ຍ້ອນວ່າໃນເວລານັ້ນລັດຖະບານທະຫານໄດ້ຈຳກັດຢ່າງເຂັ້ມງວດຫຼາຍ, ຄົນຕ່າງປະເທດຢູ່ມຽນມາສະເໜີຂໍຊື້ເບີມືຖືເກືອບບໍ່ໄດ້.
ກ່ອນແລະຫຼັງເດືອນມິຖຸນາປີ2009, ລັດຖະບານມຽນມາໄດ້ເລີ່ມເປີດກວ້າງການນຳໃຊ້ໂທລະສັບມືຖືທີ່ສາມາດໃຊ້ໄດ້ໃນຫຼາຍເມືອງຂອງມຽນມາ, ຄົນໃຊ້ມືຖືເລີ່ມເພີ່ມຂຶ້ນຢ່າງຕໍ່ເນື່ອງ. ໃນວັນທີ22ເດືອນຕຸລາປີດຽວກັນ, ທຸລະກິດມືຖືcdmaເລີ່ມເປີດບໍລິການໃນນະຄອນຫຼວງແຫ່ງໃໝ່, ນະຄອນຫຼວງເນປີດໍໄດ້ກາຍເປັນນະຄອນຫຼວງທີ່ໄດ້ເປີດບໍລິການຫຼ້າສຸດໃນໂລກ. ແຕ່ເວລານີ້ເປັນຕົ້ນໄປ, ການພັດທະນາທາງດ້ານທຸລະກິດມືຖືໃນມຽນມາຈະມີອະນາຄົດອັນງົດງາມ. ປະຫວັດສາດໃນການນຳໃຊ້ໂທລະສັບມືຖືສະເລ່ຍຕໍ່200ຄົນຕໍ່1ໜ່ວຍໄດ້ສິ້ນສຸດລົງແລ້ວ. ຫຼັງຈາກນີ້ໄປໃນໄລຍະຍາວໂທລະສັບມືຖືcdmaທີ່ສາມາດໃຊ້ໄດ້ໃນທົ່ວມຽນມາໄດ້ກາຍເປັນຂອງຕ້ອນທີ່ໄດ້ຮັບຄວາມນີຍົມຫຼາຍທີ່ສຸດຈາກເຈົ້າໜ້າທີ່ລະດັບສູງຕ່າງໆໃນເວລາລົງຢ້ຽມຢາມທັດສະນາສຶກສາຢູ່ທ້ອງຖິ່ນໂດຍສະເພາະຢູ່ບ່ອນທີ່ທຸກຍາກ.
ໃນເດືອນມີນາປີ2011ນີ້, ຫຼັງຈາກລັດຖະບານໃໝ່ມຽນມາໄດ້ສ້າງຕັ້ງຂຶ້ນ, ມາດຕະການຕ່າງໆເພື່ອພັດທະນາດ້ານເສດຖະກິດກໍ່ໄດ້ວາງອອກຕາມລຳດັບ, ການປະຕິຮູບດ້ານໂທລະຄົມທີ່ມີຜົນປະໂຫຍດໃຫ້ແກ່ຊີວິດການເປັນຢູ່ຂອງປະຊາຊົນ ກໍ່ໄດ້ເລີ່ມປະຕິບັດຢູ່ໃນແຖວໜ້າ. ຫວ່າງມໍ່ໆນີ້, ບໍລິສັດໂທລະຄົມແຫ່ງລັດມຽນມາໄດ້ເຊັນຂໍ້ຜູກພັນດ້ານການເປີດກວ້າງແລະການຕິດຕັ້ງເຄືອຂ່າຍກັບບໍລິສັດເອກະຊົນ11ແຫ່ງພາຍໃນປະເທດທີ່ໄດ້ຮັບສິດອະນຸມັດ, ໃນ5ປີຕໍ່ໜ້ານີ້ມຽນມາມີແຜນການຈະເປີດກວ້າງໂທລະສັບເຄື່ອນທີ່gsm30ລ້ານເລກໝາຍ. ແຜນການສັງລວມດ້ານການພັດທະນາictຂອງມຽນມາທີ່ວາງອອກໃນເມື່ອບໍ່ດົນມານີ້ກໍ່ໄດ້ຊີ້ອອກວ່າ, ແຕ່ປີ2011ຫາປີ2015ຈະຂະຫຍາຍລະບົບເຄືອຂ່າຍໂທລະສັບມືຖືລົງສູ່ເຂດຊົນນະບົດກວ້າງຂວາງກວ່າເກົ່າ, ລັດຖະບານມຽນມາຄາດວ່າ, ຮອດປີ2015, ໃນຈຳນວນປະຊາກອນທັງໝົດ60ລ້ານຄົນຂອງມຽນມາຈະມີເກືອບເຄິ່ງໜຶ່ງທີ່ສາມາດນຳໃຊ້ໂທລະສັບມືຖື. ຖ້າເປັນແນວນັ້ນແທ້, ກໍ່ຈະເປັນການນຳເອົາຄວາມຜາສຸກມາສູ່ປະຊາຊົນມຽນມາ.
