ຊາວຈີນຕ່າງດ້າວຕີລາຄາຢ່າງສູງຕໍ່ຄຳປາໃສຂອງທ່ານຫູຈີນທາວທີ່ກ່າວໃນງານລະລຶກການປະຕິວັດຊິ່ນຮາຍຄົບຮອບ 100 ປີ
(GMT+08:00) 2011-10-10 15:52:52 cri
ຕາມຂ່າວ cri: ງານລະລຶກການປະຕິວັດຊິ່ນຮາຍຄົບຮອບ 100 ປີໄດ້ຈັດຂຶ້ນຢູ່ນະຄອນຫລວງປັກກິ່ງໃນວັນທີ 9 ຕຸລານີ້,ທ່ານຫູຈີນທາວ, ປະທານປະເທດຈີນໄດ້ກ່າວຄຳປາໃສທີ່ສຳຄັນ. ຊາວຈີນຕ່າງດ້າວເຫັນວ່າ, ຄຳປາໃສຂອງທ່ານປະທານຫູຈີນທາວໄດ້ສະແດງໃຫ້ເຫັນຄວາມຫມາຍຕົວຈິງຂອງການປະຕິບັດຊິ່ນຮາຍ, ໄດ້ສົ່ງຕໍ່ຄວາມປາຖະຫນາຮ່ວມທີ່ຊຸກຍູ້ການໂຮມປະເທດຊາດເປັນເອກະພາບກັນແລະສ້າງປະຊາຊາດຈີນໃຫ້ຈະເລີນຮຸ່ງເຮືອງ.
ທ່ານຢາງເວີນຄາຍ, ບັນນາທິການໃຫຍ່ທັງເປັນຫວົຫນ້າສຳນັກງານຫນັງສືພິມ ຈົ່ງເວີນຕາວປ້າວຂອງຍີ່ປຸ່ນເວົ້າວ່າ,ຄຳປາໃສຂອງທ່ານປະທານຫູຈີນທາວເຮັດໃຫ້ຄົນຟັງແລ້ວປະທັບໃຈຫລາຍ, ຊາວຈີນທີ່ອາໃສຢູ່ຕ່າງປະເທດໄດ້ມີກຳລັງໃຈຫລາຍຕໍ່ອະນາຄົດຂອງປະຊາຊາດຈີນໃນການຟື້ນຕົວຄືນໃຫມ່,ແລະເຂົ້າໃຈຢ່າງເລິກເຊິ່ງວ່າພີ່ນ້ອງຮ່ວມຊາດຢູ່ສອງຝັ່ງຊ່ອງແຄບໄຕ້ຫວັນແມ່ນເປັນອັນຫນຶ່ງອັນດຽວກັນທີ່ມີສາຍເລືອດຕິດຕໍ່ກັນ.
ທ່ານອີ້ມ້າຍເຟິ່ງ, ປະທານເວທີປຶກສາຫາລືອິນໂດເນເຊຍຈີນເວົ້າວ່າ,ຈີນຈັດກິດຈະກຳລະລຶກການປະຕິວັດຊິ່ນຮາຍຄົບຣອບ 100 ປີມີຄວາມຫມາຍເລິກເຊິ່ງຫລາຍ. ໂດຍມີການນຳພາອັນຖືກຕ້ອງຂອງພັກກອມມູນິດຈີນ, ພັກປະຊາທິປະໄຕຕ່າງໆໄດ້ຕັ້ງຫນ້າເຂົ້າຮ່ວມການເມືອງແລະປຶກສາການເມືອງ, ເຮັດໃຫ້ຈີນນັບມື້ນັບຈະເລີນຮຸ່ງເຮືອງແລະມັ່ງຄັ່ງເຂັ້ມແຂງ.
ທ່ານທຽນເຟີຍ, ຮອງປະທານສະມາຄົມຊຸກຍູ້ການໂຮມປະເທດຈີນເປັນເອກະພາບກັນໂດຍສັນຕິຂອງອົສຕຼາລີກ່າວວ່າ, ຄຳປາໃສຂອງທ່ານປະທານຫູຈີນທາວໄດ້ສະແດງໃຫ້ເຫັນຄວາມຫມາຍຕົວຈິງຂອງການປະຕິວັດຊິ່ນຮາຍ, ນັ້ນຄື:ລູກຫລານປະຊາຊາດຈີນຢູ່ໃນທົ່ວໂລກຄວນສາມັກຄີກັນເຂົ້າ, ຮ່ວມກັນບາກບັ່ນສູ້ຊົນເພື່ອບັນລຸການໂຮມປະເທດຈີນເປັນເອກະພາບກັນ.
