ຫຼັງຈາກທ່ານສະແຕັບ ຈອບສ໌, ໜຶ່ງໃນຜູ້ກໍ່ຕັ້ງບໍລິສັດແອັບເປີນອາເມລິກາໄດ້ເຖິງແກ່ກຳໃນວັນທີ 6 ຕຸລານີ້, ທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດ ແລະເຈົ້າໜ້າທີ່ລັດຖະບານ, ຜູ້ຊ່ຽວຊານໃນວົງການ ແລະ ມວນຊົນຂອງຫຼາຍປະເທດເອີລົບ ໄດ້ສະແດງຄວາມໄວ້ອາໄລຕໍ່ທ່ານທີ່ເຖິງແກ່ກໍາ.
ວັນທີ 6 ຕຸລານີ້, ທ່ານບັນກີມູນ, ເລຂາທິການໃຫຍ່ ສປຊ ໄດ້ອອກຖະແຫຼງການວ່າ, ທ່ານຈອບສ໌ ໄດ້ປະດິດສ້າງ "ພາຫະນະ" ທີ່ຄົນທັງຫຼາຍສາມາດນຳໃຊ້, "ພາຫະນະ" ເຫຼົ່ານີ້ໄດ້ປັບປຸງຊີວິດການເປັນຢູ່ຂອງພວກເຮົາ, ແລະກໍເຮັດໃຫ້ທົ່ວໂລກມີການປ່ຽນແປງ. ທ່ານນີໂກລັສ ຊາໂກຊີ, ປະທານາທິບໍດີຝຣັ່ງ ກ່າວວ່າ, ທ່ານຈອບສ໌ ແມ່ນບຸກຄົນທີ່ເປັນສັນຍາລັກຂອງຍຸກປັດຈຸບັນ, ທ່ານເຕັມໄປດ້ວຍແຮງບັນດານໃຈ ແລະມີການປະດິດສ້າງຢ່າງບໍ່ຢຸດຢັ້ງ, ແມ່ນນັກທຸລະກິດແລະຜູ້ປະດິດສ້າງທີ່ຍິ່ງໃຫຍ່, ກໍແມ່ນບຸກຄົນນຳໜ້າໃນການປະຕິວັດດີຈີຕອນ. ທ່ານດາວິດ ກຳເມີຣອນ, ນາຍົກລັດຖະມົນຕີອັງກິດ ກ່າວວ່າ, ທ່ານຈອບສ໌ ແມ່ນອັດສະລິຍະບຸກຄົນທີ່ມີຫົວຄິດປະດິດສ້າງ, ພວກເຮົາຈະລະລຶກທ່ານຢ່າງເສົ້າສະຫຼົດໃຈ.
ນອກນີ້, ທ່ານ ແອັນດາ ແກັນນີ, ນາຍົກລັດຖະມົນຕີອຽກລັງ ໂຄສົກລັດຖະບານເຢຍລະມັນ ແລະບຸກຄົນວົງການ IT ກໍໄດ້ຕີລາຄາສູງຕໍ່ໝາກຜົນແລະການປະກອບສ່ວນຂອງທ່ານຈອບສ໌.
ວັນດຽວກັນ, ຢູ່ຕໍ່ໜ້າປະຕູຮ້ານຂາຍເຄື່ອງບໍລິສັດແອັບເປີນຢູ່ແຫ່ງຕ່າງໆຂອງໂລກ, ມີຫຼາຍຄົນໄດ້ວາງດອກໄມ້ແລະບັດລະລຶກແດ່ທ່ານຈອບສ໌. ນອກນີ້ຂ່າວແຈ້ງວ່າ, ປື້ມບັນທຶກຊີວະປະຫວັດຂອງທ່ານຈອບສ໌ ຈະພິມຈຳໜ່າຍກ່ອນເວລາກຳນົດ ຄື ໃນວັນທີ 24 ຕຸລານີ້.
