ວັນທີ 8 ຕຸລານີ້, ຢູ່ແຫ່ງຕ່າງໆຂອງຈີນໄດ້ຈັດກິດຈະກຳຕ່າງໆເພື່ອລະລຶກການປະຕິວັດຊິ່ນໄຮ້ຄົບຮອບ 100 ປີ.
ຢູ່ນະຄອນເສິງຕູ່ ເທດສະບານແຂວງເສສວນ ໄດ້ຈັດກອງປະຊຸມລະລຶກການປະຕິວັດຊິ່ນໄຮ້ແລະການເຄື່ອນໄຫວປົກປັກຮັກສາທາງລົດໄຟແຂວງເສສວນຄົບຮອບ 100 ປີ.
ຢູ່ນະຄອນອູຮ້ານ ເທດສະບານແຂວງຫູເປີຍ ໄດ້ຈັດກອງປະຊຸມລະລຶກການລຸກຮືຂຶ້ນຄັ້ງທຳອິດຢູ່ເມືອງອູຊ່າງ ເຊິ່ງເປັນການເລິ່ມຕົ້ນການປະຕິວັດຊິ່ນໄຮ້ ຄົບຮອບ 100 ປີ, ຜູ້ແທນວົງການຕ່າງໆຂອງແຂວງຫູເປີຍຈຳນວນ 1000 ກວ່າຄົນເຂົ້າຮ່ວມ. ນອກນີ້, ໃນວັນດຽວກັນ, ຫໍພິພິດທະພັນການປະຕິວັດຊິ່ນໄຮ້ທີ່ເກັບໂຮມວັດຖຸຈາກທົ່ວໂລກ ແລະ ຜ່ານການກໍ່ສ້າງເປັນເວລາ 2 ປີຢູ່ນະຄອນອູຮ້ານ ກໍເລີ່ມເປີດປະຕູຕ້ອນຮັບຄົນເຂົ້າຊົມຢ່າງເປັນທາງການ, ນີ້ແມ່ນຫໍພິພິດທະພັນປະຫວັດການປະຕິວັດຊິ່ນໄຮ້ທີ່ໃຫຍ່ກວ່າໝູ່ພາຍໃນປະເທດຈີນ.
ຢູ່ນະຄອນກວາງໂຈ່ວ, ຫໍລະລຶກການປະຕິວັດຊິ່ນໄຮ້ທີ່ໃກ້ກັບຫໍລະລຶກໂຮງຮຽນທະຫານຫວງຜູ ກໍເລີ່ມເປີດປະຕູໃຫ້ຄົນເຂົ້າຊົມ.
ຢູ່ນະຄອນໜານກິ່ງ, ໄດ້ຈັດກອງປະຊຸມລະລຶກການປະຕິວັດຊິ່ນໄຮ້ຄົບຮອບ 100 ປີແຂວງຈ່ຽງຊູ່ແລະນະຄອນໜານກິ່ງ. ທ່ານຫຼໍຈື້ຈຸ່ນ, ເລຂາພັກແຂວງຈ່ຽງຊູ່ ກ່າວວ່າ, ການລະລຶກການປະຕິວັດຊິ່ນໄຮ້ຄົບຮອບ 100 ປີ, ຕ້ອງຈື່ຈຳໃຫ້ແໜ້ນກ່ຽວກັບອຸດົມການທີ່ສ້າງປະເທດຈີນໃຫ້ຟື້ນຟູຄວາມຈະເລີນຂອງນັກປະຕິວັດໃນຄາວນັ້ນ, ດຳເນີນການປະຕິຮູບແລະການປະດິດສ້າງ, ສ້າງສາສັງຄົມທີ່ອິ່ມໜຳສຳລານຂຶ້ນສູ່ລະດັບສູງກວ່າເກົ່າຢ່າງຮອບດ້ານ.
