ຈີນອາຊຽນປຶກສາຫາລືການພັດທະນາຂອງວັດທະນະທຳອາຊີຢູ່ນະຄອນຈຸ່ງກິ່ງ
(GMT+08:00) 2011-10-11 17:31:49 cri
ງານສິລະປະອາຊີຄັ້ງທີ12ໄດ້ໄຂຂຶ້ນໃນວັນທີ10ຕຸລານີ້ຢູ່ນະຄອນຈຸ່ງກິ່ງຂອງຈີນ.ໃນງານສິລະປະອາຊີຄັ້ງນີ້,ກະຊວງວັດທະນະທຳຈີນໄດ້ເຊື້ອເຊີນລັດຖະມົນຕີວ່າການກະຊວງວັດທະນະທຳຫຼືຜູ່ຕາງໜ້າຂອງ10ປະເທດອາຊຽນພ້ອມດ້ວຍຜູ່ຕາງໜ້າຂອງກອງເລຂາອາຊຽນເພື່ອປຶກສາຫາລືກັນກ່ຽວກັບການພັດທະນາຂອງວັດທະນະທຳອາຊີຢູ່ນະຄອນຈຸ່ງກິ່ງ.
ໃນພິທີໄຂງານສິລະປະອາຊີຄັ້ງທີ12,ທ່ານອາກຸສ ຊາໂທໂນ ລັດຖະມົນຕີ ຊ່ວຍວ່າການກະຊວງວຽງງານປະສານງານເພື່ອສະຫວັດດີການຂອງປະ ຊາຊົນຂອງອິນໂດເນເຊຍຊຶ່ງເປັນປະເທດປະທານໝູນວຽນປະຈຳປີ2011ຂອງອາຊຽນໄດ້ໃຫ້ຄວາມຢືນຢັນຢ່າງເຕັມສ່ວນຕໍ່ການແລກປ່ຽນແລະຮ່ວມມືກັນທາງດ້ານວັດທະນະທຳລະຫວ່າງຈີນກັບອາຊຽນ,ທ່ານກ່າວວ່າ:
"ໃນ20ປີຜ່ານມາ,ພວກຂ້າພະເຈົ້າໄດ້ມີຄວາມໄວ້ເນື້ອເຊື່ອໃຈກັນເພີ່ມຂຶ້ນຢ່າງບໍ່ຢຸດຢັ້ງ,ການແລກປ່ຽນແລະການຮ່ວມມືທາງດ້ານຍຸດທະສາດນັບມື້ນັບແໜ້ນແຟ້ນຍິ່ງຂຶ້ນ.ພ້ອມດຽວກັນນັ້ນ,ກໍ່ໄດ້ຮ່ວມກັນຊົມໃຊ້ແລະແລກປ່ຽນກັນທາງດ້ານວັດທະນະທຳນັບມື້ນັບຕັ້ງໜ້າກວ່າເກົ່າຊຶ່ງໄດ້ຊຸກຍູ້ຄວາມເຂົ້າໃຈກັນແລະມິດຕະພາບລະຫວ່າງປະຊາຊົນສອງຝ່າຍ."
ໃນກອງປະຊຸມລັດຖະມົນຕີວັດທະນະທຳຈີນ-ອາຊຽນຫຼືອາຊຽນບວກ1ທີ່ຈັດຂຶ້ນໃນວັນທີ10ຕຸລານີ້,ທ່ານຊ້າຍອູ ລັດຖະມົນຕີວ່າການກະຊວງວັດທະນະທຳຈີນເຫັນວ່າການແລກປ່ຽນແລະການຮ່ວມມືທາງດ້ານວັດທະນະທຳລະຫວ່າງຈີນກັບອາຊຽນແມ່ນພື້ນຖານຂອງການຮ່ວມມືທາງດ້ານວັດທະນະທຳໃນພາກພື້ນອາຊີ.ການສ້າງສະພາບໃໝ່ແຫ່ງການຮ່ວມມືລະຫວ່າງສອງຝ່າຍ,ສ້າງສາຍພົວພັນຄູ່ຮ່ວມມືຍຸດທະສາດສະຕະວັດທີ21,ເວົ້າໃນລະດັບໃດໜຶ່ງແລ້ວແມ່ນອີງອາໃສຄວາມເລິກແລະຄວາມກວ້າງແຫ່ງການແລກປ່ຽນແລະຮ່ວມມືກັນໃນຂົງເຂດວັດທະນະທຳ.
