ສຳນັກງານຜູ່ຕາງໜ້າທັງເປັນຫ້ອງອັດລາຍການຂອງCRIທີ່ວຽງຈັນຂອງລາວແຂວນປ້າຍຢ່າງເປັນທາງການ
(GMT+08:00) 2011-10-10 16:52:25 cri
CRIລາຍງານວ່າ: ສຳນັກງານຜູ່ຕາງໜ້າທັງເປັນຫ້ອງອັດລາຍການຂອງວິທະຍຸສາກົນແຫ່ງປະເທດຈີນCRIທີ່ວຽງຈັນຂອງລາວແຂວນປ້າຍຢ່າງເປັນທາງການໃນວັນທີ10ຕຸລານີ້ຢູ່ນະຄອນຫຼວງວຽງຈັນຂອງລາວ.
ທ່ານເຈືອງສົມບູນຂັນ ກຳມະການສູນກາງພັກປະຊາຊົນປະຕິວັດລາວ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ,ທ່ານບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງວັດທະນະທຳຖະແຫຼງຂ່າວແລະການທ່ອງທ່ຽວລາວ,ທ່ານນາງປູ້ຈ້ຽນໂກວ ເອກອັກຄະລັດຖະທູດຈີນປະຈຳລາວ,ທ່ານວາງມິງຮວາ ຮອງຫົວໜ້າວິທະຍຸສາກົນແຫ່ງປະເທດຈີນຫຼື CRIໄດ້ເຂົ້າຮ່ວມພິທີແຂວນປ້າຍ.
ທ່ານບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງວັດທະນະທຳຖະແຫຼງຂ່າວແລະການທ່ອງທ່ຽວລາວກ່າວຄຳປາໃສໃນພິທີວ່າ, ລາຍການກະຈາຍສຽງພາກພາສາລາວຂອງCRIອອກອາກາດເປັນເວລາ55ປີມານີ້,ໄດ້ປະກອບສ່ວນອັນສຳຄັນເຂົ້າໃນການເພີ່ມທະວີມິດຕະພາບແລະຄວາມເຂົ້າໃຈກັນລະຫວ່າງປະຊາຊົນສອງຊາດລາວ-ຈີນ,ກາຍເປັນປ່ອງຢ້ຽມສຳຄັນສຳລັບປະຊາຊົນລາວເພື່ອຊອກຮູ້ຂ່າວຈີນແລະຂ່າວໂລກໂດຍສະເພາະນັບແຕ່ວິທະຍຸCRI FM 93 Mhzເລີ່ມອອກອາກາດໃນທ້າຍປີ2006ເປັນຕົ້ນມາ,ເຮັດໃຫ້CRIໄດ້ເຂົ້າສູ່ຊີວິດການເປັນຢູ່ຂອງຜູ່ຟັງລາວ.ສາມາດເວົ້າໄດ້ວ່າ,ໃນບັນດາສື່ມວນຊົນຂອງຈີນ, CRIແມ່ນສື່ໜຶ່ງທີ່ເຂົ້າໃກ້ຊິດກັບຜູ່ຟັງລາວທີ່ສຸດ.
ທ່ານສີພາ ນົງລາດ ຫົວໜ້າວິທະຍຸກະຈາຍສຽງແຫ່ງຊາດລາວໄດ້ກ່າວຄຳປາໃສໃນພິທີວ່າ,ການຕັ້ງວິທະຍຸCRIສາຂາລາວແມ່ນມີຜົນດີຕໍ່CRIເຂົ້າໃກ້ຊິດກັບຜູ່ຟັງລາວຕື່ມອີກ,ມີຜົນດີຕໍ່ການຍົກລະດັບການພົວພັນຮ່ວມມືລະຫວ່າງສື່ມວນຊົນສອງປະເທດລາວ-ຈີນໃຫ້ສູງຂຶ້ນ.
ໃນພິທີແຂວນປ້າຍ,ທ່ານວາງມິງຮວາ ຮອງຫົວໜ້າວິທະຍຸສາກົນແຫ່ງປະເທດຈີນCRIກ່າວວ່າ, ວິທະຍຸCRI FM 93 Mhzເປັນໝາກຜົນທີ່ດີເລີດແຫ່ງການຮ່ວມມືລະຫວ່າງສື່ມວນຊົນຈີນ-ລາວ.ການຮ່ວມມືຢ່າງຈິງໃຈລະຫວ່າງ CRIກັບວິທະຍຸກະຈາຍສຽງແຫ່ງຊາດລາວໄດ້ກາຍເປັນແບບຢ່າງທີ່ດີໃນການຮ່ວມມືລະຫວ່າງສື່ມວນຊົນຂອງປະເທດທີ່ຕ່າງກັນ.
ເລີ່ມແຕ່ປີ2006ເປັນຕົ້ນມາ, ວິທະຍຸສາກົນແຫ່ງປະເທດຈີນCRIເລີ່ມສ້າງຕັ້ງວິທະຍຸລະບົບFMໃນເມືອງຕ່າງໆໃນທົ່ວໂລກ,ໂດຍໄດ້ອອກອາກາດລາຍການດ້ວຍຫຼາຍພາສາທາງລະບົບFMຫຼືຄື້ນກາງ.ນັບມາຮອດວັນທີ1ກໍລະກົດປີ2011ນີ້, CRIໄດ້ສ້າງຕັ້ງວິທະຍຸ FM62ແຫ່ງຢູ່ຕ່າງປະເທດ,ແຕ່ລະມື້ອອກອາກາດລາຍການ1200ກວ່າຊົ່ວໂມງດ້ວຍ41ພາສາໃນ5ທະວີບຂອງໂລກຊຶ່ງປົກຄຸມ60ກວ່າປະເທດແລະເຂດແຄວ້ນໃນໂລກ.
