ຕາມຂ່າວCRI: ວັນທີ 10 ຕຸລານີ້, ກອງປະຊຸມລັດຖະມົນຕີວັດທະນະທຳຈີນ-ອາຊຽນ ຫຼື 10+1 ໄດ້ຈັດຂຶ້ນຢູ່ນະຄອນຈົງກິ່ງຂອງຈີນ. ທ່ານຊ້າຍອູ ລັດຖະມົນຕີວ່າການກະຊວງວັດທະນະທຳຈີນ ແລະ ລັດຖະມົນຕີວັດທະນະທຳ ແລະ ຜູ່ຕາງໜ້າລັດຖະມົນຕີຂອງ 10 ປະເທດອາຊຽນໄດ້ເຂົ້າຮ່ວມກອງປະຊຸມເທື່ອນີ້, ແລະໄດ້ແລກປ່ຽນຄວາມຄິດຄວາມເຫັນຕໍ່ການສ້າງກົນໄກກອງປະຊຸມລັດຖະມົນຕີວັດທະນະທຳ.
ກອງປະຊຸມໄດ້ຫວນຄືນຂະບວນການສົນທະນາ ແລະ ຮ່ວມມືໃນຂົງເຂດວັດທະນະທຳນັບແຕ່ຈີນ ກັບ ອາຊຽນສ້າງການພົວພັນຄູ່ເຈລະຈາເປັນເວລາ 20 ປີມານີ້, ລົງເລິກຫາລືຄວາມຈຳເປັນທີ່ສ້າງກົນໄກກອງປະຊຸມລັດຖະມົນຕີວັດທະນະທຳລະຫວ່າງສອງຝ່າຍພາຍໃຕ້ສະຖານະການປັດຈຸບັນ. ທ່ານຊ້າຍອູກ່າວວ່າ, ການສົນທະນາ ແລະ ຮ່ວມມືດ້ານວັດທະນະທຳແມ່ນພື້ນຖານທີ່ສ້າງສະຕິຮ່ວມກັນ ແລະ ສ້າງການພົວພັນທີ່ໄວ້ເນື້ອເຊື່ອໃຈກັນຂອງພາກພື້ນ, ການສ້າງກົນໄກກອງປະຊຸມລັດຖະມົນຕີວັດທະນະທຳຈີນ-ອາຊຽນຈະປັບປຸງກົນໄກສົນທະນາ ແລະ ຮ່ວມມືໃຫ້ສົມບູນຂຶ້ນຕື່ມອີກ, ຊຸກຍູ້ສອງຝ່າຍເພິ່ມທະວີການແລກປ່ຽນກັນ ແລະ ປະສານງານກັນ, ຍົກສູງກຳລັງແຂ່ງຂັນສັງລວມດ້ານວັດທະນະທຳຂອງພາກພື້ນ,ເພິ່ມທະວີການເຂົ້າຮ່ວມດ້ານວັດທະນະທຳພາກພື້ນ ແລະ ການສົນທະນາ ແລະ ການຮ່ວມມືລະຫວ່າງຊາດ.
ໃນຖານະທີ່ເປັນໝາກຜົນສຳຄັນຂອງກອງປະຊຸມເທື່ອນີ້, ລັດຖະມົນຕີທີ່ຮ່ວມປະຊຸມໄດ້ຮັບຄວາມຮັບຮູ້ຄືກັນໂດຍທົ່ວໄປຕໍ່ການສ້າງກົນໄກກອງປະຊຸມລັດຖະມົນຕີວັດທະນະທຳ, ແລະຕົກລົງໃນເບື້ອງຕົ້ນວ່າຈະຈັດກອງປະຊຸມເທື່ອທຳອິດຢ່າງເປັນທາງການຢູ່ສິງກະໂປໃນປີ2012.