ໃນຈຳນວນ11ກົນໄກກອງປະຊຸມລະດັບລັດຖະມົນຕີຈີນ-ອາຊຽນທີ່ມີຢູ່ໃນປະຈຸບັນ,ຍັງບໍ່ທັນໄດ້ສ້າງກົນໄກກອງປະຊຸມລັດຖະມົນຕີວັດທະນະທຳເທື່ອ.ການຍົກລະດັບກົນໄກສົນທະນາໃນຂົງເຂດວັດທະນະທຳແລະຊຸກຍູ້ການຮ່ວມມືຕົວຈິງທາງດ້ານວັດທະນະທຳຢ່າງຮອບດ້ານໄດ້ກາຍເປັນບັນຫາຮີບດ່ວນທີ່ທັງສອງຝ່າຍປະເຊີນໜ້າ.ເດືອນຕຸລາປີ2009,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ສະເໜີຂໍ້ລິເລີ່ມໃນເວລາທ່ານເຂົ້າຮ່ວມກອງປະຊຸມສຸດຍອດຈີນ-ອາຊຽນຄັ້ງທີ12ວ່າ,ຈີນກັບອາຊຽນຄວນເພີ່ມທະວີການແລກປ່ຽນທາງດ້ານວັດທະນະທຳສັງຄົມ,ຄົ້ນຄວ້າການສ້າງຕັ້ງກົນໄກສົນທະນາລະຫວ່າງລັດຖະມົນຕີວັດທະນະທຳຂອງສອງຝ່າຍ.
ທ່ານຊ້າຍອູ ລັດຖະມົນຕີວ່າການກະຊວງວັດທະນະທຳຈີນກ່າວວ່າ,ຈີນມີຂໍ້ລິເລີ່ມໃຫ້ສ້າງຕັ້ງກົນໄກສົນທະນາລະຫວ່າງລັດຖະມົນຕີວັດທະນະທຳຈີນ-ອາຊຽນແມ່ນຍ້ອນພິຈາລະນາເຖິງສາເຫດ3ດ້ານ:"ອັນທີໜຶ່ງແມ່ນເພື່ອຍົກລະດັບການແລກປ່ຽນແລະການຮ່ວມມືທາງດ້ານວັດທະນະທຳລະຫວ່າງສອງຝ່າຍໃຫ້ສູງຂຶ້ນ,ເພີ່ມທະວີການປະສານງານເປັນເອກະພາບກັນ,ສ້າງແຜນການຍຸດທະສາດທີ່ດີ,ອັນທີສອງແມ່ນຊຸກຍູ້ການສ້າງໂຄງການຮ່ວມມືດ້ານວັດທະນະທຳທີ່ເປັນກົນໄກຍາວນານໃຫ້ຫຼາຍກວ່າເກົ່າ,ເພີ່ມທະວີຄວາມເຂົ້າໃຈກັນລະຫວ່າງປະຊາຊົນສອງຝ່າຍ,ປັບປຸງແລະເປີດກວ້າງພື້ນຖານທາງດ້ານປະຊາມະຕິໃນການຮ່ວມມືຈາກດ້ານຍຸດທະສາດ,ອັນທີສາມແມ່ນຮ່ວມກັນຊົມໃຊ້ອຸປະກອນແລະເງິນທຶນຂອງກັນ,ຊ່ວຍຊູຍູ້ໜູກັນດ້ວຍທ່າແຮງຂອງໃຜລາວ,ເພີ່ມຄວາມສາມາດແກ່ງແຍ່ງໂດຍລວມຂອງວັດທະນະທຳໃນພາກພື້ນ."
ພາຍຫຼັງໄດ້ສື່ສານແລກປ່ຽນກັນຢ່າງເຕັມສ່ວນແລ້ວ,ລັດຖະມົນຕີວ່າການກະຊວງວັດທະນະທຳປະເທດຕ່າງໆທີ່ຮ່ວມປະຊຸມໄດ້ມີຄວາມຮັບຮູ້ທີ່ຄືກັນໂດຍທົ່ວໄປກ່ຽວກັບການສ້າງຕັ້ງກົນໄກກອງປະຊຸມລັດຖະມົນຕີວັດທະນະທຳຈີນ-ອາຊຽນ,ແລະຕົກລົງໃນເບື້ອງຕົ້ນວ່າຈະຈັດກອງປະຊຸມເທື່ອທຳອິດຢ່າງເປັນທາງການຢູ່ສິງກະໂປໃນປີ2012.
